17
Elijah le Nguahzu Ngawlnak Thu
1 Gilead ngam Tishbe khua pen Elijah a tih haw profet pa khat cu kumpi Ahab lakah hawhin, “A nungmi Topa, Israel Pathian, ka biakmi Topa i minin hilh ing. Keimah in nguahzu toh hen ka tih laklawh, tu pepan mailam kum nih ahimata kum thum sung cu daita hihen, nguahzu hihen um tukma hi,” tin hilh hi.Ref 17:1 James 5:17;
2 Topa in Elijah cu,
3 “Hi mun cu taisan inna, nisuahnak lamah hawhin, Jordan Ngun pen nisuahnak lam a, ummi Kherith luimawkah ngelhin hi.
4 Mah lui pen tui intuk nei tuk ci a, an a piatu tukin va-akte thupia zo ing,” ti hi.
5 Topa i thupiak bangin Elijah cu Kherith luimawkah ngelh hi.
6 Mah lui pen va-ak ten tui le a eih tuk a zing le takin an le cik pia haw hi.
7 Dawm a ngeideuh ten nguah a zuk ngawl hangin mah lui cu kang hi.
Elijah le Zarefath Meivongnu
8 Topa in Elijah lakah,
9 “Sidon khua el Zarefath khua ah umin hi. Mahlai a um meivong pa khat cu nangmah cawmtu tukin thupia zo ing,” tin hilh hi.Ref 17:9 Lk 4:25-26;
10 Mah hangin Elijah cu Zarefath khua ah hawhin khuasung tumnak le kongkhah a hen ten meivong pa khat thingcom li mu hi. Mah meivong lakah, “Hehpihnakin tui intuk pia in,” ti hi.
11 Tui suak tukin meivongnu a hawhlih laihin, “An eih tuk vang hunpihin hi,” tin auh bet hi.
12 Meivongnu in, “ Topa na Pathian min salin hilh ing. An imah nei mang. Ka neihmi cu beel sungah canghovam khutdawh dim le palang sungah olif thau dawmlaihno bek nei ing. Hi thing ka commi tuah an ka neihmi demno cu ka capa le keima eih tukin huan tum ing. Mahmi cu an ka eih uh nungdawlbel hi tuk hi. Mahnung ten an ngawlin thi tuk toh ung,” ti hi.
13 Elijah in, “Na lungkham pahsun!” Hawh inna, na an cu huanin hi. Mahnaven masabelin, na neihmi sung pen khal khat neuno la inna, ka lakah hunpih inna, a tangmi cu na capa tuah na eih tukin huanin hi.
14 Itahim titale hi thu ah, Israel Pathian Topa in, nguah ka zuk lehtik ni a hen laklawh cu “Bel sung a, cangho vam cu bo awng tukma, palang sung a, situi vang bo awng tukma, tin hilh hi,” ti hi.
15 Meivongnu cu hawh a, Elijah i hilh bangin bawl khawng hi. Nisialin, Elijah i eih tuk hihen, meivongnu le a innkua tei eih tuk hihen, a venghawng haw in, an eih tuk nei leleng haw hi.
16 Topa i thutepmi Elijah i hilhnak bangin beel sung a, canghovam cu bo awng ma hi, palang sung a, situi vang bo awng ma hi.
17 Mahnung ten meivongnu i capa cu tina hi; luai dedeuhin nungdawlbel ten a haihawh bota hi.
18 A nu in Elijah lakah, “Pathian i mihing pa, ita ka humah hi tibang cu hengtik cim? Ka sualnakte Pathian theitikin, ka capa thitik tukin maw hilai ah na hun?” tin ti hi.
19 Elijah in, “Na capa cu hilai ah cawi hemin,” ti hi. Elijah in meivongnu i capa cu a nu i khut pen la in, a umnak humta khanah cawito in zaunak humah sial hi.
20 Elijah in, “Maw Topa ka Pathian, ita hi meivongnu i humah a pha ngawl zetmi bawl nge cim? Ka humah hehpihnak nei in, keimah cingkhawitu hi. Atu-in, a capa thitik ci!” tin nase zetin thungen hi.
21 Mah nungten Elijah cu mah naupang pa i humah vei thum bokin, “ Topa aw, ka Pathian, hi naupang pa hi nunglehtik zalin,” tin thungen hi.Ref 17:21 2Kum 4:34-35;
22 Topa in Elijah i thungetnak cu zain, naupangpa cu a haihawhto lehin, nungleh hi.
23 Elijah in, naupangpa cu nuaita khanah cawisuk lehin, a nu i lakah sanleh hi. “Zo in! Na capa nungleh zo,” ti hi.
24 A nu in, “Atu-in Pathian mihing ngangai hi ci a, na lak pen Topa cu awn tatak hi tih cu za zo ing,” ti hi.