2
David In Solomon Thucah
1 David cu a thihnak hun nai zo a hih ten a capa Solomon samin thucah hi.
2 “Kei cu thi tuk toh ing. Ka thih nungten ngalpha zetin le pasal na hihnak langtik inna,
3 Topa na Pathian i thupiakmite bawlin hi. Moses Daan sung a, ngatmi bangin Topa i Daan thupiakmi hempoh cu zui inna, mahten na dehmi hempoh le na hawhnak tihkimah lawhting tuk ci.
4 Topa in ka lakah, na casuan ten ka thupiakmi a lungmu haw le a tha neih hempoh tuah a dek haw ahi tale Israel ngam cu uk leleng haw tuk hi,” tin thutiam hi. A Daan le a thupiakmite na zui ahi tale Topa in, a thutepnak cu kimtik tuk hi.
5 Mah hum pen thildang na theih tuk ka deihmi cu Joab i ka humah a bawldan khi hi. Israel ngalkap hotu, Ner i capa Abner le Jether capa Amasa cu Joab in that hi. Ngal a do haw laihin, mi a thah haw mi phuba la in, ngal umleh ngawl toh nungten a thisan haw luangtik hi. Mawhnak a nei ngawlmi thatin, a kedam le a taikhapah thisan a bangtik hangin, mi mawh hi.Ref 2:5 2Sam 3:27; 20:10;
6 Iti bangin bawl tung tih ngaisung inna, baihno in thihtik pahsun.
7 Mahnaven Gilead mi Barzillai i capate cu phano in, na zo in hi. Itahim titale na u Absalom lau in, ka tai lih laihin, keimah a hehpihtu haw hi.Ref 2:7 2Sam 17:27-29;
8 “Benjamin ngam Bahurim khua a Ger i capa Shimei vang na phawhngilh tuk ngawlin deih ing. Mahanaim ka hen ni-in nase zetin keimah tam hi. Jordan Ngun ka hen ten keimah muakin amah cu that tuk ngawlin Topa i min salin thutiam bawl ing.Ref 2:8 2Sam 16:5-13; 19:16-23;
9 Mahnaven a thawnthongin suakcatik pahsun. Thu ngaisung thiam na hih hangin that ngawlin suakcatik hihim pahsun,” ti hi.
David Thi
10 David cu thi in David khuapi ah vui haw hi.
11 Israel ngam kum sawm li sung uk hi. Hebron pen kum salih sung ukin, Jerusalem pen kum sawm thum le kum thum uk hi.Ref 2:11 2Sam 5:4-5; 1Khang 3:4;
12 David ai-in, a capa Solomon in kumpi dekin, a ngam cu kho zetin uk hi.Ref 2:12 1Khang 29:23;
Adonijah Thihnak
13 Adonijah cu Solomon i nu Bathsheba lakah leng hi. Adonijah i nu cu Haggith hi. Bathsheba in Adonijah lakah, “Thupha tuah leng cim maw?” tin dong hi.
Adonijah in, Thupha tuah hung ing.
14 “Thil pa khat nget nuammi nei ing,” ti hi.
Bathsheba in, “Ikaw?” tin dong hi.
15 Adonijah in, “Kumpi hi tuk tohmi naveng Israel mite hei in kumpi hi tuk hi tin um haw tih cu thei ci. Mahnaven upnak bang hi ngawlin Topa i lungkimnak tuah ka nau Solomon saw kumpi suak hi.
16 Mah hangin thil pa khat ngen nuam ing a, el zal pahsun,” ti hi.
Bathsheba in, “Ikaw? Hilh hemin!” ti hi.
17 Adonijah in, “Shunem khanglai Abishag cu ka zi tukin Kumpi Solomon otpih sakin, nang cu el tukma hi tin um ing,” ti hi.Ref 2:17 1Kum 1:3-4;
18 Bathsheba in, “Pha em ei! kumpipa tawh sak nang maw,” ti hi.
19 A tih bangin Bathsheba cu hawhin, Adonijah ai-in, Kumpipa cu tawk hi. A nu hung tih amuh ten kumpi Solomon cu dingto in, a nu i mai ah upatnak tuah a lu kun hi. Mah nungten a kumpi khunnakah khungin, a nu cu a taklam khunnak dang pa khat humah khung hi.
20 A nu in, “Thil pa khat ngen nuam ing a, el thei tukma ci,” ti hi.
“Ikaw, ka nu? El tuk mang hi,” ti hi.
21 A nu in, “Abishag hi na u Adonijah i zi tukin cotikin,” ti hi.
22 Kumpipa in, “Ita Adonijah ca tukin Abishag ngen cim? Kumpi khunnak ngetsak vele! Adonijah cu ka u hi a, thiampi Abiathar le Joab vang ama lamah tang haw si!” tin ti hi.
23 Solomon in, Adonijah in hi a nget hangin a nunnak tuah kuan hen hi. “A nunnak tuah a kuan ma tale Pathian in keimah that hen.
