17
Nitumnak Lam Manasseh
1 Manasseh cu Josef i capa upabel a hih hangin Jordan pen nitumnak lam ngam khenkhat cu Manasseh i casuante pia haw hi. Gilead i pa Makhir cu Manasseh i capa upabel hi a, ngalkap minthang hi. Mah hangin Jordan pen nisuahnak lam a um Gilead le Bashan cu Makhir pia haw hi.
2 Manasseh casuan Abiezer, Helek, Asriel, Shekhem, Hefer le Shemida vang ngam sem bok haw hi. Hi cu Josef i capa Manasseh i casuante hi haw in, hinnam khat ten tei hotu haw hi.
3 Manasseh i capa Hefer, Hefer i capa Zelofehad in capa pa khat hei nei ma hi; canu bek nei hi. A canu tei min cu. Mahlah, Noah, Hoglah, Milkah le Tirzah hi.
4 Amuhte cu thiampi Eleazar, Nun i capa Joshua le a hotu tei lakah hung haw in, “Keimuh tei lakah hihen, ka innkuapih hei hihen, bangtenin ngam co bok tukin Topa in Moses lakah thupia hi ma maw?” tin ti haw hi. Topa i thupiakmi bangin a pa i unau tei lak pen a covo haw ngam cu ngahleh haw hi.Ref 17:4 Mipum 27:1-7;
5 a Jordan ngalkhatah Gilead le Bashan sial ngawlin Manasseh humah ngam sawm pia haw hi.
6 Itahim titale Manasseh i canu ten a capate bang bokin ngam ngah ten haw hi. Manasseh mi a umlaih tei humah Gilead ngam pia haw hi.
7 Manasseh ngam cu Shekhem peng pen Ashaer nisuahnak lamah hawhsukin, Mikmethath tian banin, Entappuah tian heng hi.
8 Tappuah ngam cu Manasseh ta hi in, a ngamngi mawk a um Tappuah khua cu Efraim casuan teita hi.
9 A ngamngi haw cu Kanah lui tian heng hi. Hi lui pen hanglam a um khuapi cu Manasseh i khuapi tei lakah um haw naven Efraim khuapi hi haw hi. Manasseh i ngamngi cu mah lui i saklam mawk tuan le Mediterranean Tuipi cu a tawpnak hi.
10 Efraim ngam cu hanglamah hi a, Manasseh ngam cu saklamah hi. A ngam nisuahnak lamah Issakhar tian zal hi.
11 Issakhar le Asher ngamsung hei pen Beth Shean le a elkim a khua, Ibleam i ummi (tuipi mawk a ummi) Dor khua, Endor khua, Taanak khua, Megiddo khua le a el khua, Megiddo khua le a elkim a ummi khua hempoh cu Manasseh ta hi.
12 Mahnaven Manasseh miten mah khua a um Kanaan mite cu a hawlvawk thei haw ngawl hangin tusun tianin um haw hi.Ref 17:12-13 Daan 1:27-28;
13 Israel mite a cak dedeuh haw hei ten Kanaan mite cu hawlvawk ngawlin Israel tei nadektu hi haw hi.
Efraim le Nitumnak Lam Manasseh Ten Ngam Ngen Bet
14 Josef i casuan ten Joshua lakah, “Ita ka co tuk uhmi ngam khenkhat bek pia cim? Pathian in muicu pia in, ka mipum uh cu tamzet ung. Ngamzal deuh kul ung hi,” tin ti haw hi.
15 Joshua in, “Mihing tam na hih uhten Efraim mualhum ngam na ca uhin, a neu deuh tale Periz ngam le Refaim ngamah hawh unna, a ngam tukhaangpi haw nangmuta tukin vat un,” ti hi.
16 Josef i casuan ten, “Atu ka umnak uh mualhum ngam cu keimu ca in neu ngangai hi. Mun lawn a ummi Kanaan miten thik cipuhleng nei haw hi. Mah hum pen Beth Shean le a elkim khuano sung ummi Kanaan mite vangin nei bok haw hi. Jezreel munlawn a mite vangin thik cipuhleng nei khawng haw hi,” tin ti haw hi.
17 Joshua in Efraim le nitumnak lam Manasseh casuan tei lakah, “Mihing tamzet ngai uh ci a, huham vang neizet uh ci. Mah hangin covo pa khat sangin tam deuh ngah tuk uh ci.
18 Mualhum ngam cu nata uh hi tuk hi. Tukhaangpi ngeh naven vat seuh unna, mawk khat pen mawk khat tian co un hi. Kanaan mite cu thik cipuhleng nei in, a ngilzet haw hei in hawlvawk leleng tuk uh ci,” ti hi.