18
Elijah le Baal Profette
1 Hun cu ngei dedeuhin, nguahzu ngawlin a kum thumnak ten Topa in Elijah lakah, “Hawh inna, kumpi Ahab na tawkin hi. Nguahzutik tung,” ti hi.
2 Mah hangin Elijah cu hawhin, Samaria ah paampi nasezet tung ngangai hi.
3 Mah hangin Ahab in kumpi inncingtu tei hotu Obadiah cu sam hi. Obadiah cu Topakihcazettu hi a,
4 Jezebelin, Topa i profet a thah lih ten Obadiah in profet za khatte cu pui in, suanghol sungah sawm nga, sawm nga in sel a, a eih haw tukin tui le an vak hi.
5 Ahab in Obadiah lakah, “Ngam sung a, ciktui umnak hempoh le luam umnak hempoh ah hawh inna, cik mawk le luimawk hempoh ah hampa zei nung. Hampa amu uh tale, a cipuh le a laak uhte hi nung zo haw tuk hi. A ngan uhte pa khat hei thah kul ngawl saw tuk,” ti hi.
6 A hawhnak haw tuk ngam semdunin, mun dadangah hawh haw hi.
7 Obadiah a hawh lih laih takin phawhkhak ngawlin, Elijah tawk lok hi. Elijah hi tih cu thei paih hi; a mai ah kunin, “Bawipa, nangmah ngangai cim?” tin ti hi.
8 Elijah in, “Keimah, Elijah ing.” “Hawh inna, kumpi na bawipa cu, Elijah hilai ah um hi, tin hu hilhin hi,” ti hi.
9 Obadiah in, “I ka bawl hangin kaw hiti bang na nadehtik? Kumpi Ahab in that kha tuk ven!
10 A nungmi Topa na Pathian min salin hilh ing. Leihum ngam tihkimah kumpipa in nangmah zei leleng hi. Ilai ngam hei ah na um ngawlnak thu kumpi Ahab lakah a hilh haw tale, umma ngai hi tih theihnak tukin a ngamuktu haw cu thutiamnak bawltik hi.
11 Atu-in kumpipa i lakah hawhin hilai a, na um thu hilhin tin ti hi.
12 Ka hawh bek ten ka theih ngawlnak uh munah Topa i hawvangin, a puavawkta ahin itin kaw a tih tuk uh? Hilai a, na um thu Ahab lakah hilhin, amah in, a muleh ma tale kei cu that tuk hi. Na theih bangin kei cu ka naupang laih pepan Topa biatu le kihcatu ing.
13 Jezebelin Topa i profet a thah lih ten profet za khat cu suanghol sungah sawm nga, sawm nga, selin, a eih haw tuk le a in haw tuk tui le ante ka piakmi thei awng ma cim?
14 Mah hangin itin kaw hi lah na um thu kumpipa hilh tukin thu na piak theih? That tuk si!” tin ti hi.
15 Elijah in, “Ka biakmi Ihempoh tithei Topa i minin tiam ing: Tuni in kumpi tawk tung,” ti hi.
16 Mah hangin Obadiah cu kumpi Ahab lakah hawhin hilh hi. Ahab cu Elijah tawk tukin tul paih hi.
17 Ahab in, Elijah lakah, “Nangmah cim Israel ngamsung a, buainak bawltubel tin,” ti hi.
18 Elijah in, “Mi buaitiktu cu kei hi mang,” tin ti hi. “Nangmah saw ci. Nangmah le na pa hi uh ci. Topa i thupiakmi zui nuam ngawlin Baal pathian saw bia uh ci.
19 Israel mi hempoh tei lakah thupia inna, Karmel mualah keimah tawk haw hen. Kumpinu Jezebel i cinkhawimi Baal profet za li le sawm nga le pathiannu Asherah i profet za li vang hunpihin,” ti hi.
20 Ahab in Israel mi hempoh le Baal profet hempoh cu Karmel mualah sam khawm hi.
21 Elijah cu mipi mai ah dingin, “Ituk tian kaw na lungmu uh khenkhuai thei ngawlin na um hih tuk uh? Topa cu Pathian ahi tale bia un; mahnaven Baal cu Pathian hi na ti uh tale bia poh un,” ti hi. Mipi ten imah awn ngawlin meng khipkhep haw hi.
22 Elijah in, “ Topa i profet cu keimah bek tang toh ing. Mahnaven Baal profet cu za li le sawm nga um haw laih hi.
23 Khuicang pa nih hunpih unna, khuicang pa khat cu Baal profet ten la haw hen, ngo in, a cik cu atcenin, thing humah koih haw henna, mei cu lam haw pahsuh hen. Kei vangin khuicang pa khat mahti bangin bawlbok tung hi.
24 Baal profette cu a pathian haw lakah thungen haw henna, kei vang ka Topa i lakah thungen bok tung hi. A thu ngetnak uh zain, mei alh a khe suktu cu Pathian ngangai hi tuk,” ti hi. Mipi ten a lungkimin, au leilui haw hi.
