THUKHENTUTE
Laibu
(The Book of Judges)
Thulamsial
Thukhentute laibu sungah Kanaan ngam a lak haw pen kumpi a neih theih haw lak lawh sung Israel tei daan a neih theih haw laih ngawl sung tangthu um hi. Hi tangthu cu a ngamsung haw a ngalpha “Thukhentute” tin, a sap haw mi lak pen theih tam deuhmi pa cu Samson hi. A na dehnak cu a ngeng 13-26 ah um hi. Hi laibu sung a zilhbelmi thu pa khat cu: Israel mite hi a nun theih hawnak tukin Pathian muan kul, Pathian humah muantak ngawlin a um haw tale siatnak tawk haw tih thu hi. Mahnaven mah sangin, a thupi deuh mi cu a Pathian haw humah muantak ngawlin umin siatnak a tawh nung haw hei ten Pathian in, a mihingte cu sual a sik haw tale ngaithiamin patnak a ngah theih hawnak tukin ngalling sa in um hi, tihmi thu hi.
1
Judah le Simeon Ten Adonibezek Man
1 Joshua a thih nungten Israel miten, Topa “Kei mu lak pen a koi hinnam kaw hawh masabelin Kanaan mite a do tuk?” tin dong haw hi.
2 Topa in, “Judah hinnam ten do masabel haw hen. A lak hawah hi ngam cu pia zo ing,” ti hi.
3 Judah miten, Simeon mitei lakah, “Kei muh tuah Topa i sepmi ngamah hawh bok unna, Kanaan mite cu do kawmin, mah nungten a sep haw mi ngamah hawhleh nung,” tin zawm haw hi. Mah hangin Simeon hinnam le
4 Judah hinnam cu ngaldo kawm haw hi. Topa in, a hum hawah Kanaan mite le Periz mite cu a khut sungah pia in, Bezek ah thawng sawm that haw hi.
5 Bezek ah Adonibezek umin, do haw hi. Kanaan mi le Periz mite cu neh haw hi.
6 Adonibezek cu tai hi; mahnaven hilin, a mat nung haw ten a khutpi le kepi talhsak haw hi.
7 Adonibezek in, “A khutpi le a kepi talh khawngmi kumpi sawm salihin ka cabuai nuai a an thial cak khul haw hi. A hum haw a ka bawl bangin Pathian in ka humah bawl,” ti hi. Amah cu Jerusalem khua ah hawhpih haw in mahlaiah thi hi.
Judah Hinnam Ten Jerusalem le Hebron Neh
8 Judah hinnam ten Jerusalem cu simin la haw hi. Khua sung mite a thah khawng ceng haw ten a khua cu mei tuah haal haw hi.
9 Mahnung ten mualhum ngam, Negev ngam le munlawn a um, Kanaan mite do tukin hawh haw hi.
10 Judah hinnam ten masa laih a Kiriath Arba khuapi a tih haw mi Hebron khua sung a um, Kanaan mite cu do haw in, Sheshai, Ahiman le Talmai neh haw hi.
Othniel In Debir Khuapi Neh
(Josh 15:13-19)
11 Mahlai mun pen Judah ten Debir khuate do tukin hawh haw hi. Debir khua cu amasa in Kiriath Sefer a tih haw mi hi.
12 Amu lak pen mi pa khat Kaleb in, “Kiriath Sefer a nehtu cu ka canu Aksah pia tung,” ti hi.
13 Kaleb i naupa Kenez i capa Othniel in Debir khuapi a neh hangin, Kaleb in, a canu Aksah cu a zi tukin pia hi.
14 A huaidun ceng haw ten Othniel in, a zi cu a pa i lakah lo pa khat ngentik hi. Kaleb lakah hawhin, a Laak hum pen a tolh ten a pa in, “Ikaw na kin?” tin dong hi.
15 Aksah in, “Nget nop nei ing hi, Negeb ngam ko munah na umtik hangin tuikhuk kul ka hih uhten hehpih zalin,” tin ngen hi. Kaleb in tuikhuk le ciktui nungte cu pia hi.
