39
Jerusalem Caksuknak
1 Zedekiah in Judah kumpi a deh kum kuahnak, ha sawm ha in, Babilon kumpi Nebuchadnezzar cu a ngalkap venghawng tuah hungin, Jerusalem do haw hi.
2 Zedekiah in kumpi a dehnak kum sawm le kum khat, ha li ha, ni kuah ni-in, khua kulhtian cu siatsuah thei haw hi.
3 Jerusalem khuapi a lak luh haw ten Babilon kumpi khutnuai a bawi upa hempoh hung haw a, kongka lai a tihmi hawah khung khawm haw hi. Mah mite cu Negal Serezer, Sangar Nebo, Sarsekhim le adang Nergal Sarezan haw hi.
4 Mahmi cu kumpi Zedekiah le a ngalkap ten amuh haw ten khuapi sung pen zanlamin tai kuh tum haw hi. Kumpi huan sung lampi pen tulin khuapi kulhtian thuah nih a pehduntu kongka lampi pen tulin, Jordan munlawn lampi pen tai haw hi.
5 Mahnaven Babilon ngalkap ten hilin, Zedekiah cu Jerikho khua el munlawn pen man ngah leng haw hi. Kumpi Nebuchadnezzar lakah hawhpih haw hi. Nebuchadnezzar cu Hamath peng sung Riblah khua ah umin, mahlai pen Zedekiah i thu cu son hi.
6 Riblah khua ah Zedekiah i capate cu a pa i muh cilcelin Nebuchadnezzar in that hi, Judah ngamsung a bawi upate vang that khawng hi.
7 Mahceng ten Zedekiah mit cu pholhsakin, Babilon ah hawhpih tukin thik taicin tuah khihin zam hi.
8 Mahti bangin a bawl laihtakin, Babilon ngalkap dang ten kumpipa i inn le mipi tei innte halin, Jerusalem khua kulhtiante vang siatsuah khawng haw hi.
9 A nung dawlbelah ngalkap hotu, ngalbawi Nebuzaradan in Jerusalem khuapi sungah a tanglaih mite le ama lakah a zuantute khi sal tukin Babilon ah hawhpih hi.
10 Judah ngamah mi ca-ngahbelte, van le lo ngam a nei ngawlte cu sabit huan le lo ngamte pia in, zam hi.
Jeremiah Suakca
11 Mahnaven Nebuchadnezzar in ngalkap hotu ngalbawi Nebuzaradan lakah thupia in,
12 “Jeremiah zei tukin hawh inna, phano in cingkhawi in hi. Haksatnak pia pahsun, a deih hempoh bawlsak saw in,” ti hi.
13 Mah hangin Nebuzaradan le bawi dang Nebushazban, Nergal Sarezer le a dang bawi upa dadang hung khawngin,
14 Kumpi inncingtu tei umnak a, a koihnak haw pen suaktul haw hi. Keimah humhim tukin dehvo a piak haw mi Ahikam capa le Shafan i casuan Gedaliah i cinkhawi tukin koih haw hi. Mipi tei lakah um ing.
Ebedmelek Ca In Muansannak
15 Kumpi inncingtu tei umnak innah, a koih haw laihin, Cungnungbel Topa, Israel i Pathian in,
16 Ethiopia mi Ebedmelech lakah hilhin hi: “Bawl tung ka tih bangin hi khuapi tei lakah khantohnak hi ngawl, siatsuahnak hengtik tung hi. Mah hun a hen ten amutu hi bok tuk ci.
17 Mahnaven, Keimah, Topa in nang cu hup tung a, na lau mitei lakah piak hi tukma ci.
18 Nangmah hup tung a, kuamah in that haw tukma. Keimah na muan zo toh hangin, na nunnak cu himdamin luat tuk ci. Keimah, Topa in hilh zo toh ing, tin ti in hi.”