25 Elijah in, Baal profet tei lakah, “Noh cu mi tampi na hih uh hangin masa in khuicang pa khat la unna, tuangtim un. Na pathian uh lakah thungen un. Mahnaven thing cu meilam hih pahsuh un hi,” ti hi.
26 A tih bangin amuh ten, a ken haw mi khuicang pa khat cu la in ngo haw, tuangtimin Baal lakah sun tianin thungen haw hi. “Maw Baal, hu ngai zalin hi,” tin au haw hi. Biaklandawh elkimah lam tawtok haw hi. Mahnaven imah donleh ma hi.
27 Ni sun toh ten, Elijah in nehsiah thahin, “Nging saw deuhin ngen un! Baal cu pathian hi ven! Thudang a ngaisung laih hei hi thei hi. Ahimata awnghawh laih hei hi thei hi. Khualzin hei hi kha thei pah cuh! A hihbu laih hi tuk hi, na phot uh kul vang hi thei pah cuh!” tin ti hi.
28 Baal profet ten nging dedeuhin ngento haw hi. Amu daan a hih bangin cei le nam tuah sundunin, a thisan haw tul kukuih hi.
29 Sunhel nung tian au in, kio li haw; mahnaven imah donleh ma hi. Imah awnkam zak tuk hei umma. Thawmnging imah za haw ma hi.
30 Elijah in mipi tei lakah, “Nek deuh hem un,” ti in, a venghawng haw in, a elkimah hung haw; Topa i biaklandawh a sia zomi cu lemleh thah hi.
31 Jakob casuan hinnam sawm le pa nih tei ai-in, suang sawm le pa nih la hi. Jakob cu Topa in, Israel tihin, a minsakmi pa hi.Ref 18:31 Pian 32:28; 35:10;
32 Mah suang sawm le pa nih tuah Topa biaknak tuk biaklandawh bawl hi. Mah biaklandawh kimin, tui pung nih va tukmi khuk co hi.
33 Biaklandawh humah, thing tiangin, khuicang cu a sahtan khawng nungten mah thing humah koih hi. Elijah in, “Bul pa li dimin tui than unna, cik le thing hi tompeh tukin leih un,” tin ti hi. A tih bangin bawl haw hi.
34 Amah in, “Leih hih un,” ti in leih leleu haw hi. “Leihleh hih un,” ti in tom pihpehin leih leleu haw hi.
35 Biaklandawh hum pen tui cu letin, a elkim a, cawhmi khuk vang tui dim khawng hi.
36 Sunhelin biakpiaknak bawl hun ten profet Elijah cu biaklandawh elah hawhin, “ Topa aw, Abraham, Isaak le Jakob i Pathian, nangmah cu Israel Pathian hi tihnak cu atu-in langtikin hi; keimah vang hi na sila ing hi, hi nate hi nangma thupiaknak bangin ka bawlmi hi tihvang langtikin hi.
37 Topa aw, donleh zal inna, mahten hi mihing ten Topa nangmah cu Pathian tatak hi ci tih thei haw tuk a, na lakah pui kikleh tuk ci,” tin thungen hi.
38 Mahbek ten Topa in mei alh khesukin, biakpiaknak cik le thing le suangte cu kang khawng hi. Lei vang kangko khawngin, khuk sung a, tuite vang kang khawng belh hi.
39 Mahmi cu mipi ten amuh haw ten lei ah bokin, “ Topa cu Pathian hi, Topa bek Pathian hi,” tin au leilui haw hi.
40 Elijah in, “Baal profet cu man khawng un. Pa khat hei suaktik pahsuh un!” tin thupia hi. Baal profet cu mipi ten man khawngin, Elijah in Kishon Ngunah hawhpihin that khawng hi.
Nguahzu Leh
41 Elijah in Kumpi Ahab lakah, “Atu-in hawh inna, an ei in hi. Nguah thawm thei ing,” ti hi.
42 Ahab an ei tukin a hawh laihin Elijah cu Karmel Muallek ah kai in, a khuk le khuk laklawhah a lu dualin, lei tawngkha tian kun hi.Ref 18:42-45 James 5:18;
43 A umlawhpa i lakah, “Hawh inna, tuipi lam zota hemin,” ti hi.
A umlawhpa cu hawhin, a kihleh ten, “Imah mu mang,” ti hi. Elijah in hilh leleu hi. Vei salih tian zotik hi.
44 A vei salihnak ten, “Meingo neuno khuttum tia tuipi pen kaito mu ing hi,” ti hi.
Elijah in, a umlawhpa cu, “Hawh inna, kumpi Ahab na hilhin: A cipuhleng khung henna, nguahin, a kham laih ngawlin, a innah pin hen,” ti hi.
45 Ngeican um ngawlin vanah meingo dimin huihtheu a, nguah bingleih bang zusuk hi. Ahab cu a cipuhleng khungin, Jezreel ah kik tukin tul hi.
46 Topa i huham cu Elijah humah hengin, a puansilhte cu a tai ah kho zetin vialin, Ahab i mai ah Jezreel khua luh tian tai ngut hi.