22
Profet Mikaiah In Ahab Ngallinnak Pia
(2Khang 18:2-27)
1 Israel le Siria tei laklawhah kum thum sung ngaldai hi.
2 Mahnaven a kum thumnak ten Judah kumpi Jehoshafat cu Israel kumpi Ahab tawk tukin hawh hi.
3 Ahab in, a khutnuai bawi tei lakah, “Ita Gilead ngam a, Ramoth khua cu Siria kumpi khutsung pen lak a tum uh ngawl? Eimuta si!” ti hi.
4 Jehoshafat lakah, “Ramoth do nang inna, bawm ni cim?” tin dong hi.
Jehoshafat in, “Bawm tung. Ka ngalkapte le ka cipuh ngalkapte vang mansa in um haw hi.
5 Mahnaven masabelin Topa thu dong hih nung,” ti hi.
6 Mah hangin Ahab in profet samin, za li hung haw hi. A mu lakah, “Ramoth do nang maw?” tin dong hi.
Amuh ten, “Do in hi. Topa in nehnak pia tuk,” tin ti haw hi.
7 Jehoshafat in, “ Topa thu dong tukin profet dang um haw ma toh maw?” tin dong hi.
8 Ahab in, “Adang pa khat umlaih hi. Amah cu Imlah i capa Mikaiah hi. Mahnaven amah cu hua ing. Itahim titale ka humah thupha hilh awng ma hi. Thusia bebek hilh thei,” ti hi.
Jehoshafat in, “Mahti bangin awn pahsun,” ti hi.
9 Mah hangin kumpi Ahab in manlang zetin Mikaiah sam tukin a zung a, bawipa khat hah hi.
10 Kumpipa nih, Ahab le Jehoshafat cu a kumpi thuam silhin, Samaria khuapi kulhtian kongkhah pualeu a um, cangngawinak mun a, kumpi khunnak humah khungin, a mai hawah, profette cu profet awn tuah awn li haw hi.
11 Amu lak a profet pa khat, Khenaanah i capa Zedekiah in thik ki bawlin Ahab lakah, Topa in, “Hi thik ki tuah Siriate do in,’ a ci haw mittik khawng tuk uh ci,” tin hilh hi.
12 Profet dangte vangin mahtibang lelengin, na hilh khawng haw hi. “Ramoth khua do unna, neh tuk uh ci, Topa in nehnak pia tuk hi,” tin ti ten haw hi.
13 Mikaiah sam tukin a hahmi bawi in, Mikaiah cu, “Profet dang ten ka kumpi uh i neh tuk thu bek hilh haw hi. Nang vang mah bangin hilh bokin hi,” tin so hi.
14 Mikaiah in, “ Topa i minin hilh ing: Topa i hilh tukin a tiammi bek hilh tung,” ti hi.
15 Mikaiah cu kumpi mai a hen ten kumpipa in, “Mikaiah, kumpi Jehoshafat le keimah in Ramoth khua do ni ung maw, do tukma kam ung, hilh hemin?” tin ti hi.
Mikaiah in, “Do vele! Neh tuk ci. Topa in nehnak pia tuk hi,” tin don hi.
16 Ahab in, “ Topa i min salin ka lakah thu na hilh ten thuman bebek hilhin hi, tin vei izong kaw ka hilh tuk?” tin liat hi.
17 Mikaiah in, “Israel mite cu cingtu nei ngawl tuuhon bangin mualhumah vakvai in, a um haw mu ing. Topa in, ‘Hi mipi hi hotu nei haw ma; a inn hawah pin khawng haw hen,’ ti hi,” tin hilh hi.Ref 22:17 Mipum 27:17; Mt 9:36; Mk 6:34;
18 Ahab in Jehoshafat lakah, “Hi pa hi ka humah thupha hilh awng ma, ti ma ing maw? Thusia bebek hilh leleng hi,” ti hi.
19 Mikaiah in, a awn cu pehlehin, “Atu-in Topa i awnkam ngai in hi! Topa cu vancung a kumpi khunnak humah khungin, a vancungmite a taklam le veilamah a din haw mu ing.Ref 22:19 Job 1:6; Isaiah 6:1;
20 Topa in, ‘Ahab cu Ramoth khua ah hawhin, thihnak tawh tukin akua kaw a zol tuk?’ ti hi. Vancungmi khenkhatin, thu pa khat hilh haw hi; adang ten thudang hilh haw hi.
21 Nungdawlbel ten hawvang pa khatin, Topa cu nekin a lakah, ‘Keimah in zolta nang,” ti hi. “Itin kaw na zol tuk?” tin Topa in, a dot ten,
22 amah in, “Hawh nang inna, Ahab i profet hempoh zolthu sontik khawng tung,’ ti hi. Topa in, “Hawh inna, zolin hi. Tithei ngangai tuk ci,” ti hi.
23 Mikaiah in peh leleu in, “A tih bang ngangai si! Topa in, na profette na lakah zolthu sontik khawng hi. Topa amah loli in, na humah siatsuahnak heng tukin laiteknak nei zo,” ti hi.
24 Zedekiah in, Mikaiah cu nekin, a bek pen bengvawk a, “Itin kaw Topa i hawvang cu na lakah thuhilh tukin ka lak pen a thawn?” ti hi.
25 Mikaiah in, “Inn nunglam khansungah na ngelh lih ten mah thu cu zaleh tuk ci,” ti hi.
26 Kumpi Ahab in, a khutnuai bawi pa khat lakah, “Mikaiah hi man inna, khuapi uktu Amon le ka capa Joash lakah hawhpihin hi.
