24
Joshua In Shekhem Ah Thuhilh
1 Joshua in Israel mite cu a venghawng haw in Shekhem ah sam khawng hi. Upa, hotu le bawi a venghawng haw in samin Pathian maiah suak ten haw hi.
2 Joshua in, a lak hawah, “Israel tei Pathian Topa in, na lak uhah, ‘Tanglaih cawngin, na pu le pa uhte cu Eufrates ngun ngal lamah um haw in, pathian dadang bia haw hi. Mah na pu le pa lak pen pa khat cu Abraham, le Nahor i pa Terah hi.Ref 24:2 Pian 11:27;
3 Eufrates ngun ngal pen Abraham cu la in Kanaan ngam khua hempoh ah pui ing. Casuan tampi vang pia ing. A capa Isaak pia ing a,Ref 24:3 Pian 12:1-9; 21:1-3;
4 Isaak lakah Jakob le Esau pia ing. Seir tihmi mualhum ngam cu a co tukin Esau pia ing, mahten Jakob le a cate cu Izipt ngamah hawh haw hi.Ref 24:4 Pian 25:24-26; 36:8; 46:1-7; Daan 2:5;
5 Moses le Aaron samin Izipt ngamah siatnak tampi hengtik ing. Mah nungten na venghawng uhin puitul ing.Ref 24:5 Suah 3:1-12:42;
6 Na pu le pa uhte cu Izipt ngam pen puitul ing a Tuipi San heng haw hi. Izipt miten a cipuhleng haw le cipuh hum khung ngalkap tuah hil haw hi.Ref 24:6-7 Suah 14:1-31;
7 Haksa thuak amthongin Israel miten ka lakah a au haw ten amuh le Izipt mitei laklawhah khuathim koih ing. Izipt mitei humah tuipi hungtikin, tui in khuh khawng hi. Izipt mitei hum a, ka bawlmite na mit uhin mu uh ci.
“Phillawnah hun ngeipi um uh ci.
8 Jordan ngun pen nisuahnak lam a um Amor tei ngamah henpih ing. Do haw naven, nehnak cu na lak uhah pia ing. A ngam haw la uh ci, na hawhnak hempoh uhah amuh cu siatsuah pepel ing.Ref 24:8 Mipum 21:21-35;
9 Zippor i capa Moab kumpipa Balak in Israel mite do hi. Mah hum pen Beor i capa Balaam lakah nangmuh tam tukin thucah hi.Ref 24:9-10 Mipum 22:1-24:25;
10 Mahnaven Balaam i thu cu ngai mang; muicu thupha saw pia a mahten, Balak i huham sung pen nohte cu luattik ing.
11 Jordan ngun cu kaltanin Jerikho khua ah heng uh ci. Jerikho khua mite bek hi ngawlin Amor mi, Periz mi, Kanaan mi, Hitmi mi, Girgash mi, Hiv mi le Jebus miten do haw hi. A venghawng haw humah nehnak nohte pia ing.Ref 24:11 Josh 3:14-17; 6:1-21;
12 Thinsuknak le launak na mai uhah hahin, Amor kumpi pa nih cu hawlvawk hi; na ngalnam le na thalcang tei cahnak tel ma hi.Ref 24:12 Suah 23:28; Daan 7:20;
13 Na deh awng uh ngawlmi lo ngam pia ing, na sak awng uh ngawl mi khuapi ah um uh ci, na cin awng uh ngawlmi sabit ngui pen sabit ei in, na phut awng uh ngawlmi olif kung pen olif ngah ei uh ci,’ ti hi.Ref 24:13 Daan 6:10-11;
14 “Atu-in, Topa cu upat maizahnak tuah bia unna, a na cu muantakzet le lungthiang zetin dek un. Na pu le pa uhten Mesopotamia ngam le Izipt ngam pen a biak haw mi pathian dangte cu zamsan toh unna, Topa na bek dek un.
15 Topa i na nadeh nuam uh ma tale, tuni in teng un; Mesopotamia ngam na pu le pa tei biakmi pathian maw na biak tuk uh; mahma tale atu na umnak ngam a neitu Amor mitei pathian kaw na biak tuk uh, teng un. Kei le ka innkua hawng uhin Topa i na bek dek tuk ung,” ti hi.