Judah le Benjamin Hinnam Tei Nehmi
16 Moses i sungpa Ken i casuante cu Judah mite tuah Ung kung khuapi a tih haw mi Jerikho pen Judah ngam Arad hanglam a um, ngamko mun lamah hawh haw in, mahlai a Amalek mitei lakah um haw hi.
17 Judah mite cu Simeon tuah hawh haw a, Zefath khua a um Kanaan mite cu nehin that khawng haw hi. A khua a siatsuah khawng ceng haw ten Hormah tin minsaleh haw hi.
18 Gaza khua, Ashkelon khua le Ekron khua vang la haw hi.
19 Topa in Judah mite a bop hangin mualhum ngam vang la khawng haw naven, munlawn a umte cu thik cipuhleng a neih haw hangin neh thei haw ma hi.
20 Moses i thupiakmi bangin Hebron cu Kaleb lakah pia hi. Kaleb in Anak i capa pa thum cu Hebron pen hawlvawk hi.Ref 1:20 Josh 15:13-14;
21 Mahnaven Benjamin hinnam ten Jerusalem a um Jebus mite cu a hawlvawk haw ngawl hangin Jebus mite le Benjamin hinnamte cu Jerusalem ah tusun tian um langkhat haw hi.Ref 1:21 Josh 15:63; 2Sam 5:6; 1Khang 11:4;
Efraim le Manasseh Hinnam Ten Bethel Neh
22-23 Josef hinnam Efraim le Manasseh hinnam ten Luz tin, a sam haw mi Bethel khuapi cu do haw hi. Topa in amuhte cu bawm hi. Bethel khuapi ah vilvengtu hah haw a,
24 khuasung pen mi pa khat tul mu in, a lakah, “Hi khuapi sung tum theihnak hilhin hi, imah tin bawl tukma ung,” tin ti haw hi.
25 A dot haw pa in hilhin, a hilh ceng ten Josef hinnam ten Bethel khua sungmi hempoh that khawng haw hi. Mahnaven, mah a hilhmipa le a innkua cu khawih haw hi.
26 Mahpa cu Hit mitei ngamah hawhin, khuapi pa khat satin, Luz tin sam hi. Tusun tian mah khua min cu Luz ti haw hi.
Hawlvawk Ngawlmite
27 Manasseh hinnam ten Bethshan khua, Taanak khua, Dor khua, Ibleam khua, Megiddo khua le a elkim a um khuano tei lak a ummi Kanaan mite cu hawlvawk haw ma hi. Tutianin mah khua ah um haw laih.Ref 1:27-28 Josh 17:11-13;
28 Israel mite a cah dedeuh haw ten Kanaan mite cu na dektik lo haw naven hawlvawk haw ma hi.
29 Efraim hinnam ten Gezer khuapi a um, Kanaan mite a hawlvawk khawng haw ngawl hangin tuni tian mahlaiah um haw laih hi.Ref 1:29 Josh 16:10;
30 Zebulun hinnam ten Kitron le Nahalol khuapi a ummi Kanaan mite a hawlvawk khawng haw ngawl hangin tuni tianin um haw laih hi. Zebulun hinnam tei nadehsaktu in um haw hi.
31 Asher hinnam ten Akko khua, Sidon khua, Ahlab khua, Akzib khua, Helbah khua, Afek khua le Rehob khuapi a um Kanaan mite cu hawlvawk khawng haw ma hi.
32 A hawlvawk khawng haw ngawl hangin mahlaiah Asher mi le Kanaan mite um langkhat haw hi.
33 Naftali hinnam ten Benjamin Shemesh le Bethanath khuapi a um Kanaan mite a hawlvawk khawng haw ngawl hangin munkhatah um langkhat haw hi. Mahnaven Kanaan mite cu Naftali hinnam tei nadektu in um hawta hi.
34 Amor miten Dan hinnam cu mualhum ngamah hawlvawkin, munlawnah tolhsuk tuk kham haw hi.
35 Amor mite cu Heres Mual, Aijalon le Shaalbim ah um haw: mahnaven Josef hinnam Efraim le Manasseh casuan ten uk haw in, nadek tiklo haw hi.
36 Amor mitei ngamngi cu Akrabbim Mualkawn Sela pen saklam tian heng hi.