12
Saklam Hinnamte Ngal Tho
(2Khang 10:1-19)
1 Rehoboam cu amah kumpi dektik tukin Israel tei a tawhdun khawmnak haw Shekhem ah hawh hi.
2 Mah thu cu kumpi Solomon a lau hangin Izipt ngamah a taitu Nebat i capa Jeroboam lakah heng hi. Jeroboam cu Izipt ngam pen kikleh hi.
3 Israel miten amah cu zawmin, a venghawng haw a, kumpi Rehoboam lakah hawhin,
4 “Na pa Solomon in bawlsia in ka hum uhah bawmngitzet puatik hi. Hi ka bawmngit uhte zangtikin, nunnop deuhin, na bawl tuk ahi tale na nadektu hi tuk ung,” ti haw hi.
5 Rehoboam in, “Ni thum nungten hungleh unna, na thu uh cu hilhleh tung hi,” ti in pin hawta hi.
6 Rehoboam in, a pa i thu siampih putekte cu dongin “Hi Israel mipite hi itin kaw ka donleh tuk?” tin dong hi.
7 Amuh ten, “Hi mipite hi phano in uk na nuam ahi tale tuni in, a hum hawah phano in nadek inna, a nget haw bangin bawlsakin hi, mahten na humah muantakin nadektu hi leleng haw tuk hi,” tin ti haw hi.
8 Rehoboam in, a ngaihsutnak haw cu imah simsial kha ma hi. Amah tuah a khangto langkhat thu a siampih mek khangno tei lak saw ah hawhin,
9 “Na ngaihsutnak uh hilh hem un. ‘Na pa in ka hum uhah a koihmi bawmngit cu zangtik zalin’ tin, a ngentute hi itin kaw ka donleh tuk?” tin dong hi.
10 Amuh ten, “Ka khutme hi ka pa i tai sangin ngeng saw hi!
11 Ka pa in, na bawm uh ngittik; kei vangin ngit dedeuhtik tung. Ka pa in thingkang tuah vat, kei in aikam tuah bawlsia tung, ti in hi,” tin ti haw hi.
12 A tep bangin ni thum nungten Jeroboam le Israel mite cu kumpi Rehoboam lakah hung haw hi.
13 Rehoboam in zawtnek hi. Putek tei ngaihsutnak piakmi cu la ngawlin,
14 a ngualcam khangno tei ngaihsutnak piakmi saw la in, “Ka pa in, na bawm uh ngittik; kei vangin ngit dedeuhtik tung. Ka pa in thingkang tuah vat; kei in aikam tuah bawlsia tung,” ti hi.
15 Rehoboam in Israel tei ngetmi a elnak cu Topa i sohnak hang hi. Profet Ahijah mangin, Jeroboam lakah thu a tepzomi kimtiknak tukin hi.
16 Kumpipa in, a ngetmi haw imah simsial ma tih cu Israel mipi ten a zak haw ten au haw a; “David le a innkua tei lak pen i covo kaw a neih uh? A hum uhah a phatnak ino bek bawlmi nei awng haw maw? Israel mite, na inn uhah pin khawng un, Rehoboam cu amahno in, um lita poh hen,” ti haw hi.Ref 12:16 2Sam 20:1;
Israel mipite cu ngal tho haw a,
17 Rehoboam cu Judah ngamsung a ummi hinnam bek uktu kumpi in suak hi.
18 Rehoboam in, a zazal nadehtikmi tei hotu Adoniram cu Israel tei lakah hah hi; mahnaven Israel miten Adoniram cu suang tuah sep hum haw hi. Mahceng bek ten Rehoboam cu a cipuhleng khung a, manlang zetin Jerusalem ah tai hi.
19 Mah pepanin Israel ngam tihmi saklam ngam ten David casuan tei ngam uknak cu langpang leleng haw hi.
20 Israel mipi ten Izipt ngam pen Jeroboam kikleh zo hi tih a zak haw ten mipi tei tawhdun khawmnakah zawmin, amah cu Israel kumpi in bawl haw hi. Judah hinnamte bek David casuan tei nadektu tukin tang haw hi.
21 Rehoboam cu Jerusalem khuapi a hen ten, ten cikcekmi ngalkap thawng za khat le thawng sawm liat, Judah hinnam le Benjamin hinnam sung pen samkhawmin, saklam ngam Israel hinnam dang ngamte laleh tukin tum hi.
22 Mahnaven Pathian in profet Shemaiah cu,
23 Judah kumpi Rehoboam lakah hahin, Rehoboam le Judah hinnam le Benjamin hinnamte thuhilhtik hi.
24 Hawhin, a lak hawah, “ Topa in, na unau Israel mite cu do pahsuh un! Na venghawng uhin, innah pin khawng un. Itahim titale hi bangin thu a umnak cu keima bawlmi ti pah cuh,” tin hilh hi. Topa i thupiakmi cu ngai haw in, a innah pin khawng haw hi.
Pathian Lak Pen Jeroboam Lampial
25 Israel kumpi Jeroboam in Efraim mualhum ngam a, um Shekhem khuapi cu kulhtian tiangin mahlai ah hun demno sung um hi. Mahnung ten mahlai pen tulin Penuel khuapi kulhtian tiangleh hi.
26-27 A lungmu sungin, “Tu bang lelengin ka mihingte Jerusalem Biakinn ah hawhin, Topa i lakah biakpiaknak a bawl leleng haw tale, a lungmu haw cu Judah kumpi Rehoboam lamah hekin, kei cu thatleh haw tuk hi,” tin ngaisung hi.
28 Ngeithim a ngaihsut nungten, sui tuah khuicang zuk pa nih bawlin a mihing tei lakah, “Pathian bia tukin Jerusalem na hawh uh hi ngei zo hi. Maw Israel mite, Izipt ngam pen nangmuh a suahtu pathiante cu hilai ah um haw hi.”Ref 12:28 Suah 32:4;
29 Mah khuicang zuk pa khat cu Bethel ah koihin, adang pa khat cu Dan ah koih hi.
30 Israel mite cu sui khuicang zuk bia tukin Bethel le Dan ah hawh haw a, misualin suak hawta hi.
31 Jeroboam in pathian biaknak mun vang mualbawk tihkimah bawlin Levi hinnam ahi ngawlmi tei sung pen thiampi tuk teng hi.
32 Mah hum pen, Jeroboam in Judah ngam a biaknak puai a, um bangin ha liat ha, ni sawm li le ni nga ni-in biaknak puai pa khat pan bok hi. Bethel a sui khuicang zuk a koihnak biaklandawh humah Jeroboam in biakpiaknakte bawlin a pathian haw biaknak tukin a tenmi thiampite koih hi.Ref 12:32-33 Thiam 23:33-34;
33 Amah in, Israel tei ca tukin a tawpatmi puai, ama tekmi ni ha liat ha, ni sawm le ni nga ni-in Bethel ah hawhin, puai bawlin biaklandawh humah biakpiaknak bawl hi.