4
Sualsik Tukin Samnak
1 Topa in, “Maw Israel mite, kikleh na nuam uh tale ka lakah kikleh un. Ka ningdelhzetmi, milim biaknakte vawkin ka mai ah muantakin, na um uhten.
2 Ka min salin siatcamnak na bawl uh hei in nangmu ca in, a dikmi le a pha mi hi tuk poh hi. Miphun hempoh ten muicu pia tukin ngen haw tuk a, thangphat haw tuk,” ti hi.
3 Topa in, Judah mi le Jerusalem khua mitei lakah, “Lo na bun uh laih ngawlmi cu bung toh un, na anci uh cu ling lakah cing pahsuh un.Ref 4:3 Hos 10:12;
4 Maw Judah mi le Jerusalem mite, na Topa uh keimah tuah a bawl uhmi thutiamnak cu kimtik unna, keima ca thiangtho zetin ap un hi. Mahti bangin na bawl uh ma tale na thil bawl sual uhmi i hangin ka thinuknak cu mei bang alh tuk a, a cuhmit theitu kuamah um haw tukma,” ti hi.
Judah Ca Ngaldonak
5 Hi ngamsung khua hempoh ah
pengkul tum un.
Ngingzet le cel zetin tum un.
Judah mi le Jerusalem miten
kulhtian khuapi sungah
tai tukin than un hi.
6 Zion lampi hilh unna,
himnak munah a manlangin
tai un!
Topa in, haksatnak
hengtik tuk hi.
Saklam pen a nase zetmi
siatsuahnak heng tuk hi.
7 A ngelhnak mun pen
kiosa a hun bangin,
ngam tampi a siatsuahtu tho zo hi.
Judah siatsuah tukin
hung li laih hi.
Judah khua cu khualopin
cang haw tuk a, kuamah a sungah
um haw tukma toh hi.
8 Mah hangin thangkhau puan
silh unna, kap leilui un.
Itakaw titale
Topa i thinuknak cu,
Judah hum pen thawn ma laih hi.
9 Topa in, “Mah ni ten kumpi le a khutnuai bawi tei ngalphatnak cu bo tuk hi. Thiampite cu thinkhamin, profet vang cu amthongin um haw tuk,” ti hi.
10 Mahten keimah in, “Cungnungbel Topa, Jerusalem mite hi nase zetin zol na hi pah ci maw! Lemdaihnak um tuk hi tin, ti navecin ngalnam cu a ngawng haw tuah tawng khadun zo,” tin ti ing.
11 Jerusalem mitei lamah phillawn ngam lam pen huihsa nase zetin theu tuk hi tih hilh ciangnak hun heng zo. Mahmi huih cu mei bangin a sa mi huihpi hi tuk hi. Cangsi a taivawktiktu huih nem bang cu hi tukma.
12 Topa i thupiakin, a theu limi huih cu mah sangin a nase saw mi huih hi tuk hi. Mahmi huih cu ama mihing tei humah thukhennak piatu cu Topa amah hi tuk hi.
Judah Ngam Ngal Ten Kiil
13 Zo hem un, ngalte cu meingo niimpi bangin tul luluih haw hi. A cipuhlengte cu simpeipi sangin cak saw in, a cipuhte cu muvanlai sangin manlang saw haw hi. A lampi uh bing! Bothal zo hung!
14 Jerusalem, thil sual na bawl mite cu na lungmu sung pen som ciang khawng inna, himnak ngah tuk ci. Itik can tian kaw thil sual cu na lungmu in, na ngaihsut hih tuk laih?
15 Dan khua le Efraim mualhum ngam pen thuthangsia thantu tukte heng haw hi.
16 Ngalte ngam khua lapi pen heng haw tuk tin, miphunte le Jerusalem ngallinnak a pia tukin hung haw hi. Ngal ten Judah khua cu auh san haw tuk a,
17 lo a cin haw bangin, Jerusalem khuapi cu kil khawng haw tuk hi. Itahim titale a mihing ten Topa dodalin hua haw hi. Topa in hilh zo.
18 Judah, na nunzia le thilpha ngawl na bawlmi hi na humah hengtik ci. Na sualnakin hi thuaknak hi piangtik hi. Ceipi bangin na lungmu sun zo toh hi.
Jeremiah Thasiatnak
19 Na leita thong si!
A na thuak thei mang.
Ka lungmu sung na in,
ka lunghing tawtok!
Daidenno in um thei hihim mang.
Pengkul tum thawm le
ngal donak au thawm za ing.
20 Siatsuahnak pa khat nung pa khat
zuidun haw hi.
Ngam buppi cu sia khawng zo.
Thakhat thu in,
puan innte cu
siatsuah khawng hi haw zo.
A puanzakte cu balkek khawng hi.
21 Ituk tian kaw ngalmat thawm za in,
Pengkul tum ka zak tuk?
22 Topa in, “Ka mihingte hi
silzet haw;
Keimah theileh haw ma toh;
naupang sil bang thong haw hi.
Imah theitum haw ma.
Thil sual bawl thiamzet haw.
Mahnaven thilpha cu
bawlsuak awng haw ma,”
tin ti.
Jeremiah In Siatlalnak Tuk Muhnak
23 Lei ka zo le,
taisanmi ngamkhing hi a,
veng diudeu thong.
Van ka zo le,
vaknak imah umma.
24 Mual sangpi ka zo le,
hing dudut haw hi.
Mual neunote phe susuih li haw hi.
25 Mihing kuamah umleh haw ma toh.
Vanote vang lengvawk khawng
haw zo.
26 Ngamphazet cu philnel ngamin
cang khawng zo.
Topa i thinuknak hangin,
a khuapi haw cu
sia khawngta hi.
27 Topa in, “Leihum buppi cu ngamkhingin cang tuk,
mahnaven siatik khawng tuk mang,”
ti hi.
28 Leipi cu mithi ngai in um tuk hi.
Vante thim khawng tuk hi.
Topa in hilh zo toh naven
a lungmu haw khelleh tukma toh.
Thu ngaisung cat zo toh a,
sikleh hihim tukma,
nung vang kikleh tukma hi.
29 Cipuh khung ngalkap le
thalcang ngalkap tei thawm
a zak haw ten
tai khawng haw tuk hi.
Mi khenkhatte cu tupi sungah
ngelh haw tuk,
mi khenkhatte cu suang kham lakah
baan haw tuk hi.
Khua hempoh khing diudeu tuk a,
kuamah umleh haw tukma toh.
30 Jerusalem, lumpek zo toh ci.
Itakaw puansan na silh lih laih?
Itakaw na sui le ngun, na lo le lamte
kaisuahin, na silh uh?
Itakaw na mit uhte mawinak
si na noih uh?
A thawnthongin mawitik uh ci!
A ngaitu na tangval ten
zam zo haw si,
thahtum lamsang haw vei.
31 Numei nauhing tuk tei
ham thawm za ing,
catawntil nau nei tuk tei
ham bangkek hi.
Mah thawm cu Jerusalem i haihawh
thei ngawlin a tau thawm hi.
A khut dangto in,
“Kei cu bo zo ing!
Keimah that tukin hung zo haw,”
tin a taunak thawm hi.