4
Solomon Khutnuai Bawite
1 Solomon cu Israel ngam pumpi uktu kumpi hi a,
2 a nuailamte hi a khutnuai bawite haw hi.
Zadok capa Azariah cu thiampi hi.
3 Shisha i capa Elihoref le Ahijah cu laingantu haw,
Ahilud capa Jehoshafat cu acozah laingantute hi.
4 Jehoiada capa Benaiah cu ngalkap hotu bawi hi.
Zadok le Abiathar cu thiampi haw hi.
5 Nathan capa Azariah cu ngamkhen uktu tei hotu hi.
Nathan capa thiampi Zabud cu kumpi ngaihsutnak piatu hi.
6 Ahishar cu kumpi inn nadektu tei hotu hi.
Abda capa Adoniram cu nadektute hotu tukin tiklomi hi.
7 Solomon in Israel ngamkhen sawm le pa nih uktu tukin bawi sawm le pa nih koih hi. Amuh ten kumpi le a innkua tei ca tukin a ngam khen haw tek pen an puak haw a, uktu pa khatin kum khat sungah ha khat sung eih tuk dehvo la in, an puak haw hi.
8 A nuailam a bawite le a nadehnak haw ngamkhen tei min hi.
Efraim mualhum ngamuktu cu Benhur hi.
9 Makaz, Shaalbim, Beth, Shemesh, Elon le Beth Hanan Khuapi tei uktu cu Bendeker hi.
10 Arubboth le Sokoh khuapi le Hefer ngam hempoh a uktu cu Benhesed hi.
11 Dor ngam a buppi in, a uktu cu Solomon canu Tafath puitu Benabinadab hi.
12 Taanak le Megiddo khuapite le Jezreel khua i hanglam, Bethshan le Zarethan khua el a um ngam hempoh Abel Meholah le Jokmeam khua tianin, a uktu cu Ahilud i capa Baana hi.
13 Gilead nam a Ramoth khua le Manasseh i capa Jair hinnam tei Gilead elkim a khuanote le Bashan ngamsung a, Argob ngam tuah a venghawngin, kulhtian tuah upmi le daal kongkalhnak tuah kalhmi khuapi sawm luk uktu cu Bengenber hi.
14 Mahanaim peng uktu cu Iddo i capa Ahinadab hi.
15 Naftali ngamuktu cu Solomon i canu pa khat Basemath puitu Ahimaaz hi.
16 Asher ngam le Bealoth khua uktu cu Hushai i capa Baana hi.
17 Issakhar ngamuktu cu Paruah i capa Jehoshafat hi.
18 Benjamin ngamuktu cu Ela i capa Shimei hi.
19 Amor kumpi Sihon le Bashan kumpi Og i ukmi Gilead ngamuktu cu Uri i capa Geber hi.
Hi ngamuktu sawm le pa nih tei humah ngam buppi uktu bawipa khat um hi.
Solomon Ukmi Ngam Khangto
20 Judah le Israel ngamsung a um mihingte cu tuipi mawk a, philnel zahin tam haw hi. Ei le in mihmehin, a nun haw nopzet hi.
21 Solomon i ukmi ngam cu nisuahnak lamah Eufrates Ngun pen nitumnak lamah Filistin ngam tian, hanglamah Izipt ngamngi tian zal hi. A uksung mihing ten siah pia in, Solomon i damsung hempoh ah a nadektu hi haw hi.Ref 4:21 Pian 15:18; 2Khang 9:26;
22 Solomon in an eih tuk nisialin, a kulmi cu, sangvut vam dihdiah seunote 4:22 seu khat cu tang khat hawng hi. za le sawm nga le cang seu za thum;
23 Cawm thaumi khui sawm khat hampa lak ata mi khui sawm nih, tuu za khat le sazuk, sakhi, saleel le a thau tuk cawm hihmi akte hi.
24 Solomon i ukmi ngam cu Eufrates Ngun i nitumnak lam hempoh, Eufrates Ngun mawk a um Tifsah pen nitumnak lamah Gaza khuapi tian hi. Eufrates ngun i nitumnak lam a um kumpite cu Solomon i ukmi hi khawng haw hi. A elkim a ngamte tuah lemno in um haw hi.
25 Solomon dam sungin Judah mi le Israel mite cu lungmuang zetin um haw in, a innkua hempoh ten sabit kung le thei kungte amu cuam tek nei haw hi.
26 Solomon in, a cipuh inn sungah ngaldonak cipuhleng kaitu cipuh thawng sawm li nei, cipuh ngalkap tei man tukin cipuh thawng sawm le thawng nih nei hi.Ref 4:26 1Kum 10:26; 2Khang 1:14; 9:25;
27 A khutnuai a ngamkhen uktu bawi sawm le pa nih ten, dehvo a neih haw mi ha khat sung tekin, kumpi Solomon le a innsung an eitu hempoh tei eih tukin an tuangtim sak haw hi. A kul haw mi hempoh kimno in pia hi.
28 Mah bawi ten a ha zui in, a kul hunsial ten barli cang le hampa cu, cipuhleng kaitu cipuhte le nadektu ngan tei ca in pia leleng haw hi.
29 Pathian in Solomon cu cihnak le theihtupnak pia in, a cihnak cu ngun mawk a philnel zah sialcelh ma hi.
30 Solomon cu nisuahnak lam micipte sangin cip saw in, Izipt micipte sang hei in cip saw hi.
31 Mihing hempoh lak pen micipbel hi. Ezra mi Ethan sangin le Mahol capa Heman, Kalkol le Darda sangin cip saw hi. Elkim ngam hempoh ah a minthang hi.Ref 4:31 Saam 89 Thulu
32 Thupaucapnak thawng thum le la cing thawng khat le pa nga phuah hi.Ref 4:32 Thup 1:1; 10:1; 25:1; Sol 1:1;
33 Thingkung le hamkung thute sonin, Lebanon a po mi sidar thing le kulhtian hum a poto mi Hyssop kung tei thu le la tianin son hi. Ngamsa, vano, a bok a vak ngamsa le ngasa tei thute vang son hi.
34 Leihum kumpi ten Solomon ih cihnak cu thei haw in, mi tampi a cihnak thu ngai tukin a lakah hah haw hi.