6
Ngal Ten Jerusalem Kiil
1 Benjamin miphunte aw, himnak munah tai un. Jerusalem pen taitul un hi. Tekoa ah pengkul tum inna, Beth Hakkherem ah theihtiknak meihal un. Haksatnak le siatsuahnak cu saklam pen hung tuk hi.
2 Zion khuapi cu mawizet naven siatsuah khawng hi tuk hi.
3 Mahlai ah a ngalkapte tuah kumpipa cam tuk hi. Khuapi elkimah a ngiahbuk sa haw tuk a, amu nuamnak pohah cam haw tuk hi.
4 Amuh ten “Jerusalem sim tukin tuangtim un, ngalling unna, sunin do tuk hung” tin au haw tuk hi. Mahnaven, “Khua nu leita zo; khua nu zo toh hangin thim awndiak zo hi.
5 Zan khuathimin do tuk hung a, khuapi kulhtiante siatsuah khawng tuk hung,” tileh haw tuk hi.
6 Cungnungbel Topa in, hi kumpi tei lakah thingkungte phuk tukin le Jerusalem donak tukin lei vukto tukin thupia hi. Topa in, “Hi khuapi cu namnuainakin, a dim hangin bawlsia tung.
7 Tuikhuk pen tui a put leleng bangin, hi Jerusalem khuapi pen thil sual a thakin piang leleng. Vahdunnak le siatsuahnak bekin dimin, hi khuapi sungah natnak le meima bebek mu ing.
8 Jerusalem mite, hi haksatnak hi na ngallinnak uhin cang hen, mahma tale nangmuh nunghek tung hi. Na khuapi uh cu kuamah i um nuam ngawlnak phillawnin bawl tung.”
Ngaltho Nuamtu Israel
9 Cungnungbel Topa in, ka lakah, “Israel cu sabit ngah a thawihsa limlem haw sabit huan, kolh lemlum bangin kolh bok tuk hi. Mah hangin a hun a umlaihin, na patsuah theih zah panin,” ti hi.
10 Donleh ing a, “Amu lakah awnin, ngallinnak thu ka hilh vangin akua in kaw a ngai nuam tuk? Mi lungmu ngawngtawh hi haw in, nangma thu hei a ngaih haw ngawl; amu lakah phuan tuk na hilhmi nangawn hei nuihsan thong haw hi.
11 A hum haw a, na thinuknak cu ka sungah mei bang alh bok a, mengden thei bok mang, Topa” tin ti ing.
Topa in, ka lakah, “Ka thinuknak cu lampi a, naupang tei hum le a honin, a vakmi khangno tei humah buakin hi. Nupi le papite vang a mat celh haw ten hawhpih khawng haw tuk a, pitek le putek vang khawih haw tukma.
12 A innpi haw cu midang khutsungah heng khawngin, a lo le lam le a zite hei midang tei lakah piak hi haw tuk hi. Hi ngam mite hi dantat khawng tung.Ref 6:12-15 Jer 8:10-12;
13 Hi ngam mite akua kua hei hihen, a ngeng a neu in, thuman ngawllam bekin sum ngah tuk tum haw hi. Profet le thiampite hei in mizol haw hi.
14 Ka mihing tei meima cu a vunkok thong meima in ngaisung haw in, ‘Pha em poh, pha khawng poh,’ ti lamsang haw hi. A pha khawng cu hi tukma.Ref 6:14 Ezk 13:10;
15 Hibang thil nawngkai a bawlnak haw hi zahcak bek thiam haw nen tim maw? Thiam lalam haw ma! Zahcak nei haw ma. A mitmai haw vang san ma! Mah hangin midang bangin nase zetin, lum ua-uan haw tuk hi. Ka bawlsiat ten a bo khawngnak haw hi tuk hi. Keimah, Topa in hilh zo ing.”
Israel In Pathian Lampi Lawl
16 Topa in, a mihing tei lakah, “Lam kaknakah ding unna, khua cuan un hi. Ni dang laih lampi le lampi phabel ilai ah kaw a um? tin dong un! Mah lampi pen hawh unna, lungmuang zetin um tuk uh ci,” ti hi.
Mahnaven amuh ten, “Hawh thawthong tukma ung,” ti haw hi.Ref 6:16 Mt 11:29;
17 Topa in, ngallin piaknak pengkul tum ngaitu tukin, a cingtu koih sak hi. Mahnaven amuh ten, “Ngai nuam tukma ung ti sesem bok haw hi.”
18 Mah hangin Topa in, “Maw leihum miphunte, ngai hem un! Ka mitei hum a, thil hengmi hi thei hem un!
19 Maw leihum, ngai hemin! Ka thungai ngawlin, ka thu zilhmi a el haw hangin le hitih bang thil a tuptah haw hangin a hum hawah siatsuahnak hengtik tung a, bawlsia tung.
20 Sheba ngam pen biakpiaknak ca in namtui a ken haw le ngam khua lapi pen zimui ngim namtui a ken haw cu imah in sial mang. Thil a piak haw mi vang sang tuk mang, biakpiaknak a piak haw mi i hum hei ah ka lungdam cuang tuk mang hi.
21 Mah hangin hi mite hi bahtik tung a, lumtik tung hi. Pa le ca vang munkhatah thi haw tuk a, ngualcam le inn nelte vang thi haw tuk,” ti hi.
Saklam Pen Ngaldonak
22 Topa in, “Saklam ngam pen mi hung haw hi. Ngam khua lapi a, mi ngilzette ngaldo tukin tuangtim li haw hi.
23 A thalcang haw le a ngalnamte cawi khawng zo haw toh. Hehpihnak nei ngawl le mi ca a ngaisung thei ngawlte haw hi. A cipuh humah a khun haw thawm cu tuipi thuanthum a, tuihualpi thawm bang hi. Jerusalem do tukin a thuam bawl khawng zo haw toh,” ti hi.
24 Jerusalem miten, “Mahmi thawm cu za zo toh ung; ka khut tha uh vang zawng khawng. Numei nauhing tuk bangin lungmu tamnak tuah dim ung.
25 Hampa lakah tul ngam ma ung; lampi hei ah vak ngam ma ung, itahim titale ka ngal tei hiamnam cawi tiptepin, ka elkim uh mullinghah zetin dimin lauhuaizet haw hi.”
26 Topa in, a mihing tei lakah, “Thangkhau puan silh inna, vut lakah lungsia in lum kawkawi un. Na capa neihcalam uh thi in, na kah tuk uh bangin hitui luangin kap li un, Itahim titale nangmuh do tukin a hungmi na ngal ten thakhat thu in, simtum haw tuk hi.
27 Jeremiah, thik na khingkhai tuk bangin, ka mite cu khingkhai inna, iti bang haw kaw tih zo hemin!
28 A venghawng haw in, langpang nuam, mi lungmu ngawngtawh hi haw in, a lungmu haw cu thik le daal bangin a khoh zetmi haw hi. Nawhthuh eitute cu mun hempoh ah mitei siatnak a kuhno in, a sontu ngeh haw hi.
29 Pum mei cu nase zetin ling naven thik ek cu tui theileh ma toh, a tui hei zungleh thei ma toh hi. Ka mihingte thiangtho haw hen tin, khingkhai lihmi le khem lih cu a thawnthong hi, nemcuam ma hi. Itahim titale mi suaksualte vawk khawng haw ma.
30 Amuhte cu thiksia bang hi zo haw toh, itahim titale Keimah, Topa in lawl zo ing,” ti hi.