27 Hilh inna, himdamno in ka kikleh laklawh thawngah khia henna, cangho le tui na pia hen,” ti hi.
28 Mikaiah in, “Himdamno in, na kik ahi tale keimah mangin Topa awn ngawl hi tuk hi. Mi hempohin ka otmi hi theihpih un,” ti hi.
Ahab Thihnak
(2Khang 18:28-34)
29 Israel kumpi Ahab le Judah kumpi Jehoshafat cu Gilead ngam Ramoth khua do tukin tul haw hi.
30 Ahab in, Jehoshafat lakah “Ngal a do uhten kei cu midang bangin amasabelin bawlhem tung a, nang cu kumpi bangin thuamin hi,” ti hi. Israel kumpi cu midang bangin amasabel bawlhemin, ngaldonakah hawh hi.
31 Siria kumpi in, Israel kumpi sialngawl adang kuamah do tuk ngawlin a cipuhleng ngalkap hotu sawm thum le pa nihte cu thupia hi.
32 Kumpi Jehoshafat amuh haw ten Israel kumpi hi tuk tih ngaisungin, do haw hi. Jehoshafat a au ten,
33 Israel kumpi kha ma hi tih a theih haw ten cawl haw hi.
34 Siria ngalkap pa khatin batmi nei cuam ngawlin a thalcang cu a kah ten, bawngsiatnakin kumpi Ahab cu daal tuah bawlmi a ngalthuam pehdunnak awngno pen kha hi. Ahab in, “Keimah liamsuah haw ei!” tin au in, a cipuhleng hawltupa cu, “Manlangin hu taipih kikin,” tin thupia hi.
35 A dodunnak haw cu nasezet hangin kumpi Ahab cu a cipuhleng humah naancopin, Siria ngalkaplam hekin um hi. A liamnak meima pen a thi luangmi in, a cipuhleng kaihmi cu a thisan dim khawngin, taklam ten thi hi.
36 Nitum ten Israel ngalkapte i lakah, “Na khua le na ngam uhah pin khawng un,” tin thuthan haw hi.
37 Mah hangin Kumpi Ahab cu thi hi. A luang cu Samaria khua ah pua in, vui haw hi.
38 A cipuhleng cu Samaria tuitingah somciang haw a, Topa i a hilh hamsa bangin, a thi cu uico ten liak haw hi. Mah mun cu numei pha ngawl tei tuibual meknak hi.
39 Kumpi Ahab i bawlmi dang hempoh, saiho tuah ceimawi mi, a kumpi inn thu le khua a sahmi tei thu cu Israel Kumpi Tei Khang Tangthu Laibu sungah kimno in sialsiah haw hi.
40 A thih ten a capa Ahaziah in kumpi dek hi.
Judah Kumpi Jehoshafat
(2Khang 20:31-21:1)
41 Israel kumpi Ahab in, ngam a uk kum linakin, Asa i capa Jehoshafat cu Judah kumpi dek hi.
42 Mahlai amah cu kum sawm thum le kum nga hi a, Jerusalem pen kum sawm nih le kum nga sung uk hi. A nu cu Shilhi i canu Azubah hi.
43 A pa Asa bangin Topa i mitmuhah thilpha bawl hi. Mahnaven leihum mitei milim biaknak munte cu a siatsuah ngawl hangin mi tampi ten mah biaknak munte cu biakpiaknakin mang leleng haw hi.
44 Jehoshafat in Israel kumpi tuah lemdaihnak bawl hi.
45 Jehoshafat i bawlmi dang hempoh a ngaldonak le a ngal phatnakte tuah Judah Kumpi Tei Tangthu Laibu sungah sialsiah haw hi.
46 A pa Asa khan pepan a tanglaihmi, a pathian biaknak a, numei pha ngawl hempoh numei hihen, pano hihen, that khawng hi.
47 Mah hunin Edom ngam cu uktu kumpi nei ma hi. A ngamuktu cu kumpi bawmtu bek hi haw in, Judah kumpi i nadeh piakmi haw hi.
48 Kumpi Jehoshafat in, Ofir ngam pen sui leinak tukin tuipi thuanthum hum hawh thei tinbaw tampi bawl hi. Mahnaven Ofir ah hawh thei haw ma hi, itahim titale Eziongeber ah a tangpawlawngte sia hi.
49 Israel kumpi in tuipi thuanthum khualzin a mihingte le Judah kumpi Jehoshafat i mihing tuipi thuanthum khualzinte zin langkhat tukin zawm naven Jehoshafat in el hi.
50 Jehoshafat cu thi in, David khuapi kumpi tei vuinak munah vui haw in, a capa Jehoram in kumpi dek hi.
Israel Kumpi Ahaziah
51 Judah kumpi Jehoshafat in, a ngam a uknak kum sawm le kum salihnakin, Ahab i capa Ahaziah cu Israel kumpi dek a, Samaria khuapi pen kum nih sung uk hi.
52 A pa Ahab le a nu Jezebel cu kumpi Jeroboam i sualnak lampi zui in, Topa i humah sual bok hi. Ahab, Jezebel le Jeroboam cu Israel mite sualnak sungah a puitu haw hi.
53 A pa i bawl zo bangin Ahaziah vangin Baal pathian bia in, a na dek hi: mahten Topa Israel i Pathian cu a thinuktik hi.