16
1 Topa in Hanani capa profet Jehu lakah, Baasha hilh tukin hi bangin thu hilh hi.
2 “Leivul lak pen cawisangin ka mihing Israel tei kumpi in bawl ing. Mahnaven Jeroboam bangin Israel mite na lamhuai sual hangin ka thin a uktik ci.
3 Jeroboam hum a ka bawl zo bangin na humah bawlbok tung a, nangmah le na unaupihte cu vawk khawng tung hi.
4 Khuapi sungah a thi mi Baasha unaupih tei luang cu uico ten ei haw tuk hi. Ngam lakah a thi mitei luang cu mulukolh ten ei haw tuk hi,” ti hi.
5 Baasha i bawlmi dang hempoh le a ngalphatnak thute cu Israel Kumpi Tei Tangthu Laibu sungah sialsiah khawng haw hi.
6 Baasha cu thi in Tirzah ah vui haw hi. A capa Elah in kumpi dek hi.
7 Baasha le a unaupih tei hum a Topa i tamsiatnak awnkam a hentu cu profet Jehu hi. Baasha cu Topa i humah a sual hangin hiti bang tamsiatnak a humah heng hi. A masuan a, kumpi a dektu Jeroboam bangin Baasha vangin phatngawlnak a bawl bek sial ngawlin, Jeroboam le a unaupihte a thah khawng hangin Topa a thinuktik hi.
Israel Kumpi Elah
8 Judah kumpi Asa in ngam a uknak kum sawm nih le kum luk kumin, Baasha capa Elah cu Israel kumpi dekin, Tirzah pen kum nih sung uk hi.
9 Zimri cu a khutnuai bawipa khat, kumpi cipuhleng khenkhat hotu in suam hi. Kumpi cu a inncingtu tei hotu Arza innah zu cu a kham laihin,
10 Zimri cu tumin kumpi Elah a thah nungten amah in kumpi dek hi. Hi thu hi Judah kumpi Asa in ngam a uknak kum sawm nih le kum salih kumin, a piangmi hi.
11 Zimri in kumpi a deh bek ten Baasha i unaupih hempoh that khawng hi. A unaupih le a ngualcam pha pano hempoh vang that khawng hi.
12 Profet Jehu mangin Baasha hum a, Topa i awnkam a ummi bangin Baasha i innkuate cu Zimri in that khawng hi.
13 Baasha le a capa Elah in milim bia in, Israel mite a lamhuai sual hangin Israel Pathian Topa cu a thinuktik haw hi.
14 Elah i bawlmi dang hempoh cu Israel Kumpi Tei Khang Tangthu Laibu sungah sialsiah haw hi.
Israel Kumpi Zimri
15 Judah kumpi Asa i ngam uknak kum sawm nih le kum salih kumin, Tirzah khua pen Israel ngam cu Zimri in ni salih sung uk hi. Israel ngalkap ten Filistin ngam Gibbethon khuapi do in, a kil khawng ceng haw ten,
16 Zimri in, a kumpi haw cu suamin, a thah thu a zak haw ten mahlai kekah amuh hotu ngalbawi Omri cu Israel kumpi in bawl haw hi.
17 Omri le a ngalkap ten Gibbethon khua cu taisanin, Tirzah khua saw cu kim haw hi.
18 Zimri in, a ngal tei khutah a khuapi Tirzah heng zo hi tih amuh ten, a innsung ngal kulhtian sungta khanah tumin, kumpi inn cu mei tuah halin amah vang kang hum hi.
19 Hi bang lungkhamnak a tawhmi cu Topa i humah a sual hangin a suakmi hi. A ai-awhmi Jeroboam bangin amah vang sualin, Israel mite vang a sualtik khawng hangin Topa a lungkim ma hi.
20 Zimri i a bawlmi dang hempoh cu mi a suamnak thu tuah Israel Kumpi Tei Khang Tangthu Laibu sungah sialsiah haw hi.
Israel Kumpi Omri
21 Israel mite cu khen nihin khen haw; a khenkhatin, Ginath capa Tibni kumpi dektik nuam haw in, a khenkhat ten Omri lam tang haw hi.
22 A nung dawlbelin Omri lamtang ten neh haw hi. Tibni cu thi in, Omri kumpi dek hi.
23 Mah hangin Judah kumpi Asa in ngam a uknak kum sawm thum le kum khat kumin, Omri cu Israel kumpi dekin, Israel ngam kum sawm le kum nih sung uk hi. Amasa kum luk sung cu Tirzah khua pen uk hi.
24 Mah nungten Shemer tihmi pa i lak pen Samaria mual cu tangka thawng luk tuah lei hi. Omri in Samaria mual cu ngal kulhtian tiangin, mahlai ah khuapi toh hi. A mual neitu Shemer min suangin, mah khuapi min cu Samaria tin sa hi.
25 Tumasuanin kumpi a dektute sangin Omri cu Topa i humah sual saw laih hi.
26 Ama deh laih ngawlin kumpi a dektu Jeroboam bangin, a sual hangin le Israel mite milim biaknak le sualnak sungah a pui tum hangin Israel Pathian Topa a thinuktik hi.
27 Omri i bawlmi dang hempoh le a khansung a, na piangmite cu Israel Kumpi Tei Khang Tangthu Laibu sungah sialsiah haw hi.
28 Omri thi in Samaria ah vui haw hi. A capa Ahab in kumpi dek hi.
Israel Kumpi Ahab
29 Judah kumpi Asa in ngam a uknak kum sawm thum le kum liat kumin, Omri capa Ahab cu Israel kumpi dekin, Samaria khua pen kum sawm nih le kum nih sung uk hi.
30 Ama deh laih ngawlin kumpi a dektute sangin Topa i humah sual saw hi.
31 Kumpi Jeroboam bangin sualnak bawl cu tawk ti laih ngawlin, Sidon kumpi Ethbaal i canu Jezebel huai a, Baal pathian tianin bia hi.
32 Samaria khuapi ah Baal pathian biakinn sa in, biaklandawh bawl a, biakinn sungah Baal pathian koih hi.
33 Asherah pathiannu biaknak tukin zehsa tuahthing vang koih hi. Ama laihngawl Israel kumpi a dektu hempoh sangin amah pa khatin, Israel Pathian Topa cu a thinuktik saw laih hi.
34 Israel ngam a uk sungin Bethel khua mi Hiel in Jerikho khua cu tungdingleh hi. Nun i capa Joshua mangin Topa in, a hilh hamsa zo bangin Jerikho khua tundin lehnak a pat haw ten Hiel i capa upabel Abiram cu thi in, kongkhahte a bawl haw laihin, a capa nautabel Segub thi leleu hi.Ref 16:34 Josh 6:26;