11
Pathian Lak Pen Solomon Lampial
1 Kumpi Solomon in ngamdang numei tampi deih hi. Izipt kumpi canu a huai i humah, Hit numei, Moab numei, Ammon numei, Edom numei le Sidon numei huai hi.Ref 11:1 Thuk 17:17;
2 Israel miten pathian dangte bia sual haw tuk tih a lau hangin, ngamdang mite huai tuk ngawlin Israel mite cu Pathian in thupia naven, Solomon in mah miphun numeite cu huai leleng hi.Ref 11:2 Suah 34:16; Thuk 7:3-4;
3 Solomon in zi za salih nei in, a venghawng haw in kumpi phun ngeh haw hi. Mah hum pen zineu za thum nei bok hi. Mah a zi ten Solomon cu Pathian lak pen lampialtik haw in,
4 putek a hih nungten ngamdang pathian biaknak lamah pui ngah hawta hi. A pa David bang hi ngawlin Solomon cu a lungmu pathian dadang tei lak zuanin Topa a Pathian mai ah muantak ma hi.
5 Sidon mitei pathiannu Astarte bia in, Ammon mitei ningdelhhuai pathian Milkom vang bia hi.
6 Topa i humah sualin, thilpha ngawl bawl hi, a pa David bangin Pathian mai ah komno in nungma hi.
7 Jerusalem pen nisuahnak lam mualhumah Moab mitei ningdelhhuai pathian Khemosh biaknak tukin mun pa khat bawlin Ammon mitei ningdelhhuai pathian Molek biaknak tuk hei in mun pa khat bawlbok hi.
8 Ngamdangmi a zi haw ten namtui haal haw in, a pathian haw i lak a, biakpiaknak a piak theihnak tukin biakpiaknak mun tampi bawl haw hi.
9-10 Israel i Pathian Topa cu Solomon lakah vei nih langin ngamdang pathian bia tuk ngawlin thupia naven, Topa i thu cu Solomon in ngai cuang ngawlin a lampi pen pial hi. Mah hangin Topa cu Solomon humah a thinukin,
11 a lakah, “Ka lak a na thutepmi cu tumhimnak tuah siatsuahin ka thupiakmi vang na zui ngawl hangin hitin hilh ing hi; na ngam uknak cu la tung a, na khutnuai bawipa kha khat lakah pia tung hi.
12 Na pa David i hangin mahmi cu na nun sungah bawl tuk mang. Na capa i khanah bawl tung hi.
13 A uknak a venghawngin laksak tuk mang. Ka sila David le kata in ka bawl zo mi Jerusalem khuapi i hangin a lakah hinnam pa kha khat cu zam tung,” ti hi.
Solomon Ngalte
14 Topa in Edom kumpi i unaupih Hadad cu Solomon dotik hi.
15-16 David in Edom ngam a neh laihin, a ngalkapte hotu Joab cu Edom ngam a, mithi tei luang vui tukin hawh hi. Mahlai in Joab le a ngalkapte cu Edom ngamah ha luk um haw hi. Mah sung pen Edom mi pano hempoh cu,
17 Hadad le a pai umlawh khenkhatte sialngawl that khawng haw hi. Hadad le a pa i umlawhte cu Izipt ngamah tai haw in, mah laihin Hadad cu naupangno laih hi.
18 Midian pen tulin Paran ah hawh haw hi. Mahlai pen pano khenkhat ten beet haw in, mahten Izipt ngamah heng haw hi. Izipt kumpi lakah hawh haw in, Izipt kumpipa in Hadad cu leingam le inn le an eih tuk pia hi.
19 Hadad in Izipt kumpi i lungkimnak a co hangin ngualcam pha zetin suak haw hi. Mah hangin kumpipa in, a zi Tahpenes i unaupih cu a zi tukin Hadad pia hi.
20 A zi tuah Genubath tihmi capa nei haw in, kumpinu in kumpi innah cawmin, kumpi capate tuah khang langkhat haw hi.
21 Izipt ngam a umnak pen Hadad in David cu thi zo in, David i ngalkap hotu Joab vang thi zo tih thuthang a zak ten Izipt kumpi lakah hawhin, “Ka khua le ka ngamah kiktik tohin hi,” tin ngen hi.
22 Izipt kumpi in, “Ita kik nuam kam, Na deihmi ka piak theih ngawl hangin maw a kik tuk na nuam,” tin dong hi. Hadad in, “Imah ma poh vei, hawhtik hihim pohin,” ti hi.
