20
Siria Tuah Dodun Haw
1 Siria kumpi Benhadad in, a ngalkap hempoh khawm khawngin, a ngalkap tei humah ngamdang uktu bawi sawm thum le pa nih ten bawm haw in, a cipuh haw le a ngaldonak cipuhlengte tuah hawh haw hi. Samaria khuapi cu kilcihin do haw hi.
2 Khua sungah kamtai hahin, Israel kumpi Ahab lakah, “Kumpi Benhadad in,
3 na sui le na ngunte, na zi mawibelte le na cano lak pen a ngilbelte pia hen ti hi,” tin hilh haw hi.
4 Ahab in, “Ka bawipa Benhadad cu hu hilh un, a nget bangin ka lungkim hi. Keimah le ka neihmi hempoh vang a deih tale amata hi thei poh ung hi,” ti hi.
5 Mah nungten Benhadad i kamtaite cu Ahab lakah hung leleu haw in, “Na sui le ngun, na zi le na canaute, pia tukin cah ing.
6 Mahnaven atu-in, ka khutnuai bawite hah nangin, na umnak inn le na khutnuai bawi tei innte zei khawng haw tuk hi, man nei thil amuh hempoh la haw tuk hi. Zingten tubang hunin, heng haw tuk, ti hi,” tin hilh haw hi.
7 Kumpi Ahab in, a ngamsung a, hotute hempoh samkhawmin, a lak hawah, “Hi pa hi eimuh a siatsuah nuam hangin thusia bek zei hi. Ka zite, ka cano le ka sui le ngunte a ngetmi piak tuk cu el mang,” ti hi.
8 Hotu le mipi ten, “A thu cu imah simsial kha pahsun. A ngetmi vang pia pahsun,” ti haw hi.
9 Ahab in Benhadad i kamtai tei lakah, “Na kumpi uh ka bawipa cu na hilh un: ‘A masa a ngetmi cu pia tukin ka lungkim ing. Mahnaven a nungdawl saw a ngetmi cu ka lungkim thei mang,’ tita un,” ti hi.
Benhadad i kamtaite cu pin haw hi;
10 mahnaven Benhadad in kamtai hah lehin, hi bangin thucahleh hi, “Na khuapi a siatsuah tukin, a leivul le a buakte nangawn a khut haw tuah a thiak khawng theitu tuk ngalkap sialcelh ngawl hunpih tung. Ka tih bangin ka bawl ma tale pathian ten keimah that haw hen,” ti hi.
11 Kumpi Ahab in, thucah lehin, “Kumpi Benhadad cu na hilh un: Ngalkap pha ngangai ten ngal a do celh laih ngawlin tuangkhawng awng ma hi; ngal a neh nung bek ten tuangkhawng haw,” ti hi.
12 Ahab i thucahmi cu Benhadad le ama lamtangtu bawi tei camnak munah zu a in haw laihin za haw hi. Manlang zetin Samaria do tukin Benhadad in thupia in, a ngalkapte cu a ngal kulhtian mun haw tek pen mansa in um haw hi.
13 Israel kumpi Ahab lakah, profet pa khat hawhin, “ Topa in, hi ngalkapte hi a tam haw hangin lau pahsuh un. A hum hawah nehnak pia tung a, Keimah cu Topa ka hihnak thei tuk uh ci,” tin hilh hi.
14 Ahab in, “Ka do ten akua in kaw a ho tuk?” tin dong hi. Profet pa in, “Ngamkhen uktu bawi tei nuai a, ngalkap khangno ten ho haw hen, tin Topa in ti hi,” tin hilh hi. Masabel a nawktute cu akua in ho tuk kaw? tin Ahab in dong leleu a, Profet pa in, “Nangmah in ho tuk ci,” ti hi.
15 Kumpipa in ngamkhen uktu bawi tei nuai a, ngalkap khangnote sam khawng a, za nih sawm thum le pa nih kim haw hi. Israel ngalkapte sam khawm lehin, thawng salih kim haw hi.
16 A ngalte cu sunlaih takin do haw hi; Benhadad le ama lamtangtu bawi sawm thum le pa nihte cu ngiahbukah zukham haw hi.
17 Ngalkap khangno ten masabelin nawk haw in, Benhadad i hahmi zawldawttu ten, “Samaria pen ngalkap hon khat tul haw,” tin hilh haw hi.
18 Benhadad in, “Ngaldo tukin a hung haw hei in hihen, lemdaihnak bawl tukin a hung haw hei in hihen, a nungin man un,” tin thupia hi.
19 Ngalkap khangno ten do masa in, a nung pen Israel ngalkap honpi ten zui haw hi.
20 A mu tawhmi ngal cu pa khat ten that haw hi. Siria ngalkapte cu tai haw in, Israel ngalkap ten hil ngut haw; amah Benhadad vang cipuh ngalkap ten cingin, cipuh khungin tai ngah hi.
21 Kumpi Ahab ho in, cipuh tampi le cipuhleng tampi lonsakin, Siria ngalkapte cu nase zetin siatsuah haw hi.
22 Profet cu kumpi Ahab lakah hawhin, “Kikleh inna, na ngalkapte cu tam saw deuh le a pha saw deuhin tuangtimin hi. Ihempoh ngalling zetin vaihawmin, itahim titale mai kum khal hun ten Siria kumpi in doleh tuk hi,” ti hi.
Siria Tei Lehdonak
23 Kumpi Benhadad cu a khutnuai bawi ten, “Israel pathiante cu mualhum pathiante a hih hangin eimuh neh haw hi. Munlawnah a do uh tale neh hihim tuk hung.
