19
Elijah Sinai Mualhum Ah
1 Elijah i bawlmi hempoh le Baal profet a thah khawngnak thute cu kumpi Ahab in, a zi Jezebel hilh khawng hi.
2 Jezebelin Elijah lakah thucahin, “Baal profet tei hum a, na bawl bangin zingten tubang hunin, na humah ka bawlleh bokma tale pathian ten keimah that haw hen,” ti hi.
3 Elijah cu a thinsu in tai in, a umlawhpa tuah Judah ngam Beersheba ah hawh haw hi.
Mahlai ah a umlawhpa cu zamin,
4 Elijah cu ngamkhing lakah ni khat sung hawh hi. Thingpi nuai ah cawlin khung hi; thi nuam saw hi. “ Topa tawk toh hen, nap lehma toh ing. Ka nunnak hi na la saw ahin hi. Itahim titale ka pu le ka pa sangin phadeuh cuang ma sing!” tin thungen hi.Ref 19:4 Jn 4:3;
5 Thingkungpi nuai ah zapin, hihbu ngil hi. Phawhkhak ngawlin, vancungmi pa khatin zen a, “Tho inna, an ei in,” ti hi.
6 A elkim a zoh ten cangho em sem phil khat le tui thawl khat mu hi. Ei in, a in ceng ten zauleh hi.
7 Topa i vancungmi cu hung leleu in, a vei nihnak zenlehin, “Tho inna, an ei in; lampi ah haksa leita kha kawn ci,” ti hi.
8 Elijah cu tho in, a eih le a in nungten, a tha umlehin, Pathian i mual thiangtho, Sinai Mualhumah sun sawm li le zan sawm li sung hawh hi.
9 Mah suanghol sungah zan cam hi. Topa in, a lakah, “Elijah hilai ah i bawl nge cim?” tin ti hi.
10 Elijah in, Topa, “Ihempoh tithei Pathian, nangma na bek dek ing, nangma lamah tangzet ing. Mahnaven Israel miten nangmah tuah a thutep haw cu siatsuah zo haw; na biaklandawhte siatsuahin, na profet that khawng haw hi. Keimah bek tang ing a, tu hei in keimah nangawn thah tum haw,” ti hi.Ref 19:10, 14 Rom 11:3;
11 Topa in, “Tul inna, mual humah ka mitmuhin dingin,” ti hi. Topa cu a elno pen hawhvawkin, huihsia theutik a, mualte hing khawngin, suang vang keh khawng hi. Mahnaven Topa cu huih sungah umma hi. Huihtheu a colh nungten hiinhing hi; mahnaven Topa cu hiinhing sungah umma hi.
12 Hiinhing celh ten meikang lehleu hi; mahnaven Topa cu mei sungah umma hi. Meikang nungten aw nemno pa khat heng hi.
13 Mahmi cu Elijah in, a zak ten a puan tuah a mai hupin, suanghol sung pen tulin, a kongka elah ding hi. Aw in, “Elijah hilai ah ikaw na bawl?” tin ti hi.
14 Elijah in, “ Topa, Ihempoh tithei Pathian, nangma na bek dekin, nangma lamah tangzet ing. Mahnaven Israel miten nangmah tuah a thutep haw cu siatsuah zo haw hi; na biaklandawhte siatsuahin, na profet that khawng haw hi. Keimah bek tang ing, atu hei in keimah nangawn thah tum haw hi,” ti hi.
15 Topa in, “Kik inna, Damaskas khua el a, ngamkhing tawnin hawhin hi. Khuapi sung na hen ten Hazael cu Siria kumpi tukin sathau thih inna,Ref 19:15 2Kum 8:7-13;
16 Nimshi capa Jehu cu Israel kumpi tukin sathau thihin hi. Nangmah ai-awhtu tukin Abel Meholah khua mi Shafat capa Elisha cu sathau thihin hi.Ref 19:16 2Kum 9:1-6;
17 Hazael in ngalnam tuah thatin, a thah ngah ngawlte cu Jehu in that tuk hi; Jehu i thah ngah ngawlte cu Elisha in that tuk hi.
18 Baal pathian lakah lu a kun laih ngawltu le Baal milim a nam laih ngawltu, Israel ngam sungah mihing thawng salih khawih tung,” ti hi.Ref 19:18 Rom 11:4;
Elisha Samnak
19 Elijah cu hawhin, Shafat i capa Elisha cu khuicangte tuah leilet li cu mu hi. Lei lettu khuicangte cu a venghawngin kap sawm le kap nih hi a, Elisha cu a nungdawlbel khuikap tuah dek hi. Elijah in, a puan dukin, Elisha humah silhtik hi.
20 Elisha in, a khuicang kap zamin, Elijah cu hilin, a lakah, “Ka nu le pate nuksatta tung, mah nungten nangmah zui tung,” ti hi.
Elijah in, “Pha hi, hawh inna, kham mang hi,” ti hi.
21 Elisha cu a khuicang kap khat umnakah hawhin, a ngawh ceng ten khuicik cu huan hi; a cik huannak tuk khui ngawngkol cu tuahthingin mang hi. A huanmi khuicik cu mipite pia in, ei haw hi. Elijah cu zui in, a bawmtu in suak hi.