16 Israel miten “ Topa taisanin pathian dang biak tuk cu tum awng tukma ung,
17 Topa a Pathian uhin, a pu le pa uhte hihen, eimuh hihen, Izipt ngamsung saltannak pen suahtulin, na lamdang a bawl mite mu zo ung hi. Miphun tampi lakah hawhin, a hawhnak hempoh uhah amah in cing hi.
18 Mailam a hawh pepelnak uhah vangin Topa amah lelengin, hi ngamsung a um miphun le Amor mite cu hawlvawk khawng hi. Mah hangin ohte vang Topa bia bok tuk ung hi. Amah cu a Pathian uh hi,” tin ti haw hi.
19 Joshua in, a lak hawah, “ Topa i na cu dek thei sap tukma uh ci; itahim titale amah cu a thiangthomi Pathian le micing thei Pathian hi. Na khelhnak uh le na sualnak uhte ngaidam tukma hi.
20 Topa in taisanin, ngamdang pathian na bia uh tale na hum uhah hun ngeipi a pha zo toh vangin amah in nohte cu ngal tuk a, bawlsia in, siatsuah khawng tuk,” ti hi.
21 Israel miten Joshua lakah, “Mah kha ma hi, Topa bek bia tuk ung,” tin ti haw hi.
22 Joshua in amuh tei lakah, “Ama nadeh tumin Topa na ten uh thu a theitu cu nangmuh lala hi uh ci,” ti hi.
Amuh ten “Hi zuh hi, keimuh hi theihpihtu ung hi,” ti haw hi.
23 Joshua in, “Mah ahi tale na lak uh a ummi ngamdang pathian cu vawk khawng toh unna, Israel i Pathian Topa i lakah na lungmu uh pia khawng un,” ti hi.
24 Israel mipi ten, “ Topa ka Pathian uh bia in, ama thupiakmi zui tuk ung,” tin ti haw hi.
25 Mah hangin Joshua in mah ni a, thutepnak cu Israel tei ca in bawlin Shekhem ah daan le a zui haw tukte pia hi.
26 Mah daan cu Joshua in Pathian i piakmi Daan laibu sungah ngan hi. Joshua in suang ngengpi la in, Pathian i mun thiangtho sasua kung nuai ah phut hi.
27 Joshua in, “Hi suangphut hi zo un! A laklawh uh a, thu theihpihtu hi tuk hi. Topa in, a lak uhah a hilhmi thu hempoh cu hi suangphutin thei khawng hi. Mah hangin na Pathian uh dodalin ngal na thawh ngawlnak tukin thu theihpihtu hi tuk,” ti hi.
28 Mipi cu Joshua in pintikin, amu co mi ngam tekah pin haw hi.
Joshua le Eleazar Thi Haw
(Thukhen 2:6-10)
29 Mah nungten Nun i capa Joshua, Topa i nadektu pa cu kum za le kum sawmin thi hi.
30 Gaash mual pen saklam, Efraim mualhum ngam a um ama ngamsung Timnath Serah ah vui haw hi.Ref 24:30 Josh 19:49-50;
31 Joshua i nun sung hempoh Israel miten Topa bia haw in, a thih nung hei ten Israel tei ca in Topa i na bawlmi a thei khawngtu Israel hotu ten a nun sung haw in, Topa leleng bia haw hi.
32 Izipt ngam pen Israel miten a ken haw mi Josef i nguh cu Shekhem ah vui haw hi. Mah a vuinak haw mun cu Shekhem i pa Hamor casuan pen Jakob in ngun tangka za khatin, a lei mi hi. Josef casuan ten lo in, a co haw mi hi.Ref 24:32 Pian 33:19; 50:24-25; Suah 13:19; Jn 4:5; Nung 7:16;
33 Aaron i capa Eleazar thi in, Efraim mualhum ngam a um, a capa Finehas a piak haw mi Gibeah khua ah vui haw hi.