38
Tuikhuk Sungah Jeremiah Khia Haw
1 Mattan i capa Shefatiah, Pashhur i capa Gedaliah, Shelemiah i capa Jehukal le Malkiah i capa Pashhur ten mipi lakah,
2 Topa i awnkam ka hilhmi, “Hi khuapi sung a, a tangmi cu ngal khut tuah maw, tui le an ngawlin maw, mahma tale natnakin thi tuk uh ci. Mahnaven Babilon tei lakah hawhin, a apdunte cu that ngawlin a nunnak haw cu khawih hi tuk tin,” ka tihmi za haw hi.
3 Mah bek sial ngawlin Topa i hilhmi, “Hi khuapi cu Babilon ngalkap tei khutah pia tung a, la haw tuk,” a tihmi vang mipi tei lakah hilh ing.
4 Mah bawite cu kumpi lakah hawhin, “Hi pa hi thah tuk hi. Hitih bangin a otnak bangin khuasung ngalkapte a thanemin, khua sungmi hempoh ca in thanemnakin cang khawng hi. Mipi bop tum ngawlin haksatnak deih saw,” tin ti haw hi.
5 Kumpi Zedekiah in, “Mahti bang ahi tale, nangmu deihnak bangin bawl un, kham thei mang tin,” ti hi.
6 Mah hangin kei cu la haw in, kumpi inncingtu tei innah a ummi kumpi i capa Malkhiah i tuikhuk, sungah khau tuah khiasuk haw hi. Tuikhuk sungah tui umma, cinciak bek um, mah sungah nimsukdun pupul ing.
7 Mahnaven kumpi inn a, nadektu Ethiopia mi tilngeh pa Ebedmelech in tuikhuk sungah a khiak haw cu za hi. Mahlai hun a, kumpi cu Benjamin kongka tihmi ah thu a son lih laihtak hi.
8 Mahlai ah Ebedmelek cu hawhin, kumpi lakah,
9 “Kumpipa aw, na khutnuai bawi tei bawlmi hi thil sual hi. Jeremiah cu tuikhuk sungah khia haw, mahlai ah an ngawlin thi loli tuk, itahim titale hi sungah an umleh ma toh tin,” ti hi.
10 Kumpipa in ka thih laih ngawlin tuikhuk sung pen doktultu tukin Ebedmelek le midang pa thumte thupia hi.
11 Ebedmelek cu midang pa thumte tuah kumpi na koihnakah hawhin, puansia la haw a, khau tuah khiasuk haw hi.
12 Khau in ka baan a natik tuk ngawlin, ka baan nuai pen puansia dam tukin hilh hi. A hilh bangin bawl ing.
13 tuikhuk sung pen doktulleh haw hi. Mah nungten inncingtu tei inn thawnginn huang sung lengah koih haw hi.
Zedekiah In Jeremiah Thusiampih
14 Vei khat cu kumpi Zedekiah in Biakinn tumnak kongka pa thumnak pen samin, ka lakah, “Thu pa khat dong tuk veng, thuman na son tuk deih ing ti hi.”
15 Keimah in, “Thudik ka hilh tale that tuk sisi; ngaihsutnak ka pia hei in imah simsial kha tuk bo ci,” tin ti ing.
16 Mah hangin kumpi Zedekiah in, a kuhno thutiamin, “A nungmi Pathian min salin tiam ing hi, nunnak a petu Pathian minin; that hihim tuk mang, nangmah thah a nuamtu tei khut sungah hei pia tuk mang tin,” ti hi.
17 Cungnungbel Topa, Israel i Pathian thu cu Zedekiah lakah hi bangin hilh ing hi: “Babilon kumpi khutnuai bawi tei lakah na piadun tale na nunnak cu khawih haw tuk a, hi khuapi vang haal haw tukma. Nangmah le na innkuate cu him tuk uh ci.
18 Mahnaven na piadun ma tale hi khuapi hi Babilon khutah piak hi tuk a, ziam bilhbelhin halkang haw tuk a, nangmah vang luat tukma ci tin ti ing.”
19 Mahnaven kumpipa in, “Babilon tei lakah a taitu eimu ngamsung mite lau ing. A khutsung hawah ka heng tale bawlsia loli haw tuk tin,” ti hi.
20 Mahten kei in, “A khut sungah piak hi tukma ci. Topa i awnkam saw hi phano ngai le ci tin ngen ing. Na ngai ahi tale ihempoh pha khawng tuk, na nunnak vang khawih haw tuk hi.
21 Mahnaven amu lakah na piadun ma tale i cang tuk tih cu Topa in lak zo toh hi.
22 Mahmi ka muhnakah Judah kumpi innah a tangmi numei hempoh hi Babilon kumpipa i khutnuai a bawi tei lakah hawhpih khawng a hihnak haw tuk mu ing. A hawh thahin, Zedekiah lakah a son haw mi hi ngai tehin:
Kumpipa cu a ngualcam ten
hawhpih sual zo haw hi.
A humah thunei leita haw hi.
Atu-in, a ke cu
cinciak sungah nim zo.
A ngual ten zamsan khawng
tin ti haw hi.’ ”
23 Mah i humah, “Na zi le cate hempoh cu Babilon mitei lakah pui khawng hi haw tuk hi. Nangmah vang cu a khut sung haw pen luat cuang tukma ci. Babilon kumpipa in thawngah khia in, hi khuapi hi kang tumbelhin haal haw tuk tin ti ing.”
24 Zedekiah in, “Hitih bangin thu a son ngel uhmi hi kuamah theitik pahsun. Na nunnak ca vang lau tuk imah umma hi.
25 Nangmah tuah thu a son kawmnak uh hi bawi ten a thei kha meng haw tale cu na lakah hung haw tuk a, thu a son kawm uhmi hi dongleh haw tuk hi. Na hilh khawng tale that tukma ung tin tiam haw tuk hi.
26 Thawnginnah kuatlehin, thitik zazal ma le ci, tin ngen ing; tin ti thongpoh ing,” ti hi.
27 bawi upate cu hungin, thu cu dong ngangai haw, mahnaven kumpi i tepnak bang cikcekin hilh ing. Amuh vangin bawl theihmi imah nei sap haw ma. Itahim titale kumpipa tuah thu ka son kawmnak uh a theitu kuamah um haw ma.
28 Kumpi inncingtu tei innah koih haw in, Jerusalem a laktum ni haw tian mahlai thawnginn huang sungah koih haw hi.Ref 38:28 Ezk 33:21;