21
Levi Tei Khuapi
(1Khang 6:54-81)
1 Levi hinnam hotu cu thiampi Eleazar, Nun i capa Joshua le Israel miphun a nam haw tek i hotu tei lakah hung haw in,
2 Kanaan ngam a, a ngiahnak haw Shiloh ah, “ Topa in Moses lakah a thupiakmi bangin hamhing umnak ngam cu pia zazal un,” tin ngen haw hi.Ref 21:2 Mipum 35:1-8;
3 Topa i thupiakmi bangin Israel miten a co haw mi ngamsung pen khuapi le ngam cu Levi mi lakah pia haw hi.
4 Levi mitei lakah masabelin khuapi a piak haw cu Kohath mite hi. Thiampi Aaron i cihah Levi mite cu Judah, Simeon le Benjamin hinnam tei ngam pen khuapi sawm le khua thum pia haw hi.
5 A tangmi Kohath mite cu Efraim, Dan le nitumnak lam Manasseh hinnam khenkhat tei ngam pen khuapi sawm khat pia haw hi.
6 Gershon mite cu Issakhar, Asher, Naftali le Bashan a ummi nisuahnak lam Manasseh hinnam khenkhat tei ngam pen khuapi sawm le pa thum pia haw hi.
7 Merar mite cu Reuben, Gad le Zebulun hinnam tei ngamsung pen khuapi sawm le pa nih pia haw hi.
8 Moses lakah Topa i thupiak bangin aisannak bawlin Israel miten a khuapi le a ngan hahnak ngam cu Levi mi lakah pia haw hi.
9 Judah le Simeon hinnam tei khuapi lak pen Levi mi,
10 Aaron casuan lak pen Kohath innkua a piak haw mi khuapi cu hi hihi. A muhte cu a masabelin piak mite haw hi.
11 Judah mualhum ngam Hebron a ummi Kiriath Arba (Arba cu Anak i pa hi) khua le a elkim ngam cu Kohath mitei lakah pia haw hi.
12 Kiriath Arba khua el a, lo le khuanote cu Jefunneh i capa Kaleb pia haw hi.
13 Thiampi Aaron i casuan tei lakah a piak haw mi khua, mi thattu tei buknak Hebron khua sialngawl Libnah,
14 Jattir, Eshtemoa,
15 Holon, Debir,
16 Ain, Juttah le Beth Shemesh khua le a elkim a ngam tuah hi. Judah le Simeon miphun tei ngamsung pen khuapi kuah pia haw hi.
17 Benjamin hinnam pen Gibeon, Geba,
18 Anathoth le Almon khua khuapi pa li cu a elkim a ngam tuah pia cih haw hi.
19 Thiampi Aaron i casuan thiampi na a dek bok mite vang a elkim a ngam tuah a venghawngin khuapi sawm le pa thum pia haw hi.
20 Levi mi Kohath i hinte cu Efraim hinnam tei ngamsung pen khuapi khenkhat pia hawh hi.
21 A piak haw mite cu Efraim mualhum ngam a um Shekhem khua le a elkim a ngam Shekhem cu mi thattu tei buknak tukin ten mi khua, Gezer khua,
22 Kibzaim khua le Bethoron khua, a elkim a ngam tuah a venghawngin khuapi pa li hi.
23 Dan hinnam Elteke, Gibbethon,
24 Aijalon le Gethrimmon, a venghawngin khuapi pa li cu a elkim a ngam tuah pia haw hi.
25 Nitumnak lam Manasseh hinnam tei ngam pen Taanak le Gathrimmon khuapi pa nih cu a elkim ngam tuah pia hi.
26 Kohath i hinnam ten a khuapi pa nih cu a elkim nganhing tatnak ngam tuah khuapi sawm co haw hi.
27 Levi hinnam sung um Gershon miten nisuahnak lam a ummi Manasseh hinnam tei lak pen khuapi pa nih ngah haw hi. Bashan peng sung pen mithat tei buknak khua Golan le Beeshterath, a elkim a ngamtatnak mun tuah co haw hi.
28 Issakhar hinnam tei lak pen Kishion, Daberath,
29 Jarmuth le Engannim khuapi le a elkim a ngan tatnak ngam tuah khuapi pa li co haw hi.
30 Asher hinnam tei lak pen Mishal, Abdon,
31 Helkath le Rehob khuapi, khuapi pa li le a elkim a ngan tatnak ngam tuah ngah haw hi.
32 Naftali hinnam tei lak pen, Galilee peng a um Kedesh khua, Kedesh cu mi that tu tei buknak khua hi. Hammothdor khua le Kartan khuate, khuapi pa thum le a elkim a ngamtatnak ngam tuah ngah haw hi.
33 Gershon hinnam tei ngahmi khuapi cu a elkim a ngan tatnak ngam tuah a venghawngin khua sawm le pa thum hi.
34 Levi hinnam leleng pen Merar miten Zebulun hinnam tei lak pen Jokneam, Kortah,
35 Dimnah le Nahalal khuapi, a venghawng hi khuapi pa li le a elkim a ngan tatnak ngam tuah ngah haw hi.
36 Reuben hinnam tei lak pen Bezer, Jahaz,
37 Kedemoth le Mefaath, khuate, khuapi pa li le a elkim a ngan tatnak ngam tuah ngah haw hi.
38 Gad hinnam tei lak pen Gilead peng sung pen (mithat buknak khua) Ramoth le Mahanaim
39 Heshbon, le Jazer khua khuapi pa li le a elkim a ngan tatnak ngam tuah ngah haw hi.
40 Mah hangin Levi hinnam Merar miten a venghawngin khuapi sawm le khua nih co haw hi.
41 Israel co mi ngamsung pen a venghawngin khuapi sawm li le khua liat cu Levi mitei lakah pia haw hi.
42 Hi khuapi tei elkimah ngan tatnak tuk ngam um khawng hi.
Israel Ten Kanaan Ngam Luah
43 Topa in, a pu le pa tei lakah a tepsa bangin Israel tei lakah Kanaan ngam cu pia hi. Ngam a lak khawng ceng haw ten panmun khualin, um haw hi.
44 a pu le pa tei lakah, a tepsa bangin a ngamsung haw le a elkim mun hempoh ah lemdaihnak um hi. Topa in nehnak a piak hangin Israel mite cu kuamah in neh haw ma hi.
45 Topa in Israel mi lakah a tepmi hempoh pa khat hei pel ha ngawlin a venghawngin kim khawng limlem hi.