14
Jeroboam Capa Thihnak
1 Mah hunin Jeroboam i capa Abijah cu na hi.
2 Jeroboam in, a zi lakah, “Kua ma theih tuk ngawlin na melselin profet Ahijah umnak Shiloh khua ah hawhin hi. Israel kumpi hi tuk ci, tin, a hilhtu cu amah profet Ahijah hi.
3 Amah piak tukin cangho phil sawm, cangho em dawm le khuaihum langkhat cawi in hi. A capa uh itin um tuk him tih dong inna, amah in hilh tuk hi,” tin ti hi.
4 Mah hangin a zi cu Shiloh khua Ahijah innah hawh hi. Ahijah cu tekzet zo in, a mit vang thim zo hi.
5 A capa a nat hangin Jeroboam a lakah a hunnak tuk thu cu Pathian in hilh ham zo hi. Jeroboam zi lak a hilh tukmi thu vang hilh ham zo hi.
Jeroboam i zi cu hawh a, midang bangin a melselin, Ahijah lakah heng hi.
6 Mahnaven kongka el a hen cu Ahijah in, a zak ten, “Tumin hi. Jeroboam zi ci, thei leng ing. Ita midang bangin na um lih cu? Na humah thupha ngawl hilh tuk nei ing.
7 Kikleh inna, na pasal Jeroboam hilhin hi. Topa, Israel Pathian in, a lakah hi bangin ti hi. ‘Mipi tei sung pen nangmah cu ka miphun Israel mi uktu tukin teng ing.
8 Ngam uknak cu David casuan tei lak pen la in, nangmah pia ing. Mahnaven ka thu kimno in ngai in, ka thupiakmi zui in, ka lungkimmi bebek a bawltu ka sila David bang kha ma ci.
9 Nangma laihngawl a, ngamuktu kumpite sangin nase saw deuhin sual ci. Kei cu lawlin biak tukin milim le zukte na bawl hangin ka thinuktik zo ci. Kei cu na nunglamah vawk zo ci.
10 Mah hangin na uknak humah thil poimawh hengtik tung a, na casuan pano hempoh upa hihen, naupang hihen, thitik khawng tung hi. Na innsung le na unaupihte susia khawng tung a, ek a haal haw bangin a bo laklawh haal tung.Ref 14:10 1Kum 15:29;
11 Khuapi sung a, a thi mi na unau pih tei luang cu uico ten ei haw tuk hi; hampa lak a thi cu mulukolh ten ei haw tuk hi. Topa keimah in hilh zo ing,’ ti hi, ti in,” ti hi.
12 Ahijah in Jeroboam zi lakah, “Atu-in pinin hi. Khua na hen bek ten na capa uh cu thi tuk hi.
13 Israel mi hempoh ten kah haw tuk a, vui haw tuk hi. Jeroboam innkua sungah amah bek phano in vui mi hi tuk hi. Itahim titale ama humbekah Israel i Pathian Topa a lungdam hi.
14 Israel mi uktu tukin Topa in, kumpi dang pa khat koihin, amah in Jeroboam i uknak cu botik tuk hi.
15 Topa in Israel cu dantat tuk a, tui sung a, phaikung a hing bangin Israel cu hing leleng tuk hi. Topa in, a pi a pu tei lakah a piakmi hi ngampha le ngamnop pen Israel mite cu lengkektik tuk a, Eufrates Ngun ngalah lengkektik khawng tuk hi. Itahim titale pathiannu Asherah i zuk a bawl haw hangin Topa a thinuktik zo haw hi.
16 Topa in Israel cu nunghek tuk hi, itahim titale Jeroboam in sualnak bawlin Israel mite vang sualnak sungah pui khawng zo,” ti hi.
17 Jeroboam i zi cu tulin Tirzah ah pin hi. A inn a tum bek ten a capa haw cu thi hi.
18 Israel miten kahin vui haw hi. Topa in, a sila profet Ahijah lakah a hilh bangin kim hi.
Jeroboam Thihnak
19 Kumpi Jeroboam i bawlmi, ngal a donak le ngam a uknak thu cu Israel Kumpi Tei Tangthu Laibu sungah sialsiah khawng haw hi.
20 Jeroboam in kum sawm nih le kum nih sung kumpi dek hi. Mahnung ten thi in vui haw hi. Mahten a capa Nadab in kumpi dek hi.
Judah Kumpi Rehoboam
(2Khang 11:5-12:15)
21 Solomon capa Rehoboam cu kum sawm li le kum khat a kim ten Judah kumpi dek hi, Topa a biaknak haw tukin Topa amah in Israel ngam hempoh sung pen a tenmi Jerusalem khuapi pen kum sawm le kum salih sung uk hi. Rehoboam i nu cu Ammon mi Naamah hi.
22 Judah miten Topa i humah sualnak bawlin a pi le pu tei sualnak a bawlmi hempoh sangin Topa i thinuknak tam saw suaktik haw hi.
23 Pathian biaknak mun tampi bawl haw; a biak haw tukin mualhum le thingpi nuai ah zehsah suang phutin, zehsah thing vang phut haw hi.Ref 14:23 2Kum 17:9-10;
24 Mah pathian biaknak munah numei hihen, pano hihen numei pha ngawl um haw in, mahmi cu thildang hempoh sangin ningdelhhuaibel hi. Israel mite Kanaan ngamsung a tum haw laihin, Topa i Kanaan mi a hawlvawkmi ten ningdelhhuai le zahcakhuai a bawl haw mite cu Judah miten bawl khawng bok haw hi.Ref 14:24 Thuk 23:17;
25 Rehoboam in kumpi a deh kum nga a kim kumin, Izipt ngam kumpi Shishak in Jerusalem khua do in neh hi.Ref 14:25 2Khang 12:2-8;
26 Biakinn sung le kumpi innsung a, ummi na manpha hempoh, Solomon i bawlmi sui lumphaw tian la khawng hi.Ref 14:26 1Kum 10:16-17; 2Khang 9:15-16;
27 Mah a lakmi tei ai-in kumpi Rehoboam in daal ngal lumphaw bawlin mahte cu kumpi inncingtu bawi tei khutah koih hi.
28 Kumpipa Biakinn a hawh sialin inncingtu ten ngal lumphaw cu cawi haw in, mah nungten inncingtu khanah koihleh haw hi.
29 Kumpi Rehoboam i bawlmi dangte cu Judah Kumpi Tei Khang Tangthu Laibu sungah kimno in sialsiah khawng haw hi.
30 Kum hi zong sungah Rehoboam le Jeroboam cu catngawlin dodun leleng haw hi.
31 Rehoboam cu thi in, David khuapi kumpite a vuinak haw khanah vui haw hi. A nu cu Ammon mi Naaman hi. Mahten a capa Abijah in kumpi dek hi.