22
Joshua In Nisuahnak Hinnamte Inn Ah Pintik
1 Joshua in Reuben mi, Gad mi le nisuahnak lam Manasseh mi a khenkhat cu a lakah samin,
2 “ Topa i nadektu Moses i thupiakmi hempoh cu zui khawng uh ci, ka piakmi thu vang a venghawngin zui khawng uh ci.Ref 22:2 Mipum 32:20-32; Josh 1:12-15;
3 Tu ni tianin, na u le nau Israel mite vei khat hei zam ma laih uh ci. Topa na Pathian uh i thupiakmi cu phano in zui uh ci.
4 Atu-in, a lak hawah a tepsa bangin na u le nau Israel tei lakah Topa in lemdaihnak umtik hi. Mah hangin Topa in, a nadektu Moses i a piakmi na ngam uh, Jordan ngun pen nisuahnak lamah pin toh un.
5 Topa i nadektu Moses in, “ Topa na Pathian uh it un, a deihmi bawl unna, a thukhamte zui un, Topa i muantakin um unna, na lungmu uh le na nunnak venghawng tuah a nadek un tin, thu a piakmi cu komno in zui suak tum un,” ti hi.
6 Joshua in muicu pia in, a khua hawah pin haw hi.
7 Manasseh hinnam khenkhat cu Jordan ngun pen nisuahnak lam Bashan pengah Moses in lei ngam pia hi; mahnaven a khen cu hinnam dangte tuah munkhatah Jordan ngun pen nitumnak lamah leingam pia hi. Reuben hinnam, Gad hinnam le Manasseh hinnam alangte cu a khua ah a pin haw ten Joshua in,
8 “Atu-in, na khua ten uh a sumpai le ngam tampi, sui, ngun, daal, thik le puansilh tuk tampi tuah hau zetin pin uh ci. Na ngal tei lak pen na lon uhmi hih nate cu na unau Israel mite tuah sem un hi,” tin thucah hi.
9 Mah hangin Reuben hinnam, Gad hinnam le Manasseh hinnam a khenkhatte cu Jordan ngun nisuahnak lam a khua hawah pin haw hi. Kanaan ngam Shiloh a camnak hawah Israel midang cu zamin, Topa in Moses lak pen thu a piak zo bangin a co haw mi ngam Gilead ah hawh haw hi.
Jordan Ngun Mawk Ah Biaklandawh
10 Kanaan ngam Jordan ngun mawk a, ummi Geliloth a hen haw ten ngun mawkah biaklandawh ngengzet pa khat lang zetin dawh haw hi.
11 Israel miten, “Ngaisung kek un, Reuben hinnam, Gad hinnam le Manasseh hinnam a khenkhat ten Jordan ngun langlam mawk, Kanaan ngamngi el, Geliloth ah biaklandawh haw hi,” tin miten son li haw hi.
12 Israel mipi ten mah thu a zak haw ten a venghawng haw in Shiloh ah khawmdun haw a, Reuben hinnam, Gad hinnam le Manasseh hinnam a khenkhat do tum haw hi.
13 Israel miten thiampi Eleazar i capa Finehas cu Gilead ngam a Reuben hinnam, Gad hinnam le nisuahnak lam Manasseh hinnam khenkhat tei lakah hah haw hi.
14 Amah nguakcang hi ngawlin Israel hinnam khat sung pen pa khat ten hotu sawm cu Finehas tuah hawh haw hi. Mah palai cu hinnam khat sung pen a lubel haw hi.
15 Gilead ngamah heng haw in, Reuben mi Gad mi le nisuahnak lam Manasseh mi a khenkhat tei lakah,
16 “Ita hiti bang thilpha ngawl Israel Pathian maiah bawl uh cim? Nangmu ca tukin biaklandawh na bawl uh hangin Topa langpang uh ci. Amah zui ma toh uh ci.Ref 22:16 Daan 12:6,13-14;
17 Peor ah Israel tei sualnak hangin Topa in, a mihingte a bawlsiat khi cingleh ma toh uh cim? Mah sualnak hangin tu tianin thuak laih si hung. Tawk toh ma maw?Ref 22:17 Mipum 25:1-9;
18 Tuni in Topa cu nung na hek uh tale, a zingten Israel mi hempoh humah a thinuk tuk hi.
19 Atu-in, na ngam uh nin zo in Topa biakpiaknak tukin a tak ma toh tale Topa i ngam a puanbuk umnakah hung un. Keimu lakah na covo uh la un. Mahnaven Topa a Pathian uh i biaklandawh sial ngawl biaklandawh nangmu ca dawhin Topa cu do pahsuh un. Keimuh vang Topa dotu in cangtik pahsuh un.
