43
Izipt Ah Jeremiah Henpih
1 Topa Pathian in, a lak hawah hilh tukin a hahmi hempoh cu mipi lakah hilh khawng ing.
2 Hoshaiah i capa Azariah le Kareah i capa Johanan le mi pualthau mipi ten, “A zol ci. Topa Pathian in, Izipt ngam hawh tuk ngawlin le um tuk ngawlin hilhtik tuk bo.
3 Babilon ten ka hum uhah thunei in, a thah theihnak tukin, ahimata Babilon ah a hawhpih theihnak haw tukin Neriah i capa Baruch in thusia so hi tuk hi,” tin ti haw hi.
4 Mah hangin Judah ngam sungah um tukin Topa i thupiakmi cu Johanan in hihen, ngalbawi ten hihen, mipi hei in hihen, kuamah in zui nuam haw ma hi.
5 Johanan le ngalbawi ten Judah ngam a tangmi hempoh le a khenkhek khawngnak ngam pen a kiktute hempoh cu Izipt ngamah hawhpih haw hi.Ref 43:5-7 2Kum 25:26;
6 Pano, numei, naupang le kumpi canute hawhpih khawng haw hi. Gedaliah i cinkhawi tukin Babilon ngalkap hotu ngalbawi Nebuzaradan i a koihmi hempoh le, Baruch le keimah tianin, pui khawng haw hi.
7 Topa i thupiakmi cu ngai ngawlin Izipt ngam Tahpanhes khua tian hawh haw hi.
8 Mahlai ah Topa in ka lakah,
9 “Suang ngengpi la inna, hi khuapi sung acozah inn tumnak mai a, phahmi ukkhe nuai ah phumin hi; mahtin na bawl cu Israel mi khenkhat ten mu haw hen.
10 Cungnungbel Topa, Israel Pathian keimah in, ka nadektu Babilon kumpi Nebuchadnezzar cu hilai munah pantik tung a, mah na phummi suang ngengpi humah a kumpi khunnak koihin, a hum hawah a kumpi puanbuk zak tuk hi tih thuhilhin hi.
11 Nebuchadnezzar hung tuk a, Izipt cu neh tuk hi. Natnak tuah thi tukin ngaihsutsa mite cu natnakin thi ngangai haw tuk; salmat tukin ngaihsutsa mite vang sal matmi hi ngangai haw tuk; ngalkhutin thi tukin ngaihsutsa mite vang ngal tei khutah thi ngangai haw tuk hi.
12 Izipt pathian tei biakinnte cu mei tuah haal tung a, Babilon kumpipa vangin a pathian haw cu a haal ma tale puavawk tuk hi. Tuucing ten a puan hum a khahte la khawngin, a ciantik bangin Babilon kumpi in, Izipt ngam cu ciangtik tuk a, nehtu a hih nungten Izipt ngam pen hawhleh tuk hi.
13 Izipt ngam Heliopolis a, suangphutte cu phialet khawng tuk a, Izipt pathian tei biakinn cu haal khawng tuk hi.”