34
Zedekiah Thuhilhnak
1 Babilon kumpi Nebuchadnezzar le a ngalkapte cu a khutnuai miphun hempoh tei ngalkap ten Jerusalem le a elkim khua a do lih haw laihin, Topa i thu cu ka lakah heng hi.Ref 34:1; 2Kum 25:1-11; 2Khang 36:17-21;
2 Topa Israel i Pathian in Judah kumpi Zedekiah lakah hawhin, hi tin hilhtik hi, “Keimah, Topa in hi khua cu Babilon kumpipa i khutah pia tung a, amah in ziam bilhbelh tian haal tuk hi.
3 Luat tukma ci; manin Babilon kumpipa i khutah piak hi tuk ci. Maitonin, amah cu mu tuk ci a, otpihdun tuk uh ci, mahten Babilon ah hawh tuk ci.
4 Zedekiah na lakah, ka otmi hi ngai hemin! Ngaldonakah thi tukma ci.
5 Mengdenin thi tuk ci; na laih ngawlin kumpi na a dektu na pu le pate a vui haw ten namtui a haal haw bangin nangma ca vang namtui haal bok haw tuk hi. Kah li haw tuk, ‘A kumpipa uh thi thong cu aw!’ tin ti haw tuk hi. Keimah, Topa in hilh zo ing,” ti hi.
6 Mah thu cu Babilon kumpipa i ngalkap ten,
7 Jerusalem khua do lih haw laihin kumpi Zedekiah cu hilh ing. Babilon ngalkap ten Lakhish le Azekah khua vang cu heh tin do li bok haw; hi khua pa nih cu a tangcalam kulhtianmi Judah khuapi pa nih haw hi.
Silate Zol Haw
8 Kumpipa Zedekiah le Jerusalem miten kuamah in ka miphun uh Israel mi lala cu sila in khawihdunleh tukma toh hung.
9 Hebru mi salte cu numei hihen, pano hihen, luattik khawng tukin lungkimnak bawl haw hi.
10 Mipi le a hotute cu lungkim khawng haw in, a salte hah khawngin, matleh tuk ngawlin lungkim khawng haw hi. A lungkimnak haw bangin hah khawng haw hi.
11 Mahnaven a lungmu haw khellehin, manleh khawng haw a, sila in bawlleh khawngta leleu haw hi.
12 Topa,
13 Israel i Pathian awnkam cu mipi tei lakah hilh tukin ka lakah heng hi; “Izipt ngam saltannak pen na pu le pa uhte pansuakin ka luattik ten amuh tuah thutiamnak bawl ing.
14 Hebru mi kum luk sung sal a hih ceng ten a kum salihnak cu luattikin, tin hilh ing. Mahnaven na pu le pa ten ka thuzui haw ma. Ka hilhmi hei ngai haw ma.Ref 34:14 Suah 21:2; Daan 15:12;
15 Tuno hah na lungmu uh thekin, ka lungdam tukin bawl uh ci. Na phunpih uh Israel salte cu hah khawng tukin lungkim khawng uh ci, keimah na biaknak uh Biakinn sung pen keima mitmuh loli ah thutiamnak bawl uh ci.
16 Mahnaven na lungmu uh khel leleu in, ka thangsiatnak bawl leleu uh ci. Na venghawng uhin, amu deihnak bangin na hahsa uhmi salte cu manlehin, salin bawl leleu uh ci.
17 Mah hangin keimah, Topa in ka thuzui ma uh ci, tin ti ing. Na phunpih uh Israel mite cu luattik ma uh ci. Pha poh hi, nangmuh vang luatnak pia bok tung. Ngaldonak le pamnak, natnakin thih theihnak pia tung hi. Na hum uhah ka bawlmi in, leihum miphun hempoh thinsu tawtokin bawl tuk hi.
18-19 Judah ngam le Jerusalem khua sung bawite, kumpi inn a, bawite, thiampite le hotu hempoh ten khuicang pa khat ngo in, a ngumzaang kek pen phel nih laizangah hawhin, keimah tuah thutiamnak bawl haw hi. Mahnaven ma thutepnak cu siatsuahin, zui tuk a tih haw mi hei zui haw ma. Mah hangin khuicang humah a bawl haw bangin, hi tei humah bawlbok tung.
20 Amuh thah tuk a nuamzettu a ngal tei lakah pia tung a, a luang haw cu vano le ngamsa ten ei haw tuk hi.
21 Judah kumpi Zedekiah le a khutnuai a bawite amuh a that nuam tei lakah pia tung. Nangmuh do ngawlin a cawltu Babilon ngalkap tei khutah pia tung hi.
22 Mah ngalkap tei humah thupia tung a, khuapi ah kikleh haw tuk hi. Do in, neh haw tuk a, halkang haw tuk hi. Judah khua cu kuamah um ngawlnak phillawn bangin bawl tung hi. Keimah, Topa in hilh zo toh ing,” ti hi.