44
Topa In Israel Mite Izipt Ah Thucah
1 Izipt ngamsung Migdol khua, Tahpanhes khua, Memfis khua le Izipt ngam hanglam a um, Israel mi hempoh tei thu ah, Topa in, ka lakah hi bangin hilh hi.
2 Cungnungbel Topa, Israel i Pathian in, “Jerusalem khuapi le Judah ngam khua hempoh humah siatsuahnak ka hentikmi cu na mit loli in mu zo uh ci. Atu hei in, buaksehmi bang hi haw laihin, mihing kuamah um haw ma hi.
3 Ita mahtih bangin um kaw titale thil sual bawlin ka thin a uktik haw hang hi. Nohte hei cu na pu le pa ten hihen, na biak awng uh ngawlmi dawihte bia in, pathian dadang lakah biakpiaknak bawl haw hi.
4 Na lak uhah catngawlin ka nadektu profet tei lakah hiti bang ka huat zawng nate bawl tuk ngawlin hilh haw hi.
5 Mahnaven a thu haw ngai ngawlin imah simsial ma uh ci. Thil sual na bawl uhmi, pathian dang tei lak a biakpiaknakte cawl cuang ma uh ci.
6 Mah hangin ka thinuknak le ka thinsonakte cu Judah ngam a, khua tei humah le Jerusalem khuapi sung lampi humah leih ing a, mei in haal ing. Calubuakah suakin, lauhuai munin, suak hi. Tuni tiangin mahti bangin, na umlaih hi.
7 “Mah hangin Cungnungbel Topa, Israel Pathian keimah in ita hiti bang thil sual hi bawl li uh cim. Siatsuahnak cu pano, numei, naupang le nauno tei hum tian mihing pa khat hei tang ngawl toh tianin hengtik nuam uh cim?
8 Na umnak uh hi Izipt ngam sungah pathian dadang lakah biakpiaknak bawlin le milimte bia in, ita ka thinuktik nge uh cim? Leihum mi hempoh tei bawlsuk, bawlto tukin le na min uh hi tamsiatnakah man tuk le nangmuh le muh siatsuahdun khawng tum uh cim?
9 Judah ngam khua sungah le Jerusalem khuasung lampi humah na pu le pate, Judah kumpite le a zi tei thilpha ngawl na bawl uhte phawkngil khawng zo uh cim?
10 Mahtibang hi nave uhcin, tuni tian lungmu nemnak nei ma laih uh ci. Keimah upatnak le kihcaknak imah nei ma uh ci, nangmuh le na pu le pa tei lak a, ka piakmi daan bangin nung nuam sih ma uh ci.
11 “Mah hangin, Cungnungbel Topa Israel Pathian, keimah in nangmuh langpang tung a, Judah ngam cu siatsuah khawng tung hi.
12 A tang calam Judah mite, Izipt ngamah hawhin, a umtum peuhmah cu a venghawng bolal khawng haw tuk hi. A ngeng, a neu in Izipt ngamah ngal tei khutin maw, an ngawlin maw, thi khawng haw tuk a, mitei tamsiatnakin, a min haw cu man hi tuk hi.
13 Jerusalem ka bawlsiat zo bangin, Izipt ngam a ummite cu ngaldonak, pamnak le natnak tuah bawlsia tung hi.
14 A tang calam Judah mite, Izipt ngam a heng mite cu mihing pa khatno hei a nungmi le a suakca mi um haw tukma hi. Kiklehin, a um nuamzetnak mun haw Judah ngamah kuamah kikleh haw tukma,” ti hi.
