13
Bethel Biaklandawh Sia
1 Topa i thupiaknak bangin Judah ngam pen profet pa khat cu Bethel ah hawhin biakpiaknak bawl tukin biaklandawh mai a, Jeroboam a din laihtakin, na heng hi,
2 Topa i thupiaknak zui in, profet in biaklandawh cu tamsia in, “Maw, biaklandawh, biaklandawh, Topa in, hi bangin ti hi. Nauno pa khat, a min Josiah a tih haw mi cu David innkua sung pen suak tuk hi. Na hum a, biakpiaknak a bawltu Pathian biaknak biaklandawh a nadektu thiampite cu na hum pen that haw tuk hi. Na humah mihing nguh haal tuk hi,” ti hi.Ref 13:2 2Kum 23:15-16;
3 Mah nungten profet in betlehin, “Hi biaklandawh hi cim khawngin, a hum a vutte cu thehkeh khawng hi tuk hi. Tu a ka otmi hi Topa i awnkam hi tih thei tuk uh ci,” ti hi.
4 Mahmi cu kumpi Jeroboam in, a zak ten a khutzung tuah kawkin, “Hi pa khi na man un!” tin thupia hi. Kumpipa i khut cu thakhatin, ko in, khesukleh thei ma toh hi.
5 Biaklandawh cu cimin, biaklandawh hum a, vutte cu, Topa i minin profet pa i a hilh hamsa bangin leihumah thehkeh khawng hi.
6 kumpi Jeroboam in, “Hehpih inna, Topa na Pathian nelah ka khut damtikleh tukin thu ngetsak zalin hi,” tin profet pa cu ngen hi.
Profet pa in Topa i lakah thungenin kumpipa i khut cu damleh hi.
7 kumpipa in profet pa i lakah, “Ka innah hung inna, an ei tain, laksawng pia nuam ing hi,” tin ti hi.
8 Profet pa in, “Na neihmi hempoh i langkhen na pia hei in, na innah hung tuk mang hi. Na lakah imah ei le intuk mang.
9 Topa in imah ei tuk ngawlin thupia,” ti hi.
10 Mah hangin a hunnak lampi pen pinleh ngawlin lampi dang zui in pinleh hi.
Bethel Profet Putekpa
11 Mahlai in Bethel ah profet putek pa khat um hi. A lakah a capate hung haw a, Judah ngam profet in Bethel ah kumpi Jeroboam lakah a otmi le a nadehmi dangte hilh haw hi.
12 Profet putekpa in, “A kihlamin i lai lampi kaw a zui?” tin dong hi. Amuh ten a zui mi lampi cu hilh haw hi.
13 amah in, “Ka laak kung dapsak unna,” tin ti hi. A dap ceng haw ten a laak cu khungin,
14 Judah ngam profet pa i a kihlehnak lampi cu zui in hil hi. Sasua kungpi nuai ah a khun laihin pha hi. Judah ngam pen a hung Pathian mi hi a cim? tin dong hi.
“Hi ing,” tin don hi.
15 Amah in, “Ka innah hung inna, an ei in hi,” ti hi.
16 Mahnaven Judah ngam profet in, “Na innah zui thei tuk mang. Na lakah imah in le ei thei tuk mang.
17 Itahim titale Topa in imah ei le intuk ngawlin thupia a, ka hunnak lampi vang zui kikleh tuk ngawlin hilh hi,” ti hi.
18 Bethel a profet putekpa in, “Kei vang nangmah bang profet hi bok ing, ka innah zawm tukin vancungmi in hilh hi,” tin profet putekpa in zolthu son hi.
19 Mahti bangin a zop hangin Judah ngam Pathian mi in zui in profet putek lakah an ei hi.
20 Mahti bangin an a eih langkhat haw laih takin Topa i awnkam cu profet putek i lakah hengin,
21 a mikhual pa i lakah, “ Topa in, ka thu ngai ngawlin bawltikmi na bawl ngawl hangin le,
22 kiklehin ei tuk ngawl ka tihnak munah an na eih hangin nangmah cu thah hi tuk ci a, na luang cu na pi le pu tei khanah vui hi tukma hi,” ti hi, tin au li hi.
23 An a eih celh haw ten profet putekin, Judah ngam profet pa i ca tukin laakkung cu dapsakin hawh hi.
24 Lampi ah kiosa pa khat tawkin mah kiosa in pet hi. A luang cu lampi ah lumin, a laak le kiosa cu a elah ding haw hi.
25 Khualzin ten a luang le a el a, kiosa ding vang cu mu haw hi. Bethel ah hawhin, a muhnak haw bangin hilh haw hi.
26 Mah thu cu profet putekin, a zak ten, “Pathian thupiakmi a zui nuam ngawltu cu amah hi. A tepsa bangin Topa in kiosa hah a, kiosa in dawkin that hi!” ti hi.
27 a capa tei lakah, “Ka laakkung dapsak un,” tin ti hi. Dapsak haw in,
28 a hawh ten profet luang cu lampi ah lumin, a elah laak le kiosa a ding laihin, na mu hi. Kiosa in profet i luang cu ei ngawlin laak vang ei ma hi.
29 Profet putekin mah a luang cu a laak humah suangto in, kah tuk le vui tukin Bethel ah pua hi.
30 Amu innkua khanah vui haw in, amah le a capa ten, “Ai zaw! mi bawngsia unau pa aw,” tin kah haw hi.
31 A vui celh haw ten profet putekin, a capa tei lakah, “Ka thih ten hi khanah vui unna, ka nguh cu hi pa i nguh elah na koih un.
32 Topa i awnkam bangin Bethel a biaklandawh le Samaria khua tei biaknak mun tei humah lungkim ngawlnak a hilhmi hempoh cu a awn bangin kim khawngleh loli tuk,” ti hi.
Jeroboam i Sualnak Bel
33 Kumpi Jeroboam cu thil sual a bawlnak lampi pen kikleh cuang ngawlin masa bang lengin biaklandawh a tiannak munah nadektu tukin mi thawthong sung pen thiampi teng leleng hi. Akua hei hihen thiampi a dek nuamte cu sathau thih lualuam hi.
34 Mahti bangin a sual hangin ama hinnam sung pen Israel ngam uk leleng theihnak tuk cu siatsuah hi.