18
A Tangmi Ngam Sem
1 Kanaan ngam a neh khawng haw ten Israel mite cu a venghawngin Shiloh ah hung haw a, Topa i umnak Puanbuk sa haw hi.
2 Israel minam sawm le pa nih sung pen nam salih ten ngam co tuk nei haw ma laih hi.
3 Mah hangin Joshua in, a lak hawah, “Na pi le pu tei Pathian Topa in, a piakmi ngam cu luah vut ngawlin itik can ngak tuk kam uh ci?
4 Nam khat pen mihing pa thum ten ka lakah hungtik unna, hi ngam sungah hah tung hi. Nam khat ten i co tuk a mawi tawk hi tin, amuh haw bangin a thu la lai in ngan haw henna, ka lakah kikleh haw hen.
5 Hi ngam cu khen salihin khen haw tuk hi. Judah hinnam cu a ngam haw hanglamah um haw henna, Josef hinnam cu a ngam haw sak lamah um haw hen hi.
6 Ngamkhen khen salih i thu cu ngan unna, ka lakah hunpih un. Mahnung ten nangmu ai-in Topa na Pathian uh i mitmuhin aisannak bawl tung hi.
7 Levi mite cu nangmuh bangin ngam nei haw tukma hi. Itahim titale a co haw tuk cu Topa i thiampi nadeh hi. Topa i nadek Moses i a sepsa bangin Gad, Reuben le Manasseh hinnam a lang cu Jordan pen nisuahnak lam ngam co zo haw toh hi,” ti hi.
8 Joshua i hilh bangin ngam zotu tukte cu hawh haw in, Joshua in amu lakah, “Ngam sung hempoh ah hawh khawng unna, a thu la lai in ngan unna, ka lakah hungleh un. Nangmu ai-awhin Shiloh ah Topa i mitmuhin aisannak bawl tung hi,” tih thucah hi.
9 Mah hangin Kanaan ngam hempoh ah hawh haw in, a thu cu lai sungah ngan haw hi. Ngam cu khen salihin khenin, khua min vang ngan khawng haw hi. Mah nungten Shiloh a ngiahbuk Joshua lakah kikleh haw hi.
10 Joshua in Topa i mitmuhin aisannak bawlin ngam khenkhat cu Israel hinnam khat ten tei lakah sem hi.
Benjamin Hinnam Tei Ngam
11 Benjamin hinnam ten aisannak bawl haw in, a ngah haw mi ngam cu Judah hinnam le Josef hinnam tei co mi laklawh ngam hi.
12 Saklamah a ngamngi haw cu Jordan ngun pepanin, Jerikho a mual tuanpi tiang hawhto in nitumnak lamah hawh phei in, mualhum ngam pen Bethaven phillawn heng hi.
13 Luz lamah hawhsukin, Luz mualtuan tihmi Bethel ah heng hi. Ataroth Addar ah hawhsuk lehin mah nungten Hanglam Beth Horon pen hanglam mual tian hi.
14 Beth Horon mual nitumnak lam mawk pen hawhsuk lehin Judah mitei umnak Kiriath Baal (ahimata Kiriath Jearim) khuapi heng hi. Mahmi cu nitumnak lam ngamngi hi.
15 Hanglam ngamngi cu Kiriath Jearim khua mawk pepanin nitumnak lamah hawh phei in Neftoah Ciktui heng hi.
16 Hinnom capa ih luam tihmi zawn a um mualtuan mawk le Refaimluam i saklam mawk tian hawhsuk hi. Enrogel lamah Jebus mualtuan hanglam pen Hinnom luamah heng hi.
17 Mahlai pen Enshemesh ah kawito in, Adummim mual kawn zawn a um Geliloth tian heng hi. Reuben capa Bohan i suangpi a tih hawah hawhsuk lehin,
18 Beth Araban munlawn saklam pen hawhvawkin Jordan kua heng hi.
19 Mahlai pen hawhto lehin Beth Hoglah mualtuan sak pen Tuipi Thi saklam mawk, Jordan ngun khopnakah tawp hi. Hi cu hanglam ngamngi hi.
20 Nisuahnak lam ngamngi cu Jordan ngun hi. Benjamin hinnam tei co mi ngamngi cu a humta bangin hi.
21 Benjamin hinnam tei co mi khuapi cu, Jerikho, Beth Hoglah, Emek Keziz,
22 Beth Arabah, Zemaraim, Bethel,
23 Avvim, Parah, Ofrah,
24 Chefarammoni, Ofni le Geba hi. Khuapi sawm le pa nih le a elkim khuanote hi.
25 Adang khuapi cu Gibeon, Ramah, Beeroth,
26 Mizpah, Kefirah, Mozah,
27 Rekem, Irpeel, Taralah,
28 Zela, Haelef, Jebus (ahimata Jerusalem) Gibeath le Kiriath Jearim hi. Khuapi sawm le pa li le a elkim a um khuanote hi. Benjamin tei innkua co mi ngam cu hite hi.