15
Judah Kumpi Abijah
(2Khang 13:1-14:1)
1 Israel kumpi Jeroboam in ngam a uk kum sawm le kum liat kumin Abijah cu Judah kumpi dekin,
2 Jerusalem pen kum thum sung uk hi. A nu cu Absalom i canu Maakah hi.
3 A pa i bawlmi sualnakte bawl khawng bokin, a pu David bang hi ngawlin Abijah cu Topa a Pathian nelah muantak ma hi.
4 David hangin Jerusalem khua huptu tukin le ama nungten Jerusalem pen ngamuktu tukin Topa a Pathian in Abijah cu capa pa khat pia hi.Ref 15:4 1Kum 11:36;
5 Hit mi Uriah i thu bekah David humah Topa i lungkim ngawlnak um hi; thudangah David in Topa cu a lungdamtikin, a thupiakmi pa khat hei a el ngawl hangin hi bangin Abijah humah Topa i a nadehnak hi.Ref 15:5 2Sam 11:1-27;
6 Abijah in ngam a uksung hempoh ah Abijah le Jeroboam cu catngawlin dodun leleng haw hi.Ref 15:6 2Khang 13:3-21;
7 Abijah i bawlmi dangte cu Judah Kumpi Tei Khang Tangthu laibu sungah kimno in sialsiah haw hi.
8 Abijah a thih ten David khuapi ah vui haw hi. A capa Asa in kumpi dek hi.
Judah Kumpi Asa
(2Khang 15:16-16:6)
9 Israel kumpi Jeroboam in ngam a uknak kum sawm nih kumin Asa cu Judah kumpi dekin,
10 Jerusalem pen kum sawm li le kum khat sung uk hi. A pi cu Absalom i canu Maakah hi.
11 Asa in, a pu David bangin Topa i lungdamnak bawl hi.
12 A ngamsung haw a pathian a biaknak haw munte numei hihen, pano hihen numei pha ngawl hempoh cu ngamsung pen hawlvawk khawngin, ama laihngawl a, kumpi a dektu tei bawlmi milim hempoh cu vawk khawng hi.Ref 15:12 2Khang 15:8-15;
13 A pi Maakah vang leingam phatiktu pathiannu, Asherah zuk cu biak tukin a bawl hangin kumpi i nu dinmun pen vawk hi. Asa in mah milim zuk cu phukin, Kidron Ngun elah haal hi.
14 Asa in pathian dang a biaknak haw mun hempoh siatsuah khawng ma naven a nun sung hempoh ah Topa kihca in le muantakin um hi.
15 A pa i Pathian lak a, piakmi na hempoh cu Biakinn sungah koih hi; ama piakmi sui le ngun tuah bawlmi nadangte vang koih hi.
16 Judah kumpi Asa le Israel kumpi Baasha cu ngamuktu a hih sung haw hempoh ah catngawlin dodun leleng haw hi.
17 Tum khat cu Baasha in Judah ngam do in, Judah ngam pen a tum le a tulte kham khawng tumin, Ramah khua cu kulhtian tuah tiang hi.
18 Mah hangin kumpi Asa in Biakinn le kumpi inn a ummi sui le ngun hempoh cu la in, a khutnuai bawi tei khut pen Damaskas ah kuat hi. Hezion i tupa, Tabrimmon i capa Siria kumpi Benhadad lakah hi bangin thucah hi.
19 “A pa uhte a tankawm haw bangin ohte vang tangkhawm bok nung. Laksawngin hi sui le ngun hi kuat ing. Kumpi Baasha tuah tang langkhattu na hihnak uh cu phiat inna, ka ngamsung a koihmi a ngalkapte cu Baasha in samleh khawng tuk,” ti hi.
20 Asa i thucahmi cu kumpi Benhadad in lungkimin, a ngalbawite cu Israel ngam khua khenkhatte sim tukin hah hi. Ijon khua, Dan khua, Abel Beth Maakah khua, Galilee Tuipi el a, ngamte le Naftali ngam hempoh la haw hi.
21 Mah thu cu kumpi Baasha in, a zak ten Ramah khua kulhtian a tian lih cu cawlin, Tirzah khua ah kik hi.
22 Kumpi Asa in, Judah ngamsung hempoh ah thupia in, a ngamsung mihingte pa khat hei zam ngawlin sam a, Baasha in Ramah khua kulhtianin, a manmi suang le thingpekte cu thiak haw hi. Mah suang le thing tuah Asa in Mizpah le Benjamin ngamsung a ummi Geba khuadin hi.
23 Kumpi Asa i bawlmi dadang, a ngalphatnak thute le khuakulh a tiannak thute cu, Judah Kumpi Tei Khang Tangthu Laibu sungah kimno in sialsiah haw hi. Mahnaven a tek ten a ke na in, kebai in umta hi.
24 Asa cu thi in, David khuapi kumpi tei khanah vui haw hi. A capa Jehoshafat in kumpi dek hi.
Israel Kumpi Nadab
25 Judah kumpi Asa in ngam a uk sung kum nihnak ten kumpi Jeroboam i capa Nadab cu Israel kumpi dekin kum nih sung uk hi.
26 A pa bangin Topa i mai ah sualin, Israel mite cu sualnak sungah pui hi.
27 Issakhar nam Ahijah i capa Baasha in Nadab cu suamin, Nadab le a ngalkap ten Filistin ngam a, Gibbethon khuapi cu do in, a kim khawng haw laih takin Baasha in Nadab cu that hi.
28 Nadab a thah haw cu Judah kumpi Asa in ngam a uk sawng a kum thumnakin hi. Mahnung ten Baasha in Israel kumpi dek hi.
29 A ngei ngawlin Baasha in Jeroboam i innkua le unaupih hempoh that hi. Topa i sila Shiloh khua mi profet Ahijah lakah pia in, Topa i otmi bangin Jeroboam i unaupih hempoh cu thah khawng hi haw hi. Pa khat hei suakca haw ma hi.Ref 15:29 1Kum 14:10;
30 Hiti bangin a piannak cu Jeroboam in sualnak bawlin Israel vang sualnak sungah a pui hangin Israel Pathian Topa a thinuktik hang hi.
31 Nadab i bawlmi dangte cu Israel Kumpi Tei Khang Tangthu Laibu sungah kimno in sialsiah haw hi.
32 Judah kumpi Asa le Israel kumpi Baasha cu kumpi a hih sung haw hempoh catngawlin dodun leng haw hi.
Israel Kumpi Baasha
33 Judah kumpi Asa in, ngam a uk kum thum kumin, Ahijah i capa Baasha cu Israel kumpi dekin, Tirzah khua pen kum sawm nih le kum li sung uk hi.
34 Ama laih ngawlin kumpi a dektu Jeroboam bangin Topa i humah sualnak bawlin Israel mite vang sualnakah pui hi.