24 Topa in ka pa David i khunnak humah kho zetin koih zo hi. Topa in, a thutepmi kimtikin uknak cu keimah le ka casuan tei lakah pia zo hi. Mah hangin a nungmi Pathian min salin, thutepnak bawl ing hi: Tuni in Adonijah cu thi tuk,” ti hi.
25 Mah hangin Kumpi Solomon in Jehoiada capa Benaiah lakah thupia in, Benaiah cu hawhin, Adonijah that hi.
Abiathar Hawlvawkin Joab Thi
26 Kumpi Solomon in thiampi Abiathar lakah, “Na khua le na ngam Anathoth ah pinin hi. Thi tak hi navecin ka pa David lakah na umlaihin, Topa i Thukham koihnak Kuang cingtu hi ci a, ka pa i haksatnak hempoh a thuakpihtu na hih hangin atu-in that hih tuk mang,” ti hi.Ref 2:26 1Sam 22:20-23; 2Sam 15:24;
27 Solomon in Abiathar cu Topa i thiampi a dehnak pen hawlvawkin, Topa in, Shiloh ah thiampi Eli le a casuan tei hum a thuphuan kimtik hi.Ref 2:27 1Sam 2:27-36;
28 Joab in mah thute cu za hi. (Joab cu Absalom pantu kha ma naven Adonijah lam tangtu hi.) Topa i Puanbuk lamah tai in, biaklandawh khuamkite cu na pom hi.
29 Topa i Puanbukah tai in biaklandawh elah Joab um hi tih thu Kumpi Solomon lakah, a theihtik haw ten mi hahin biaklandawhah a tainak thu dong hi. Joab in, “Solomon ka lau hangin Topa i lakah tai ing,” ti hi. Joab that tukin Solomon in Benaiah cu hah hi.
30 Benaiah cu Topa i Puanbukah hawhin Joab lakah, “Kumpipa in tul hen,” tin hilh hi.
Joab in, “Tul tuk mang. Hilai ah thi saw tung,” ti hi.
Benaiah cu kumpipa i lakah kiklehin, Joab i otmi cu hilh hi.
31 Solomon in, “Joab i tihnak bangin bawlin,” ti hi. “That inna, vui in hi. Joab in mawhnak nei ngawl mihing pa nih a thah hangin keimah le ka casuante cu thisan luan dantat pen luat tuk ung hi.
32 Ka pa David i theih ngawlin mi a thah hangin Topa in Joab humah phuba la tuk hi. Joab in amah sangin a pha saw mihing pa nih, mawhnak nei ngawlmi, Israel ngalkap hotu Ner capa Abner le Judah ngalkap hotu Jether capa Amasa cu that hi.
33 A thahmi tei thisan cu Joab le a casuan tei humah kumkhua in um tuk hi. Mahnaven kumpi khunnak hum a, khungtu David i casuan tei humah Topa i muicu cu kumkhua in heng tuk hi,” ti hi.
34 Mah hangin Benaiah cu Topa i Puanbukah hawhin Joab cu a thah nungten hampa lak a, ama innah vui hi.
35 Kumpipa in Joab ai-in Benaiah cu ngalkap hotu bawi ah bawlin Abiathar ai-in Zadok cu thiampi in bawl hi.
Shimei Thihnak
36 Kumpi Solomon in Shimei cu samtikin, a lakah, “Jerusalem ah na inn tuk sa in hi. Hilai ah um inna, hi khua pen imah lai ah hawh pahsun.
37 Tulin, Kidron Ngun na kaltan tale thi tuk ci a, mawh puatu cu nangmah hi tuk ci,” ti hi.
38 Shimei in, “Pha ei, kumpi pa, na hilh bangin bawl tung,” ti hi. Jerusalem ah ngeipi um hi.
39 Kum thum nungten Shimei i sal pa nih cu Gath kumpi, Maakah capa Akhish lakah tai haw hi. Gath ngamah a sal pa nihte um haw tih Shimei in, a zak ten,
40 a laak cu a kung damin, a sal zei tukin Gath kumpi Akhish lakah hawh hi. A salte cu mu in kikpihleh hi.
41 Shimei i bawlmi cu Solomon in, a zak ten,
42 Shimei cu samin, “Jerusalem zam tuk ngawlin thutiamtik ing hi, na zam tale thi tuk ci, tin ngallinnak phano pia ing. Na lungkimin ka tih bangin zui tukin thutiamta ci mei?
43 Ita na thutepmi siatsuahin ka thupiakmi na zui ngawl?
44 Ka pa David hum a, sualnak na bawlmi hempoh thei khawng ci. Topa in nang cu dantat tuk hi.
45 Mahnaven Topa in kei cu muicu pia tuk a, David uknak cu kumkhua in khotik tuk hi,” ti hi.
46 Kumpipa in thupia in, Benaiah cu hawh a, Shimei cu that hi. Solomon i uknak cu kho sesem hi.