Hadad cu Edom kumpi ah suakin mipha ngawl a hih hangin Israel tei ngal lauhuaibelin suak hi.
23 Mah hum pen Eliada i capa Rezon vang Topa in Solomon langpangtu in bawl hi. Rezon cu a bawipa Zobah kumpi Hadadezer lak pen tai in,
24 mipha ngawl ngalthotu tei hotu in suak hi. Hi cu David in Hadadezer nehin, Hadadezer lam tangtu Siria ngalkapte a thah khawng nungten a piangmi thu hi. Rezon le a hotute cu hawh haw in, Damaskas khua ah um haw hi. Mahlai ah amah cu a mihing ten Siria kumpi in bawl haw hi.
25 Solomon nunsung hempoh ah Rezon cu Israel tei ngal pa khatin suak hi.
Jeroboam Nelah Pathian Thutiam
26 Solomon a langpangtu pa khat cu Efraim ngam Zeredah khua a Nebat capa Jeroboam hi. A nu cu meivong hi in, a min cu Zeruah hi.
27 A ngaldunnak haw cu hi tih hin hi.
Solomon in Jerusalem pen nisuahnak lamah leidipin, Millo khua satin, khuapi, kulhtian vang lem pepel hi.
28 Mahlai in Jeroboam cu tangval ngilzet hi in, a nadeh kom daan cu Solomon in, amuh ten Manasseh le Efraim hinnam tei umnak ngam sungah a zazalin nadek a cialmite hotu in koih hi.
29 Ni khat cu Jeroboam Jerusalem pen tulin amah bek a hawhlih laihin lampi lak pen Shiloh khua profet Ahijah in tawk hi. Ahijah cu angki cualpi thak silhin hung hi.
30 Mah a angki cualpi thak cu dukin, khen sawm le khen nihin, a bawhkek nungten,
31 Jeroboam lakah, “Nangmata tukin khen sawm la in hi. Itahim titale Topa Israel Pathian in, na lakah, ‘Ngam uknak cu Solomon khutsung pen la tung a, na lakah hinnam nam sawm pia tung hi.
32 Ka sila David hangin le Israel ngam buppi sung pen kata hi tukin ka tenmi Jerusalem khuapi hangin Solomon in hinnam nam khat cu co bok tuk hi.
33 Solomon in keimah lawlin Sidon pathiannu Astarte, Moab pathian Khemosh le Ammon mitei pathian Milkom a biak hangin a humah hi bangin ka bawl tumnak hi. Solomon in ka thungai ma hi. Thil sual bawlin ka daan le ka thupiakmite cu a pa David bangin zui ma hi.
34 A ngam buppi in sut tuk mang. Ka tenmi, ka daan le ka thupiakte a zuitu ka sila David hangin Solomon cu a nunsung hempoh ah thuneitu hitik tung.
35 Solomon i capa khan pen a ngam cu sut tung a, na lakah hinnam nam sawm pia tung hi.
36 Solomon i capa cu hinnam nam khat cotik bok tung a, mahten ka min samnak tukin ka tensami Jerusalem khuapi ah ka sila David i casuan pa kha khat bek cu ngamuktu in koih tung hi.
37 Nangmah Jeroboam cu Israel kumpi in bawl tung a, ngam na deihzahin uk tuk uh ci.
38 Ka sila David bangin ka thungai in ka daan piakmi tuah nungin, ka thupiakmi zui a, ka lung na kimtik ahi tale na lakah um leleng tung a, David bangin nangmah cu Israel kumpi in bawl tung; na casuante vang nangma nungten kumpi in bawl ngut tung hi.
39 Solomon i sualnak hangin David i casuan tei humah bawlsiatnak hengtik tung, mahnaven kumkhua in hi tukma hi,’ ti hi,” tin hilh hi.
40 Solomon in Jeroboam cu thah tum naven Izipt kumpi Shishak lakah tai in mahlai ah Solomon i thih laklawh um hi.
Solomon Thihnak
(2Khang 9:29-31)
41 Solomon i nadehnak le a thu le la dangte le a cihnak thute cu Solomon Tangthu Laibu sungah sialsiah khawng haw hi.
42 Jerusalem pen Israel ngam buppi kum sawm li sung uk hi.
43 Thi in, Jerusalem ah vui haw hi. Mahten a capa Rehoboam in kumpi dek hi.