3
Muantak Ngawlmi Israel
1 Topa in, “Mi pa khat cu a zi ma in, mah nu in, pano dang a pasal nungten mah nu cu a zi in mangleh ni maw? A mangleh tale, a ngam haw nawngkaitik khawng hi. Mahnaven Israel, nangin deihtu tampi na neih nungten ka lakah kikleh nuam ci.
2 Muallek hempoh khi zo in! Numei pha ngawlin na um ngawlnak mun pa khat bek um a maw? Phillawnah Arab miten ngal a pan haw bangin, lampi tuanah na ngaihmi ngak kinken bok ci. Numei phangawl na hihnakin, hi ngam cu nawngkaitik khawng zo ci.
3 Mah hangin nguahzu thei ngawlin phalbi nguahte tian a zuk ngawlnak hi. Na piandan hihimin numei pha ngawl bang zo toh ci a, zahcak tih hei nei lehma toh ci.
4 “Atu-in, ka lakah! ‘Nang cu ka pa ci a, ka naupang laih pen keimah deihtu hi zo ci.
5 Ka humah kumkhua in thinuk pahsun, na thin pulhang leleng tukma poh tin,’ ti hi. Israel, na kam pen mahtih bangin ti ci, mahnaven thil sual cu na bawl theihzah sung bawl sih ci,” ti hi.
Israel le Judah Sualsih Kul
6 Josiah i kumpi a deh laihin, Topa in ka lakah, “Numei pha ngawl bang a himi Israel i thil bawlmi hi mu cim? Ka lak pen tai in, mualsang hempoh le thingcam nuai hempoh ah numei pha ngawlin um hi.Ref 3:6 2Kum 22:1-23:30; 2Khang 34:1-35:27;
7 Hitih bang thil a bawl nungten ka lakah kikleh loli tuk tin ngaisung ing. Mahnaven kikleh ma pohpah. Muantak ahi ngawlmi a unau nu cu Judah in mu khawng hi.
8 Ka lakah a kihleh ngawl hangin le numei pha ngawlin, a um hangin Israel cu ma ing a, ka hawlvawknak hei Judah in mu khawng leng hi. Mahnaven muantak ngawl ahi bokmi Israel i unau pihnu Judah in launak neuno hei nei sap ngawlin amah vang numei pha ngawl cang bokin,
9 zahcaknak imah nei ma hi. Hi ngam cu nintik khawngin, suang le thingkungte bia in, mai pasal ang sung pen pano dang ngaitu in suakta hi.
10 Hiti bang nung hei ten Israel i unau numei pha ngawl Judah cu ka lakah a kikleh bang hengin um hi. Mahnaven a lungmu sung tatak tuah kikleh ma hi. Keimah, Topa in hilh zo ing,” ti hi.
11 Topa in, ka lakah, Israel in nunghek zo toh naven, muantak ngawlnu Judah sangin, pha saw deuh laih hi.
12 Mah hangin Israel i lakah hawh inna, “Muantak ngawl Israel ka lakah kiklehin hi. Hehpihnak neitu hi ing a, thinuk tuk mang hi. Kumkhua ngai in, na humah thinuk tuk mang hi.
13 Topa na Pathian lakah sual zo toh navecin, amah na donakte a ciangno in, phuang vanglakin hi. Ka thukhamte zui ngawlin thingcam nuai hempoh ah ngamdang tei khawhuai biakmi na ngaihnak thu phuang khawngta pohin hi. Keimah, Topa in hilh zo toh ing tin,” ti hi.
14 “Muantak ngawlte aw, kikleh un, keima ta hi uh ci. Khua pa khat pen mi pa khat ten le nam khat pen mi pa nih ten la tung a, Zion mualah kihpihleh tung hi.
15 Ka thu a zuitu hotute pia tung a, cihnak le theih theihnak tuah uk haw tuk hi.
16 mah ngam pen khangto tuk uh ci. Miten ka Thutiam Kuang thu kuamah in sonleh haw tukma toh. Mah thu cu ngaisungleh kha haw tukma toh, a phawk hei phawk kha nap haw tukma, a kul hei kulleh tukma toh hi. Mahti bang kuang hei bawlleh haw tukma toh poh hi.
17 Mah hun a hen ten Jerusalem khua cu Topa i khunnak mun ti haw tuk a, miphun hempohin, mahlai munah keimah bia tukin khawm haw tuk hi. A lungmu ngawngtawh le siasuak tuah bawlleh haw tukma toh.
18 Israel in Judah cu khawmin, sal a tannak haw mun saklam ngam pen mun khatin, na pu le pa tei lakah kumkhua ca in, ka piakmi ngamah kikleh haw tuk,” tin ti hi.
Pathian Mihing Tei Milim Biaknak
19 Topa in,
“Israel Ka capa hi tukin le,
ngam mawi le leihum pen
ngamphabel, na lakah
pia nuam ing.
Ka pa tin, na sam tukin le
ka lak pen taileh tuk
ngawltohin deih ing.
20 Mahnaven muantak ngawlmi
zi bangin,
ka ca in muantak ngawl
um lehcet mek ci.
Keimah, Topa in
21 Mualhum phul lak pen
aw nging pa khat za ing,
Israel mite suaksual zetin
nung haw,
Topa a Pathian haw cu
a phawhngilh khawng zo
haw hangin
a kahnak haw le
a ngetnak haw thawm vang hi.
22 Topa a nunghektu
mi hempoh kikleh un hi;
amah in damtik tuk a,
muantakmi in bawl tuk hi.
Noh ten, “Mahzuh hi, Topa i lakah kikleh ngai nung, itakaw titale amah cu eimuh tei Pathian hi.
23 Mualhum a pathian a biaknak uh hi ohtei ca imah nemcuamnak umma ngai zuh hi ven. Israel ca in patnak cu Topa a Pathian uh i lak bek pen heng hi.
24 Mahnaven zahcakhuai Baal pathian biaknakin, ni dang laih a pu le pa tei nadehman, a tuuhon haw le a khuihon bek tham ngawl, a canu capa haw tianin ei khawng hi.
25 Zakca in, zau thong tuk hung a, mualphonakin khuh tahen. Eimuh hihen, a pu le pa uhte hihen, Topa a Pathian uh i humah a khangno laih uh pepan tusun tian a sual lelengtu hi hung. Itik hei ten ama thu ngai ngawltu hung hi,” tin ti uh ci.