42
Mipi Ca In Jeremiah Thungentik
1 Mahten ngalkap hotu hempoh le Kareah i capa Johanan, Hoshaiah i capa Azariah le mipi a neu a ngengin ka lakah hung haw a,
2 amuh ten, “Ka nget uhmi hi bawlsak zal inna, Topa ka Pathian uh lakah keimuh thunget sak zalin hi. A nungmi ka venghawng uh ca thunget sakin hi. Mi tampi awng nave ung, atu-in, na muh bangin mi demno bek tang thong ung hi.
3 Ka hawhnak tuk uh lampi le ka bawl tuk uhte ka muh theihnak tukin, Topa ka Pathian uh lakah thunget sak zalin,” tin ngen haw hi.
4 Keimah vangin, “Pha leita hei; na nget uh bangin Topa ka Pathian uh lakah thungen tung hi. A hilhmi hempoh cu nangmuhte hilhleh khawng tung, imah im tuk mang,” ti ing.
5 Mahten amuh ten, “ Topa ka Pathian uhin, keimu zui tuk thu a piakmi ka zui nuam uh ma tale Topa cu keimu langpangtu ahi bang ahin ka hum uhah thutak le a muanhuai mi tetti hi zal hen!
6 A lakah thunget sak tukin ka nget uh hangin ka nuam uh le nuam ngawl hei in hihen, Topa ka Pathian uh i thu cu ngai tuk ung hi. A thu ka ngai uh tale ka lampi uh tuang tuk hi,” tin ti haw hi.
Topa In Jeremiah Thungetnak Donleh
7 Ni sawm nungten Topa i awn cu ka lakah heng hi.
8 Mah hangin Johanan le a lak a ummi ngalkap hotute le mipite cu sam ing.
9 A lak hawah, “A lakah ngen tukin kei atiktu Topa Israel i Pathian in, na lak uhah,
10 ‘Hi ngam sungah um tuk na nuam uh tale siatsuah tuk mang, tungding saw tung hi; bot tuk mang, kho zetin phut saw tung. Na hum uhah ka hentikmi siatlalnakin ka thin natik zo hi.
11 Mah hangin Babilon kumpi cu lau toh pahsuh un. Nangmu lak umin, a ngilnak huham sung pepan tung hi.
12 Hehpih ningnatnak neitu ka hih hangin na hum uhah hehpihnak neitik tung a, na khua le ngam uhah kiklehtik tuk hi. Keimah, Topa in hilh zo ing,’ ti hi.
13-15 “Mahnaven noh Judah ngam a tangmi ten Topa na Pathian uh i thu cu el pahsuh unna, hi ngamsung a um tuk vang el pahsuh un. Noh ten, ‘Cang thei kha bo, Izipt ngamah hawhin, um saw tuk ung. Izipt ngamah ngaldo tukma toh ung, ngaldo tukin samnak aw vang za tukma toh ung, ngilkial tukma toh ung,’ tin ti pahsuh un. Na ti uh tale Cungnungbel Topa, Israel i Pathian in, ‘Izipt ngamah hawhin, um na tum uh tale,
16 na lauzet uhmi ngal ten pha haw tuk hi. Na lauzet uhmi ngilkialnakin zui tuk a, Izipt ngamah thi tuk uh ci.
17 Izipt ngamah hawhin, um a tumtute cu ngal tei khutin maw, pamnakin maw, ahimata natnakin maw thi tatak haw tuk hi. Kuamah nung haw tukma. A hum hawah ka hentik tukmi siatlalnak pen kuamah suakca haw tukma hi,’ ti hi.
18 “ Topa, Israel Pathian in, ‘Ka thinuknak cu Jerusalem khua mitei humah leih a hih bangin Izipt ngamah na hawh kha uh tale cu na hum uhah leih hi bok tuk hi. Midang tei mitmuhin, mullinghah hi tuk uh ci a, mitei zensuk, zentohmi hi tuk uh ci, na min uh cu midang tamsiatnakin mang haw tuk hi. Hi ngam hi muleh tukma toh uh ci,’ tin hilh ing ti hi.”
19 Mahten hi bangin hilh thuahleh ing, “ Topa in, Judah ngam a tangmi nohte cu Izipt ngamah hawh tuk ngawlin hilh zo hi. Atu-in ngallinnak pia ing.
20 Na hawh uh tale khialzet tuk uh ci. Topa ka Pathian uh lakah nohtei ca thunget sak tukin ngenin, a thupiakmi hempoh bawl tukin thutiam uh ci.
21 Tuno hah hilh khawng zo ing. Mahnaven Topa ka Pathian in, a hilhtik hempoh el khawng sih uh ci.
22 Mah hangin phawk leng un: na um nuamnak mun uhah hawhin, ngalin maw, an ngawlin maw, mahma tale natnakin maw thi tuk uh ci,” ti ing.