33
Muansannak Thutepnak Dang
1 Kumpipa i inncingtu khan sung a thawng ka tan laihin, Topa i thu cu ka lakah hengleh hi.
2 Leipi a bawltu a siamtu le a umnak munah a phuttu Topa in, ka lakah hilh hi. A min Topa a himi in,
3 “Sam inna, donleh tung. Na theih awng ngawlmi thasiahhuai na lamdang hilh tung hi.
4 Topa keimah Israel Pathian in, Jerusalem a innte le Judah ngam a, kumpipa inn cu ngal ten kilin, a do tawtok haw hangin cim khawng tuk tin hilh ing.
5 Mi khenkhat ten, Babilon mite cu do bok haw tuk; mahnaven amuh ten ka thinuknak le ka thin pulhangnakin, ka siatsuah tummi innte cu miluang tuah dimtik haw tuk hi. Hi ten thil sual a bawl haw hangin hi khuapi cu nung hek zo toh ing.
6 Mahnaven hi khuapi le a mihingte cu dam lehtik tung, damseuhtik tung a, amu lakah lungnopnak le lemdaihnak cangkim hengtik tung.
7 Judah le Israel cu khangtotik tung a, a masa bang lengin tungdingleh tung hi.
8 A sualnak haw le ka humah a khelhnak haw cu somciang siuhseuh tung a, sualnak haw le ngal a thawhnak haw cu ngaidam khawng tung hi.
9 Jerusalem cu ka ca in lungdamnak, maitainak le ultunnak bulpi hi tuk hi. Jerusalem tei ca in thilpha ka bawlmi le hi khuapi ca in khantohnak ka hentik mi cu leihummi hempohin, a zak haw ten lau in, can li haw tuk,” ti hi.
10 Topa in, “Mipi ten hi mun cu phillawn ngam bang hi, mihing hihen, ngamsa hihen imah umma tin ti haw hi. Mahzuh hi, a man hi. Judah le Jerusalem khuasung lampite cu khing diudeu ngai hi. Mihing le ngamsa imah um viang ma. Mahnaven hi munte ah,
11 lungdam thatuinak thawm le mopuai thawmvang zaleh tuk uh ci. Mihing ten ka biakinn ah lungdam biakpiaknak pia tukin lasa thahin, a hun haw za tuk uh ci. Amuh ten,
‘Cungnungbel Topa i lakah,
lungdamnak pia un,
Itahim titale amah cu pha hi;
A ihnak cu
kumkhua in kho hi,’
tin ti haw tuk hi.
Hi ngam cu a ni dang laih bangin, khangto lehtik tung. Keimah, Topa in hilh zo ing.”Ref 33:11 1Khang 16:34; 2Khang 5:13; 7:3; Ezr 3:11; Sam 100:5; 106:1; 107:1; 118:1; 136:1;
12 Cungnungbel Topa in, “Hi ngam phillawn a bangmi, mihing le ngamsa um ngawlnakah tuucing ten a tuu khal haw tuk hi.
13 Mualhum ngam a khua, mual bul a ngam, Judah ngam hang lamah Benjamin ngamsung, Jerusalem khua el a khuanote le Judah ngam khua ah tuucing ten a tuu haw sialleh li haw tuk hi. Keimah, Topa in hilh zo ing.”
14 Topa in, “Israel le Judah tei lakah ka thutepmi a kimnak hun heng tuk hi.Ref 33:14-16 Jer 23:5-6;
15 A kumpi haw tukin David casuan micip pa khat teng tung. Mah kumpi in hi ngam sungah thudik le thuman bawl tuk hi.
16 Judah mi le Jerusalem mite cu patsuah hi haw tuk a, ngimta zetin um haw tuk hi. Hi khuapi cu, ‘ Topa, kohtei Himnak,’ tih hi tuk hi.
17 Israel kumpi cu David casuan hi ngut tuk hi.Ref 33:17 2Sam 7:12-16; 1Kum 2:4; 1Khang 17:11-14;
18 Keima nadektu le meihal biakpiaknak piatu le cangho vam biakpiaknak a dadang piatu tukin Levi hinnam sung pen thiampi dek leleng tuk, tin Topa keimah in thutiam ing,” ti hi.Ref 33:18 Mipum 3:5-10;
19 Topa in, ka lakah,
20 “Sun le zante cu amu um bang lengno um tukin, amuh tuah thutiamnak bawl zo toh ing. Mah thutepnak cu siatsuahleh theihmi hi tukma toh hi.
21 Mahti bang lelengin, a casuan ten kumpi na dek leleng tu hi tukin ka salpa David tuah thutepnak bawl ing a, keima na dek lelengtu hi tukin Levi hinnam thiampite tuah thutepnak bawl zo toh ing hi; hi thutepnakte cu khelhleh thong theih tukma toh hi.
22 Ka salpa David casuante le Levi hinnam thiampite cu pungzaitik tung a, van a aksi le tuipi thuanthum mawk a, philnel sial celhngawl bangin sialcelh ngawlmi hi bok haw tuk,” ti hi.
23 Topa in ka lakah,
24 “Miten ka tensa mi innkua pa nih Israel le Judah hi lawl zo toh hi tin, a son lih haw cu za zo toh a ci maw? ka mihing Israel le Judah mite cu nautatin, miphun tih hei in sialleh haw ma toh.
25 Mahnaven keimah, Topa in, sun le zan thutiamnak bawl ing hi, lei le vante a uktu daan hei bawl ing.
26 Hi nate a bawltu ka hih bangin Jakob casuante le ka nadektu David tuah ka bawlmi thutiamnak cu kho lengtik tung hi. Abraham, Isaak le Jakob casuante uktu tukin David casuan pa kha khat teng tung. Ka mihing tei humah hehpihnak nei tung a, mi neinung zetin bawlleh tung,” ti hi.