36
Baruch In Biakinn Sungah Laizial Sial
1 Josiah capa Jehoiakim cu Judah kumpi a deh, a kum linak ten Topa in ka lakah,Ref 36:1 2Kum 24:1; 2Khang 36:5-7; Dan 1:1-2;
2 “Laizial la inna, Israel le Judah miphun hempoh tei thu ka hilhmi hi ngan khawngin hi. Josiah i kumpi nadeh laih a, na lakah a masabel ka ot ni pepan tusun tian ka hilhmi thu hempoh ngan khawngin hi.
3 Judah tei humah siatsuahnak ka hentik nuammi hi thei in, a nundan haw ngen khelleh thei haw bang a hin, a sualnak le a phat ngawlnak haw cu ngaidam tuk na veng,” ti hi.
4 Mah hangin Neriah capa Baruch cu samin, Topa in ka lakah a hilhmi hempoh cu ngan tukin auh ing. Baruch in laizial sungah khum khawng.
5 keimah in Baruch lakah, “Kei cu Biakinn sungah hawh theihnak thu ngahleh ma toh ing.
6 Mah hangin nangmah na hawh tuk deih ing. Mailam an a canleh hun haw ten hawhin hi. Laizial hi nging zetin sial inna, mahten Topa in ka lakah a otmi, ka auhmi hempoh hi mipi ten za khawng haw tuk hi. Mi hempoh amu khua tek pen a hungmi Judah mitei zak khawng theihnak mun pen ngingzet sialin hi.
7 Topa i lakah thungenin, a nundan pha ngawlte zamsan khawng haw na maw ti hi. Itahim titale hi mihing tei humah Topa in, a lauhuaimi a thinuknak leihsuk tum tin ti ing.”
8 Baruch in keima hilhnak bang cikcekin, Biakinn sungah Topa i awnkam cu sial hi.
9 Jehoiakim in Judah kumpi a deh kum nganak, ha kuah ha in, Topa i mitmai pha co nuamin, mipite cu an cangleh haw! Jerusalem khua sungah a ummi le Judah ngamsung khuapi pen a hungmi hempoh ten ancang haw hi.
10 mi hempoh tei thu ngaih laihtakin, ka hilhmi cu laizial sungta bangin a venghawngin, Baruch in nging zetin sial khawng hi. Biakinn sung pen sialin, mahmi inn khan sung a, nadektu Shafan capa Gemariah i khan sung pen sial hi. A khan cu humta khan Biakinn Kongka Thak tihmi el pen hi.
Bawi Upa Tei Lakah Baruch In Sial
11 Baruch in, Topa i awnkam laizial sung pen a sialmi cu Shafan tupa Serimiah i capa Mikaiah in za bok hi.
12 Mikaiah cu kumpi inn a, laingantu pa i khanah bawi tei tawhdun khawm laih takin hawh hi. Laingantu Elisha, Shemaiah i capa Delaiah, Akbor i capa Elnathan, Shafan i capa Gemariah, Hananiah i capa Zedekiah le bawi dadang vang um haw hi.
13 Baruch in mipi tei lakah a sonmi thu cu Mikaiah in, a zaknak bangin a lak hawah sonleh sawlawn hi.
14 bawi ten Jehudi (Nethaniah i capa, Shelemiah casuan Kushi i casuan) cu hahin, mipi tei lakah a sialmi laizial keng tukin le Baruch hilh tukin a tik haw hangin Baruch in laizial cu keng hi.
15 Bawi ten, “Khung inna, laizial cu sial hemin,” a tih haw hangin Baruch in sial hi.
16 A sialcelh ten pa khat le pa khat thinsu in zodun leng haw in, “Kumpipa hilh kul tuk,” tin Baruch cu ti haw hi.
17 Baruch lakah, “Hilh hemin, itin kaw hi tih zazah na ngat theih? Jeremiah in auh maw i kaw?” tin dong haw hi.
18 Baruch in, “Jeremiah in awnkam khatno hei zam phawk ngawlno in, auh in, hi laizial humah laitui tuah ngan ing hi,” tin don hi.
19 Amuh ten, “Nang le Jeremiah cu na ngelh uh kul tuk hi. Na ngelhnak uh cu kuamah hilh pahsuh un hi,” tin ti haw hi.
Kumpipa In Laizial Haal
20 Bawi upa ten laizial cu laingantu Elishama khanah zamta haw a, kumpi khanah hawhin kumpi lakah mah thu cu a venghawngin hilh khawng haw hi.
21 kumpipa in laizial cu a la tukin Jehudi cu hah hi. Jehudi in Elishama khan laihta cu la in, Kumpipa le a el a dingtu tei lakah laizial cu sial hi.
22 Phalbi a hih hangin bawipa cu a phalbi innah mei awi in khung.
23 Jebudi in, a lai cu sialin lai mai thum, mai li bang a sial ten kumpipa in nam tuah at balin, mei sungah haal hi. Laizial a bo laklawhin mei sungah khe lelem hi.
24 Mahnaven kumpipa hihen, a khutnuai a bawite hihen, laizial sung a thu thei khawng haw naven lau dan tuk hei thiam haw ma, thasiatnak tuk vang thei haw ma hi.
25 Elnathan, Delaiah le Gemariah ten laizial cu a haal tuk ngawlin kumpipa cu lem li haw naven imah simsial kha ma.
26 kumpipa in keimah le ka cazi Baruch cu a man tukin kumpipa i capa Jerahmeel cu Azriel capa Seraiah le Abdeel capa Shelemiah tuah thupia hi. Mahnaven Topa in keimuh sel hi.
Jeremiah In Laizial Dang Ngan
27 Kumpi Jehoiakim in Baruch ka auhmi laizial cu a haal ceng ten Topa in,
28 laizial a dang la inna, a masa laizial sungah a ummi hempoh nganleh khawngtik hi.
29 Topa in, kumpipa lakah hi tih bangin a hilhtik hi. “Laizial cu haal zo ton ci, mahten Jeremiah cu hi ngamah Babilon kumpi hung tuk a, hi ngam le a sung a ummite le nganhingte siatsuah khawng tuk tin ita ngan kam? tin dong zo toh ci.
30 Mah hangin keimah, Topa in, nang kumpi Jehoiakim hilh pah ing cuh, phano ngai in! David ukmi ngam hi na casuan kuamah in uk awng haw tukma. Na luang cu khuahialah vawkthongin um tuk, sunlamin nisa in em tuk a, zan lam ten daita in khiak tuk hi.
31 Na venghawng uhin, na bawl uhmi sualnak i hangin nangmah le na casuante le na khutnuai a bawite cu bawlsia tung hi. Nangmah in hihen, Jerusalem mi le Judah mite hei in ngallinnak ka piakmi imah na sial uh ngawl hangin hengtik tung tin, ka hilhsa mi siatsuahnak cu na venghawng uh humah hengtik tung,” ti hi.
32 Mahten laizial dang pa khat laleh ing a, ka cazi Baruch lakah pia ing, ka auhmi hempoh a sungah khum khawng hi. Amasa a, laizial sungah a ummi hempoh le a bangten mi thudang tampi vang ngan khawng hi.