21
Naboth i Sabit Huan
1 Jezreel khua kumpi Ahab inn elah Sabit huan pa khat umin, a neitu cu Naboth hi.
2 Vei khat cu Ahab in, Naboth lakah, “Na sabit huan hi keimah in co nang. Ka inn el a, um a hih hangin tuihang cinnak huandum tukin deih ing. Mahmi sangin a pha saw deuhmi sabit huan a dang pa khat pia tung hi. Ahimata na deih saw tale, a man a khawthu in pia tung,” ti hi.
3 Naboth in, “Hi sabit huan cu ka pi le pu tei lo hi. Nang ka piak tuk cu Topa in phal pahsuh hen,” ti hi.
4 Naboth in mahtih bangin a el hangin, Ahab a mitmai sia zetin le thinuk zetin, a innah pin hi. A zaunakah panglam hekin zau leng hi. An hei ei nuam ma hi.
5 a zi Jezebel cu a lakah hawhin, “Ita thasia ngunguih nge cim? Ita an ei ma nge cim?” tin dong hi.
6 Ahab in, “Naboth i otmi hangin hi. A sabit huan lei tum ing a, a lei na phalma tale Sabit huan a dang pa khat pia tung ti naveng, phal ma hi. Co thei tukma ci, tin ti hi” tin don hi.
7 A zi Jezebelin, “Israel ngam kumpi hi ma cim maw? Tho in! Zau toh pahsun. Lungnopin um inna, an vang ei in hi. Naboth i sabit huan cu keimah in ngahtik tung hi,” tin tih hi.
8 Jezebelin Ahab i min tuah lai nganin, kumpi min khentik a, Jezreel khuapi sung a bawite le hotu tei lakah kuat hi.
9 A lai sungah, “An can ni bawl unna, mipite sam khawm un hi: Naboth vang mahlai a, upatnak munah khungtik un hi.
10 Mi suaksual pa nih sam unna, Naboth hi Pathian le kumpi tamtu hi, tin sualnawn haw hen. Mah nungten Naboth cu khuahialah haw pih unna, suang tuah sep hum un hi,” tin ngan hi.
11 Jezebel i thupiaknak bangin khuasung bawite le hotu ten bawl haw hi.
12 An can ni bawlin mipite samkhawmin, Naboth cu upatnak munah khungtik haw hi.
13 Mi suaksual pa nih ten mipi tei mai ah, “Hi pa hi Pathian le kumpi tamsetu hi,” tin sualnawn haw hi. Mahceng ten Naboth cu khuahialah hawhpihin, suang tuah sep hum haw hi.
14 Jezebel lakah, “Naboth cu thi zo hi,” tin thuthan haw hi.
15 Mah thu a zak bek ten Jezebelin, Ahab lakah, “Naboth cu thi zo hi. Hawh inna, a zuak nuam ngawlmi a sabit huan cu nangmata, hi thei zo hi,” ti hi.
16 Ahab cu thoto paihin sabit huan cu ham tukin hawh hi.
17 Topa in Tishbe khua profet Elijah lakah,
18 “Samaria kumpi Ahab lakah hawhin hi. Naboth i sabit huan la tukin hawh a, huan sungah tawk tuk ci.
19 A lakah, ‘Amah Naboth na thah nungten a leingam vang la tuk laih cim?’ Uico ten Naboth i thisan a liahnak munah na thisan cu liak bok haw tuk hi tin, Topa in ti hi, tin hilhtik hi.”Ref 21:19 1Kum 22:38;
20 Ahab in, Elijah amuh ten, “Ai zaw! Keimah muta ci maw, ka ngalpa!” tin ti hi.
Elijah in, “Mahzuh hi, na mu ing ngei!” Topa i mitmuhah thil sual bebek bawl ci.
21 Mah hangin Topa in, na lakah, “Na humah bawngsiatnak hengtik tung a, na nunnak botik tung. Na innkua sung a, pano hempoh, naupang le upa ti ngawlin pailaltik khawng tung.
22 Israel mite sualnak sungah tumpihin, ka thinuknak cu mei bangin na alhtik hangin na innkuate cu Nebat capa kumpi Jeroboam le Ahijah capa kumpi Baasha i innkuate bang hi tuk hi,” ti hi.
23 Topa in, “Jezebel i luang cu Jezreel khuapi sungah uico ten ei haw tuk,’ ti hi.Ref 21:23 2Kum 9:36;
24 Khua sung pen a thi mi na unaupih tei luang cu uico ten ei haw tuk a, hampa lak pen a thi mite cu mulukolh ten ei haw tuk,” ti hi.
25 Topa i mitmuhin Ahab bangin thil sual bebek a bawltu kuamah umma hi. A venghawngin, a zi Jezebel i sosuahnak bebek tuah bawl hi.
26 A thil sual bawlmi lak pen a ningdelhhuaibel cu Israel mite Kanaan ngam a tum haw ten Topa i hawlvawkmi, Amor mite bangin milim a biakmi hi.
27 Elijah in thu a hilh ceng ten, Ahab cu a puan botkek khawng a, thangkhau puan silhin, an hei ei ngawlin um hi. Thangkhau puan silhin zau a, thasiazet le mitmai sia zetin um hi.
28 Topa in profet Elijah lakah,
29 “Ka mai ah Ahab a lungmu niamkhiat zetin, a um khi mu cim? Hi bangin a um hangin a nunsungah lungkhamnak le siatlalnak hengtik tuk mang. A capa khan ten Ahab i innkua ah hengtik tung,” ti hi.