24 Tu tum a, bawmtu bawi sawm thum le pa nihte hi ngalkap sung pen lawl inna, amu ai-in ngaldo mektu ngalbawi koih khawngin hi.
25 nangmah a taisantu ngalkap zahin ngalkap thak la inna, cipuh le cipuhlengte vang a thak la in hi. Israel ngalkapte cu munlawnah do in, tutum cu neh hihim tuk hung,” tin ti haw hi.
Kumpi Benhadad cu a lungkimin, a ngaihsutnak haw zui hi.
26 Khuakhal hun a hen ten a ngalkapte samkhawmin, Israel do tukin Afek khua ah hawh haw hi.
27 Israel ngalkapte vang samdun khawm bokin, ngalthuam silhin Siria ngalkap tei ngiahbuk ngalden mun nihah cam haw hi. Thingkung le hampa zah Siria ngalkap tei lakah, Israel ngalkapte cu demno haw a, keelhon dawmno hon nih bang thong haw poh hi.
28 Profet cu kumpi Ahab lakah hawhlehin, “ Topa i awnkam cu hitih hin hi: Keimah hi mualhum pathian hi in munlawn pathian kha mang hi, tin Siria ten ti haw hi. Mah hangin ngalkap hitihzah tei humah nehnak pia tung a, nangmuh le na mipi uhten keimah cu Topa ka hihnak thei haw tuk hi,” tin hilh hi.
29 Siria ngalkapte le Israel ngalkapte cu a ngiahbuk haw tek ngalden veve pen ni salih sung mansa hilhialin um haw hi. A ni salih ni ten dodun tawtok haw a, Israel ngalkap ten Siria ngalkapte cu ni khat sungin thawng za khat that haw hi.
30 A luatmite cu Afek khua ah tai haw hi. Mahti bangin a tai haw laihin Afek khua kulhtian cu cimin, Siria ngalkap thawng sawm nih le thawng salih delh hum hi.
Benhadad vang khuapi sungah tum bokin, inn pa khat i nunglam khansungah ngelh hi.
31 A nadek upa ten ama lakah, “Israel kumpi lakah hawhtik inna, thangkhau puan cu ka el uhah le ka ngawng uhah vialin, hawh tuk ung hi,” tin ti haw hi.
32 Mah hangin a tai hawah thangkhau puan kenin, a ngawng hawah khau kenin, Ahab lakah hawh haw hi. “Na sila Benhadad in, a nunnak khawih tukin ngen hi,” tin kumpi Ahab lakah ti haw hi.
Ahab in, “Nungca laih maw? Pha ei! Amah cu ka unau bangin ka ngaihsutmi pahcuh,” ti hi.
33 Benhadad khutnuai bawi ten Ahab in, itin tituk nen tim tin, a um haw laihin, Ahab in, “Ka unau hi,” a tih ten, manlang zetin, “Na tih bangin Benhadad cu na unau hi ngai hi,” tin ti haw hi. Ahab in, “Ka lakah hunpih un,” tin thupia hi. Benhadad a hen ten a cipuhleng humah khungtik hi.
34 Benhadad in, “Na pa i lak pen ka pa i lonmi khuate cu na lakah pialeh tung. Ka pa in Samaria khua sungah dawlpi a bawl bangin nang vang Damaskas khuapi sungah dawlpi bawl bokin,” ti hi. Ahab in, “Mahti bang ahi ngai tuk tale hah tung hi,” ti in, lungkimnak laikhet a bawl nung haw ten Benhadad cu hah hi.
35 Topa i thupiaknakin, a hon a, ummi profet i lak pen pa khatin, a ngualcam profet pa khat cu, “Keimah vat hemin,” ti hi. Mahnaven mahpa in el hi.
36 Mah hangin a lakah “ Topa i thupiakmi na el hangin na hawh bek ten kiosa in nangmah man tuk,” ti hi. Hawhin, a hawh bek ten kiosa in zui in, man ngangai hi.Ref 20:36 1Kum 13:24;
37 Mah profet cu midang pa khat lakah hawhin, “Keimah vatin hi,” ti hi. A tih bangin vatin, liamsuah hi.
38 Mah profet in, a mai cu puan tuah tuamin, midang bangin masabelin bawlduncopin, lampi elah ding hi. Israel kumpi i mah lampi a hawhvawk tuk cu ngak hi.
39 Israel kumpi cu heng ngangai a, profet in, “Maw kumpi pa, ngal a do uh laih khin ngalmatmi pa khat ka lakah ngalkap pa khatin hunpihin, ‘Hi pa hi phano in cingin hi. Na taitik tale na nunnak ahimata tangka thawng thum kuan tuk ci,’ ti hi.
40 Phano in cing na veng, thil dadang ka bawl thah hangin ka nanokzet ing a, mahpa cu taitik sual ing hi,” tin nging zetin ti hi.
Kumpipa in, “Na thu cu nangmah in soncat zo ci! Na sualman cu kuan tuk ci,” ti hi.
41 Profet pa in, a mai tuamnak puan cu dukin, kumpipa in profet hi tih cu thei paih hi.
42 Profet pa in, kumpipa i lakah, “ Topa i awnkam cu hi bangin hi: ‘Thah tuk ka tihmi na hah hangin na nunnakin kuan tuk ci, a ngalkapte na luattik hangin na ngalkapte bo haw tuk hi,’ tin hih hi.”
43 Israel kumpipa cu thincawl le lungkham zetin Samaria ah kik hi.