5
Jerusalem Sualnak
1 Jerusalem mite, na khuasung
lampi tuanah tai kawkawi le uh ci,
khuadang hekin
zo cangcian hem un.
Dawl bawlnak mun tianin
zei hem un!
Thildik a bawltu le
Pathian i muantakin,
a nungtu, mi pa khat bek
tawk ni uh cim?
Na tawk uh tale Jerusalem cu
Topa in ngaidam tuk hi.
2 Topa umtu bangkekin
um cop nave uhcin,
na otnak uh bangin
zui tumleh sih ma uh ci!
3 Topa i deihmi cu
muantak hihnak khi hi.
Vat naven imah kinmawh ma uh ci!
Sikpek naven zui nuam
cuang ma uh ci.
Mi lungmu ngeng hi uh ci a,
na sualnak uh pen
kikleh nuam ma uh ci.
4 Mahten ka lungmu in, “Hite hi mi zawng le misil, thu thei ngawl mite haw!
A Pathian haw i daante
thei ngawlin
Topa i deihmi hei
bawl thei haw ma.
5 Thuneitu upa lakah hawh tung a,
thuhilh tung.
Amuh ten, a Pathian daan thei haw in,
a Topa haw i deihnak hei
thei leng haw poh,” tin ngaisung ing.
Mahnaven Topa i
thu cu a venghawng haw elin,
a thupiakmi zui nuam
haw ma hi.
6 Mah hangin tupi sung a,
kiosa in vat hum tuk hi.
Phillawn a ummi cingne in
botkek tuk;
Tavangte vang a khuasung hawah
vak susuih haw tuk hi.
Pua lamah a tul haw ten, sahang ten
botkek khawng haw tuk hi.
Itakaw titale a sualnak haw
tam leita in,
tu le tu, a Pathian haw cu
nunghek haw hi.
7 Topa in, “Itin kaw ka mihing tei
sualnak cu ka ngaihthiam tuk?
Ka lak pen tai in,
pathian ngangai ahi ngawlmi
khawhuaite bia haw hi.
A kul haw hempoh pia in,
cawm ing.
Mahnaven nupa sualnakte
bawlin a hun haw cu
numei pha ngawl tei
lakah pia haw hi.
8 Amuhte cu cawm thauzetmi
cipuh cang pilzet bang haw hi.
A innnel tei zi sualpih tuk bek
hazawl hi.
9 Hitih bang thil sual a bawlnak
haw hangin bawlsia ngawlin
um tung maw?
Hitih bang miphun tei humah
akua kaw phuba la ngawlin
a um thei tuk?
10 Ka mihing tei sabit ngui
sattan tukin
a ngalte hah tung.
Mahnaven a bo laklawh
siatsuahtu cu hi haw tukma.
A kangte sattan tukin
hilh tung hi.
Itahim titale a kangte cu
keima ta kha haw ma hi.
11 Judah mi le Israel miten
suam zo haw hi.
Keimah, Topa in
hilh zo toh ing,” ti hi.
Topa In Israel Lawl
12 Topa cu a mihing ten imah a simsial haw ngawl hangin, “Imah bawl tukma poh, haksatnak le bawngsiatnak vang tawk tukma poh hung. Ngaldonak le pamnak vang thuak tukma hung,” tin ti haw hi.
13-14 Mahten profette cu huih bangkekin phukthong haw poh, Topa i lak pen a hengmi thu hilh tuk nei haw ma tin ti thong haw hi. Cungnungbel Topa Pathian in, “Jeremiah, ka mihing ten hitih bang a ot haw hangin, na kam sung a, ka thuanmi ka thu cu mei bangin cangtik tung hi. Hi mihingte cu thingkang bang hi haw tuk a, mei in kang khawng haw tuk,” ti hi.
15 Israel mite, Topa in, ngam khua lapi pen miphun phun khat nangmuh do tukin hunpih hi. Miphun ngilzet le tanglaih miphunte haw in, a awn haw vang na theih uh ngawlmi hi.
16 A thalcang ngalkapte cu mi ngilzet hi haw a, hehpihnak nei ngawlin mithat haw hi.
17 Na lo uh ankung le na inn uh an hihen, ei khawng haw tuk a, na canu le capate vang that khawng haw tuk hi. Na tuuhon le na khuihon uhte hei that khawng haw tuk a, na sabit ngui uh le na theipi kung uhte phuh sak khawng haw tuk hi. Na muanzet uhmi kulhtian khuapi cu a ngalkap ten siatsuah khawng haw tuk hi.
18 Topa in, “Mah tizah tian a heng hei in, ka mihingte cu siatsuah khawng tuk mang.
19 Hitih bangin kohtei humah itakaw na bawl? tin, a dot haw ten Jeremiah, phano in hilhin hi. Keimah taisanin, a ngamsung hawah miphun dang tei pathian bia in, a nadehsak haw hangin amu ngam ahi ngawlmi ah miphun dang tei nadektu in suak haw tuk,” ti hi.
Pathian In A Miphun Ngallinnak Pia
20 Topa in, Jeremiah lakah Jakob, casuante le Judah mite hi bangin hilhin hi.
21 Phano in ngai un, noh misil le ngaihsutnak dawmte, mit nei na pi in, imah mu thei ngawlte, beng nei na pi in, thu za thei ngawlte,Ref 5:21 Isa 6:9-10; Ezk 12:2; Mk 8:18;
22 Keimah cu Topa ing hi? Itakaw kihca in, na upat uh ngawl? Ka mai ah ita can tawtok ma uh kam? Tuipi mawkah philnel a koihtu, tui i tukmah ten a letvawk thei ngawlin a koihtu ing. Tuicawkpi cu suk le to ah let susul tuk naven a mawk a philnelte kal cuang tukma. Tuicawkpi hei tho tuk naven pah vawk zo cuang awng tukma hi.Ref 5:22 Job 38:8-11;
23 Mahnaven nohte cu lungmu ngoltol le lungmu ngai nei cuam ngawl na hih uh hangin langpang tuk bek na nuam zawng uh hi. Nunghekin taisan zo uh ci.
24 Cuk nguah le khal nguah zutik ing, kum sial an laknak hun pia naveng upatnak piak tuk hei ngaisung awng ma uh ci.
25 Na sualnak uhin, nangmu ca thilpha tuk hei khi tisual khawng hi.
26 Mipha ngawlte ka mitei lakah um haw hi. Miten vano awk tukin thangsiahin, a pan haw bangin, amuh ten mihing awhnak tuk thang tuah mi pang haw a, mi awk tukin thangsiah haw hi.
27 Sakap theizet pa in, a inn sungah vano a dimtik bangin, misual ten a inn sung hawah mi thil a lonsak haw mi tuah a inn sung dimtik haw hi. Mah hangin hi; mihau le thunei zetin, a can haw cu!
28 Mah hangin hi; neinungzet le vonvahin umin, a thau pehpuh haw cu! Thil sual a bawlmi bo ni nei haw ma; Nu le pa nei ngawl tei lakah a covo haw pia awng haw ma hi. Mi ca-ngah tei humah a pha in, nung haw ma hi.
29 “Mahnaven Keimah, Topa in dantat tung. Mah bang miphun tei humah phu la tung hi.
30 Hih ngamah na lamdang zamhahzet thilte bawl haw hi.
31 Profet hei in zolthu ngeh hilh haw, profet tei thupiaknak bangin thiampi ten mi ukin, ka mite kuamah in el haw ma hi. A tawpnak ten itin um haw tuk nen tim?” tin ti hi.