20 Zerah capa Akhan in siatsuah khawng tuk tihmi a zui nuam hangin Israel venghawngin bawlsiatnak a thuak uh khi thei ma toh uh cim? Akhan sualnak hangin amah bek thi ma hi,” tin ti haw hi.Ref 22:20 Josh 7:1-26;
21 Israel mipi hotu tei lakah Reuben mi, Gad mi le Manasseh mi a khenkhat ten,
22 “Ihempoh tithei Pathian! Amah cu Topa hi. Ihempoh tithei Pathian pa khat bek hi. Amah cu Topa hi. A thil bawlnak thu uh Topa amah in thei hi. Noh Israel miten na theih uh kul hi. Topa cu do in, na zawnsak uh tale tuni in nungtik pahsuh un.
23 Topa i thu zui ngawlin keimu ca in meihal biakpiaknak le pawlkom biakpiaknak tukin biaklandawh na bawl uh tale Topa amah loli in bawlsia hen.
24 Hi bangin biaklan ka dawhnak uh cu mailamah na casuan uhten ‘Israel i Pathian Topa tuah i pehdunnak nei kam uh ci?
25 Reuben mi le Gad mite nangmuh le keimu lakah ngamngi tukin Pathian in Jordan ngun bawl zo hi. Topa tuah imah bawl tuk nei ma toh uh ci,’ tin ka tu le ca tei lakah ti kha sual haw tuk,” tih ka lau uh hangin hi. Mah bangin a ti ngangai bang ahin na casuan uh cu Pathian biak a kham kha haw ma maw?
26 Mah hangin piaknak le meihal biakpiaknak tuk hi ngawlin,
27 Topa cu meihal biakpiaknak le pawlkom biakpiaknak tuah a Puanbuk thiangtho maiah bia ung hi, tih nangmuh le keima laklawhah hei hihen, na casuan uh le ka casuan uh lakah hihen sialsiahnakin hi biakpiaknak biaklan dawh ung hi. Hi bangin ka bawl uh tale na casuan uhten ka casuante cu, “ Topa tuah imah pehzomnak nei ma uh ci,” tin mailam ten tithei haw tukma hi.
28 A ti haw hei in kohten, ‘Zo un, Topa i biakpiaknak biaklandawh bang loli in ka pu le pa uhten biaklandawh pa khat dawh bok haw hi. Biakpiaknak tuk le meihal biakpiaknak tuk hi ngawlin a pa nih uh laklawhah sialsiahnak hi,’ tin ti thei tuk hung hi, tin ka ngaihsutnak uh hi.
29 Topa ama umnak Puanbuk mai a ummi Topa a Pathian uh i biaklandawh sial ngawl, meihal biakpiaknak le anci biakpiaknak tukin a dang biaklandawh pa khat dawhin Topa cu do tum hihim ma ung hi. Amah zui ngawlin um tum ma ung hi,” tin ti haw hi.
30 Thiampi Finehas le a lak a telmi Israel mi hotu ten a theih haw ten Reuben in, Gad mi le nisuah lam Manasseh mi khenkhat tei humah lungdamzet haw hi.
31 Eleazar i capa thiampi Finehas in Reuben mi, Gad mi le Manasseh lakah, “ Topa na do uh ngawl hangin Topa cu a lak uhah um hi, tih thei hung hi. Topa i bawlsiatnak thuak ngawlno in, Israel mite cu luattik uh ci,” ti hi.
32 Finehas le Israel hotu cu Gilead ngamah a ummi Reuben mi le Gad mitei lakah Mah thu la cu hilh haw hi.
33 A hilh haw mi thu a zak haw ten Israel mite cu lungdamzet haw hi. Pathian thangphat haw in, Reuben mi le Gad mitei umnak ngam siatsuah tukin ngalthawh tuk thu cu son haw ma toh hi.
34 Reuben mi le Gad mitei biaklandawh cu, “Theihpihtu” tin sam haw hi. “Itahim titale, Topa cu Pathian hi tih cu a venghawng uh ca in theihpihtu hi,” tin ti haw hi.