23
Joshua i Thucahmi
1 Topa in, a elkim a um tei lak pen Israel tei lakah lungmuannak a piak ceng ten Joshua cu tekzet toh hi.
2 Israel mi hempoh a upa, lam pui tute, thuson tute le a bawi tuah samin, “Kei hi tekzet toh ing.
3 Topa na Pathian uhin nangmu hangin hi ngam a ummi miphun tei humah a bawlmi cu mu khawng zo uh ci. Ngal na do uhten Topa na Pathian uh cu nangmu lamah tang hi.
4 Ngal a neh uh laih ngawlmi miphun hihen, a neh zo uhmi nisuahnak lamah Jordan pen nitumnak lamah Mediterranean tuipi tian a ummi miphun hihen, nangmu co tukin pia zo ing.
5 Topa na Pathian uhin hi miphun cu na mai uh pen hil tuk a, tai pia pel haw tuk hi. Topa na Pathian uh i tepmi bangin a ngam haw cu luahtum tuk uh ci.
6 Mah hangin cingcai zetin um unna, Moses i piakmi Daan laibu sung a ngatmi bangin bawl unna, zui un. Veilamah hei hihen, taklamah hei hihen dawm hei pial pahsuh un,
7 nangmu lakah a tang laihmi hi ngam mihingte tuah cokheldun pahsuh un; a pathian min haw lo pahsuh un, a min haw lo in, siatcamnak hei bawl pahsuh un, a na haw hei dek pahsuh unna, a mai hawah na lu uh hei kun hihim pahsuh un.
8 Tuni tian Topa i muantakin, na um uh bangin um leleng un.
9 Topa in, a ngilmi le a ngengzet mi miphun cu na hawhnak tuk uh ngam pen hawlvawkin, nangmuh do theitu tuk kuamah um haw ma laih hi.
10 A tepsa bangin nangmuh panin Topa na Pathian uhin, a do hangin mi pa khatin, na ngal uhte thawng khat hawlvawk thei uh ci.Ref 23:10 Daan 3:22; 32:30;
11 Topa na Pathian uh bek it tukin cingcai zetin nung un.
12 Thu ngai ngawlin na lak uh a, a tangmi miphunte pawlkomin amuh tuah na huai uh tale,
13 Topa na Pathian uhin hi miphun cu hawlvawk tukma toh hi, tih cu tu pepan thei ham un. Nangmu ca in dup siahmi le thang bangin lauhuai tuk hi, mahten na ngum uh pen ngolh tuah vah bangin le na mitsung uh a ling um bangin thuak tuk uh ci. Topa na Pathian uhin, a piakmi hi ngampha mun pen na lalthong khawng uh tian mahti bangin thuak tuk uh ci.
14 “Kei cu thi pal tung hi. Topa na Pathian uhin thilpha a tepsa mi hempoh cu a venghawngin cangkim zetin kimtik khawng zo hi, tih cu na lungmu venghawngin, na theih cikcek uhmi hi. A tepmi hempoh cu kimtik khawng zo hi, pa khatno hei khial haw ma hi.
15 Topa na Pathian uhin bawlsuak tukin a tepmi hempoh cu bawl khawng zo hi. Mahnaven, na hum uh a thilpha a bawltu Pathian in, a thu na zui uh ma tale na hum uhah thilpha ngawl hengtik tuk hi.
16 Topa na Pathian uhin zui tuk hi, tin a thupiakmi cu zui ngawlin pathian dang zui in, na bia saw uh ahi tale na hum uhah thinukzet tuk a, a piaksa hih ngamphaah pa khat hei tang ngawlin bo khawng tuk uh ci,” ti hi.