3
Solomon In Cihnak Ngen
(2Khang 1:3-12)
1 Solomon in Izipt kumpi Faro canu huai in, Izipt kumpi Faro tuah tang langkhat tukin lungkimnak laikhet bawl hi. A zi cu pui in, a kumpi inn, Topa i Biakinn le khuapi upnak kulhtian a sak khawng laklawh David khuapi ah umtik hi.
2 Topa i Biakinn tuk sak laih ngawl a hih hangin, mipite cu mun dadangah biaklan dawhin biakpiaknak bawl haw hi.
3 Solomon in Topa cu itin, a pa David daan piakmite cu zui hi. Mahnaven biaklandawh dadang hei ah ngante ngo in biakpiaknak bawl pepel hi.
4 Vei khat laihin, Solomon cu Gibeon ah biakpiaknak bawl tukin hawh hi. Itahim titale Gibeon cu a minthangbel biaklandawh umnak hi. Mahlai ah halkang biakpiaknak a sawm a zain, na pia zo hi.
5 Mah zan cu a mangah Topa langin, Topa in, “Ka piak tukin i deih kam?” tin dong hi.
6 Solomon in, “ Topa, ka pa David na Salpa, lakah, na ihnak catngawlin langtikin, na mai ah muantak le phazet le kom zetin nung hi. Amah na ihnak cu cat cuang ngawlin tuni hei ah langtikin, ama ai-in, a capa cu ngamuktu in bawl ci.
7 Topa aw, khangno hi laih ing, mah hangin ngam uknak cungcang imah thei ma na vengin, ka pa i ai-in kumpi dektik ci.
8 Atu-in nangma ca tukin na tenmi na hinnam kuamah i sialcelh ngawlmi mihing lakah um ing.
9 Mah hangin hi na mihingte pha le dikcang zetin ka uk theihnak tukin le a sia le pha ka khenkhuai theihnak tukin ka kulmi cihnak pia in hi. Mah ahimata hitihzah a tam na mite hi itin kaw ka uk theih tuk?” tin ti hi.
10 Topa in Solomon ngetmi a zak ten a lungdam zetin,
11 Solomon lakah, “Khansaunak, hauhnak le na ngal tei thihnak ngen ngawlin, na mihingte dikcangno in uk theihnak tukin cihnak na nget hangin,
12 na nget bangin pia tung hi. Cihnak le theihtupnak pia tung a, nangma laih ngawlin hihen, nangma nungten hei hihen nangmah bang cihnak le theihtupnak a neitu kuamah um haw tukma hi.
13 Na nget ngawlmi vang pia cih tung: Na nunsung hempoh ah hauhnak le minthannak nei tuk ci, akua kumpi hei in hihen nang cu bang haw tukma.
14 Na pa David bangin ka thu zui in, ka thukham le ka daan piakmite na bawl ahi tale na nun khansautik tung,” ti hi.
15 Solomon cu khanglo in, Pathian in, a mangah thuhilh hi tih cu thei hi. Jerusalem ah hawhin Topa i Thutiam Kuang mai ah dingin, Topa i lakah halkang biakpiaknak le pawlkom biakpiaknak bawl hi. Mahnung ten a khutnuai nadekte cu an eih puai bawlsak hi.
Solomon In Thu Haksa Thukhen
16 Vei khat cu numei pha ngawl pa nih, kumpi Solomon lakah heng haw hi.
17 Numei pa khatin, “Maw kumpi pa, hi numei nu le kei cu inn pa khatah um ung. Mah inn a ka um uh laihin capa hing ing.
18 Nau ka hin nung, a ni thumnak ten amah vangin capano hing bok hi. Mah innah midang kuamah um haw ma. Keimu pa nih bek ung.
19 Zan khat cu a capano delh kha in thi hi.
20 zanlaih takin tho a, ka hihbuh sungin, ka cano cu ka angsung pen la in, a angah koih hi. A thi mi a capa cu ka angah koih hi.
21 A zingten zingtungno in tho in, ka cano cu nawitui pia tukin ka lak ten a thi in mu ing. Komno in ka zoh cangcianleh ten a thi mi cu ka cano kha ma tih cu thei ing.”
22 Adang numei nu in, “Mah kha ma hi! A nungmi hi keima ca hi, a thi mi saw hi nangma ca,” ti hi.
A masa numei nu in, “Mah ma hi! A thi mi hi nangma ca hi, a nungmi saw hi keima ca hi,” ti bok hi.
Kumpipa i mai ah eldun li haw hi.
23 Kumpi Solomon in, “Na pa nih uhin, a nungmi nau cu ka ca hi ti veve uh ci, a thi mi cu kei ca kha ma ti veve uh ci,” ti in,
24 ngalnam latik hi. Ngalnam a hunpih haw ten
25 Solomon in, “A nungmi nauno hi khen nihin khen inna, hi numei pa nih tei lakah khenkhat veve in pia in,” ti hi.
26 A hingtu nu ngangai saw in, a capa humah ihnak tatak a neih hangin kumpipa i lakah, “Maw kumpi pa, nauno cu that zal pahsun hi. Hi nu i lakah pia saw in hi,” ti hi.
Mahnaven a dang numei nu in, “Kua ma lak hei ah pia pahsun. Khen nihin khenin hi,” ti hi.
27 Solomon in, “Nauno cu that pahsun. Amasa saw numei nu i lakah pia in hi. A hingtu nu hi,” ti hi.
28 Solomon i thukhennak cu Israel miten a zak haw ten dikcangno in thukhen thiamnak cu Pathian in pia hi tih thei in, Solomon cu upatin kihcazet haw hi.