15 Mahten panote cu a zi tei pathian dadang lakah biakpiaknak bawl haw tih a theitu tei lakah le mahlai a dingmi numei hempoh le Izipt ngam hanglam a ummi Israel mi venghawngin ka lakah hungin,
16 Topa i minin, “A hilhmi thu hempoh cu ngai nuam ma ung.
17 Bawl tuk ung ka tih uhmi hempoh cu bawl leng tuk ung. Ka pathiannu uh Vancung Kumpinu lakah biakpiaknak bawl tuk ung a, keimuh le ka pu le pa ten hihen, ka kumpite le keimuh puitute hei hihen, Judah ngam khua le Jerusalem khua lampi humah a bawl zo haw bangin, biakpiaknak a piakmi sabittui cu a humah leih tuk ung hi. Mah bangin ka bawl uh laihin, hausa le neinungin haksatnak imah tawk ma ung hi.
18 Mahnaven Vancung kumpi nu lakah biakpiaknak ka piak uh ngawl sawng le sabittui ka buak uh ngawl sawngin, ihempoh ting sam ung, ka mihingte uh vang ngal kut le an ngawlin thi haw,” ti hi.
19 Mah hum pen numei ten, “Vancung kumpinu mel cuangin, cangho em ung a, biakpiaknak sabittuite ka buak uhten ka pasal uhte cu ka bawlmi hum uhah a lungdamzet bok haw hi,” tin ti haw hi.
20 Mahti bangin a dontu pano le numei tei lakah keimah in,
21 “Nangmuh le na pu le pa uhten hihen, na kumpi uhte le na hotu uhten hihen, mipi ten hihen, Judah ngam khuasung le Jerusalem khua lampi humah na bawl uh hempoh cu Topa in thei kha tukma poh hi, a thei vangin phawkngil zo hi tin, maw na ngaihsut uh?
22 Tuni tianin, na ngam uh cu calubuak bangin mihing kuamah um haw ma. Mullinghahin, na thil sual bawl uhmi le thilpha ngawl na bawlmi uhte cu Topa in, a sup theih ngawl toh hangin na ngam min uh cu miten tamsiatnakin mang haw hi.
23 Topa i thupiakmi zui ngawlin pathian dadang lakah biakpiaknak na piak uh hangin hiti bang siatlalnak cu na hum uhah heng hi,” tin ti ing.
24-25 Cungnungbel Topa, Israel Pathian i awn cu Izipt ngam a, um Judah mitei lakah hilh ing. A cuangin, numei tei lakah hilh ing: “Nangmuh le na zi uhten Vancung Kumpi nu lakah thutepnak bawl uh ci. A lakah biakpiaknak bawl tukin le sabit biakpiaknak a hum a leih tukin thutepnak bawlin, na thutep uh bangin bawl ngangai uh ci. Pha leita poh hi; na thutep uh cu zui un. Na thutep uh bangin bawl khawng un.
26 Mahnaven keimah, Topa in, Izipt ngam a, um Israel mite na lak uhah, a nase zetmi ka min tuah tiamdunin, thu ka tepmi hi ngai hem un! ‘Ka min salin, a nungmi Cungnungbel Topa i minin, thutiamdun ing hi,’ tin kuamah in ti kha toh pahsuh un.
27 Ka mitmuh hei ah, neinungin umleh tukma toh uh ci, siatsuahmi hi saw tuk uh ci. Mi pa khat hei tang ngawl tianin, ngalkhutin maw, natnakin maw, thi khawng tuk uh ci.
28 Mahnaven mi demno bek thi ngawlin luat tuk uh ci, Izipt ngam pen Judah ngamah kik tuk uh ci. Mah hun bek ten akua i awn kaw a man saw tuk uh, keima awn maw, nangmu awn saw tih cu a tang calam mi demno ten theileh tuk uh ci.
29 Hi mun pen nohte cu dantat tung a, na hum uhah siatlalnak hengtik tung, tin ka thutepnak cu kim tuk, tih langtiknakin keimah, Topa in limlaknak pia tung hi.
30 Judah kumpi Zedekiah cu amah a that nuamtu a ngal Babilon kumpi Nebuchadnezzar khut sungah ka piak bangin Izipt kumpi Hofra cu a ngal le amah a that nuam tei khutah pia tung,” ti hi.Ref 44:30 2Kum 25:1-7;