35
Jeremiah Leh Rekhab Mite
1 Josiah capa Jehoiakim cu Judah kumpi a deh laihin, Topa in ka lakah,Ref 35:1 2Kum 23:36-24:6; 2Khang 36:5-7;
2 “Rekhab miphun innkua hempoh ah hawh inna, thuhilhin hi. Biakinn sung a, a khan pa kha khat sungah pui inna, sabittui pia in,” ti hi.
3 Mah hangin Rekhab hinnamte, Habazziniah i capa midang Jeremiah i capa, Jaazaniah le a unaute le a capate cu
4 Biakinn ah pui ing. Igdaliah capa profet Hanan i nungzui tei khanah umtik ing. Hi khan cu Biakinn a thuneitu bawi Shallum i capa Maaseiah i khan humah bawi dadang tei khan elah hi.
5 khuat le sabittui kuangdim cu Rekhab mitei mai ah koih ing a, “Sabittui in un hi,” tin ti ing.
6 Mahnaven amuh ten, “Sabit tui in ma ung, ka pu uh Rekhab capa Jonadab in keimuh hihen, ka casuan uhte hihen, sabittui in hihim pahsuh un hi ti.
7 Inn sak tuk le inn neih tuk vang kham hi; lobun le sabit huan bawl vang awi ma, a lei hei lei pahsuh un tin ti hi. Hi ngam sungah mikhual bangin a ka um uh laihin, hi ngam sungah ka um leng theihnak tuk uhin puanbuk sungah um tukin thupia hi.
8 Jonadab i hilhmi le a thupiakmi hempoh zui khawng ung. Kohte sabittui in awng ma ung; Ka zi uhte, ka canu le ka capa uhte ten inbok haw tukma hi.
9-10 Keimu umnak tuk inn hei sa awng ma ung. Puanbuk sungah um ung; sabit huan, lo le an tih hei nei ma ung. Ka pu uh Jonadals i thupiakmi hempoh cu a kimno in zui khawng ung hi.
11 Mahnaven kumpi Nebuchadnezzar hi ngam a do ten Babilon ngalkap, Siria ngalkapte lau in, tai in, Jerusalem ah hawh nung tin ti ung; mah hangin atu-in Jerusalem ah um ung tin ti haw hi.”
12-13 Mahten Cungnungbel Topa, Israel i Pathian in, Judah le Jerusalem tei lakah hawhin, hi bang hilhtik hi. “Keimah, Topa in, itakaw ka thu hilhmi ngai nuam ngawlin le ka thupiakmi na zui nuam ngawl uh? tin dong ing.
14 Rekhab miphunte cu a pu haw Jonadab i thupiakmi cu a casuan ten zui in, tusun tian kuamah in sabittui in haw ma hi. Mahnaven nohte cu hilh li naveng ka thu zui nuam ma uh ci.
15 Ka sal profet pa khat nung pa khat nangmu lakah hah leleng ing. Aman mi bawlin, thil sual bawlnak nundan zam tukin hilh li haw hi. Na pu le pate le nangmu lak a ka piakmi, hi ngamah na um leleng theihnak tukin, pathian dang tei nadek li tuk ngawlin le bia tuk ngawlin hilh li haw hi, ngallinnak vang pia haw hi. Mahnaven ka thuhilhmi cu ngai ngawlin, imah simsial ma uh ci.
16 Jonadab i casuan ten a pu haw i thupiakmi mang haw naven, noh ten ka thu zui ma uh ci.
17 Mah hangin noh Judah mi le Jerusalem mite nangmu humah Cungnungbel Topa keimah, Israel i Pathian in ka tepsami bawlsiatnak hempoh hengtik tung hi. Hitih bangin, na hum uhah hengtik tung, itahim titale nangmu lakah ka ot ten ngai nuam ngawlin, ka sam ten don nuam sih ma uh ci,” ti hi.
18 Rekhab casuan tei lakah, Cungnungbel Topa, Israel i Pathian in, “Na pu uh Jonadab i thupiakmi cu zui khawng zo uh ci. A thuzilhmite vang ngai in, a hilhmi daan hempoh vang zui khawng uh ci.
19 Mah hangin keimah Cungnungbel Topa, Israel i Pathian in, thutiam ing. Rekhab capa Jonadab cu ka nadektu tukin casuan, capa a catngawlin nei leleng tuk hi,’ tin hilh ing.”