2
Pathian In Israel Cingkhawi
1 Topa i awn cu ka lakah hengin;
2 Jerusalem khuasung a ummi hempoh lakah a nuailam bangin hilhin ti hi.
“Khangno na hih laihin
muantak na hih zia le
a huaidun sem uh laih a,
na itnak cu cing leleng ing.
Phillawnah zui in,
kuamah i bun
awng ngawlmi ngamah zui ci.
3 Maw Israel, nang cu
keimah bek ita hi ci,
ka neihmi mi thiangtho ci.
Nangmah a bawlsiatu i humah
haksatnak le siatsuahnak
hengtik ing.
Keimah, Topa in
hilh zo ing.”
Israel Pupa Tei Sualnak
4 Jakob casuan, Israel i cikhaih mite,
Topa i thu hilhmi
hi ngai hem un:
5 Topa in,
na pu le na pa uhten
ka humah i sualnot tuk kaw
a neih haw?
Itakaw keimah nung a hek haw?
Nemcuam ngawlmi
milim bia in,
amuh nangawn hei
phukthong haw hi.
6 Keimah simsial viang haw ma,
suahtultu Pathian ti awng haw ma;
Izipt ngamsung pen suahtul ing,
hampa lak pen lamhuai ing;
Phillawn ngam le phil khuk thukmi
ngamko le a lauhuaimi ngam,
kuamah i hawh ngawlnak le
um awng ngawlnak
ngamsung pen
lampui li naveng kinmawh
kha haw ma.
7 Ngamphazet sungah,
ngamsung suakmi thilpha le
a ngahte ei tukin henpih ing.
Mahnaven ka ngam siatsuah
lamsangin, ka piakmi ngam
nawngkaitik thong haw hi.
8 Thiampi ten, ‘ Topa ilai ah
um kaw?’ tih hei
dong kha viang haw ma.
Daan a tawngkhatu
ka thiampite hei in,
kei theileh haw ma toh.
A hotu ten keimah dodalin,
a profet hei in,
Baal khawhuai min salin,
thuhilhin, imah ahi ngawlmi,
milim bia leng haw hi.
Pathian In A Mihingte Siat
9 Mah hangin Keimah, Topa in,
ka mihing tei humah
siatnak thuson tung.
A casuan tei hum hei ah
thunei tung hi.
10 Nitumnak lam pen
Saipras tuikulh tian
hawh unna; nisuahnak lam pen
Kedar ngam tian
mi hah un hi!
Hitih bang thil a piangmi
mu awng tukma uh ci.
11 Miphun dang kuamah in,
pathian ngai ahi ngawl hei in,
a pathian thek haw tih za awng mang!
Mahnaven ka mihing ten
a Pathian haw kei cu thek haw hi.
A hum haw a,
sunloihnak a hentu
Pathian cu, amu ca
imah a nemcuam kha ngawl,
khawhuai tuah
thek thong haw hi.
12 Mah hangin, vante aw,
thasia zetin hing khawng un.
Khawngai, lungsia in,
can tetek khawng un.
13 Itahim titale ka mihing ten
sualnak nam nih bawl hawta hi.
Nunnak ciktui keimah cu lawlin,
tui a ting thei ngawl,
tui kang theihnak munah
tuikhuk co haw hi.
Muantak Ngawlmi Israel Sual Thaman
14 “Israel cu sal kha ma hi.
Ngulhmi sal hei hi awng ma.
Mahnaven itakaw a ngal ten
suk le to ah
sim kawkawi haw hi.
15 A ngal ten kiosa bangin
a auh san haw?
A ngam haw cu phillawnah
cangtikin,
A khuapi haw cu khualopah bawlin
taisan khawng haw hi.
16 Mahzuh hi, Memfis mi le
Tahpanhes miten
a lu nguh kehtik haw hi.
17 Maw Israel, lampi a,
ka hawhpih laihin,
Topa na Pathian
Kei na zamsan hangin,
hi bang siatnak na humah
hengtik hi kha ma cim?
18 Izipt ngamah hawhin,
Nail ngunpi tui na in hangin
imi ngah tuk hengin kaw
na ngaih sut?
Assiria ngamah hawhin,
ilawh tuk nge cim?
Nail ngun tuipi na in hangin
i ngah tukin kaw
na ngaihsut?
19 Nangma sualnak bawlmi lala in
nangmah bawlsia tuk a,
lam na pialnakin
nangmah mawhsiat tuk hi.
Keimah, Topa na Pathian
nunghek ci a,
ka humah kihcaknak
na neih ngawl toh hangin
na ca in, thilpha ngawl
a hihlam thei tawto tuk ci.
Ihempoh tithei,
Topa, Cungnungbelin
hilhham zo ing,” ti hi.
Israel In Topa Bia Nuam Ma
20 Cungnungbel Topa in,
“Israel, ni dang laih pepan
ka thu el zo ci.
Ka thu zui nuam ngawlin,
keimah bia nuam ma ci.
Mual sang hempoh le
thinglim nuai hempoh ah
milim bia in, numei pha ngawl
bangin um ci.
21 Sabit ngui phabel sung pen
a pha saw deuh bangin
phut ing.
Ci pha sung pen
tenmi hi ci.
Mahnaven iti bang
nge cim tih zo hemin!
A muat a uihmi le
nemcuam ngawl
sabit ngui in cang zo ci.
22 Sahphio phabel tuah
na som hei in,
na sualnak nin cu
mu leleng tung.
23 Itin kaw mi nawngkai
hi awng mang,
Baal pathian bia awng mang
na tih theih?
Hawkluam sung a,
na sual zia hi zo hemin!
Thil sual na bawldan hi zo hemin!
Kep theih ngawlin
ama nuamnakah a tai zuzul limi
kalauk hun bang thong ci.
24 Ngunphil lakah a dawk zawzol limi
kalauk nu bang ci.
Mah kalauk cu akua kaw a uk thei?
Kalauk cang tei ca in
zei lih hei kul ngawlin
baihno in ngah paih haw hi.
25 Israel, pathian dadang na hilnakin,
na ke khatik pahsun,
na dang hei kotik nuam pahsun.
Mahnaven nangin,
‘Kikleh thei ma toh ing,
ngamdang pathian
ngai leita zo ing a,
hil pepel tung ti ci.’ ”
Israel Cu Dantat Tak Loli
26 Topa in, nguca a mat haw ten a zahcak bangin Israel cu zakca tuk uh ci: na kumpi uh, na hotu bawite, na thiampite le na profet uh tianin, zahcaknak ngengpi thuak tuk uh ci.
27 Thingkung hi ka pa hi, a titu le suang hi ka nu uh hi, a titu nohte na zo leng un, zakcazet tuk uh ci. Ka lakah kik saw ngawlin, na taisan uh hangin hi bangin zakca le mualpho in um tuk uh ci. Vansanglamin, na um uhten, hung inna, panin, ti kawkawileh tuk uh ci.
28 Nangmu ca in, na biak uhmi na pathian uhte cu ilai ah haw kaw? A bawm thei haw ahi tale na haksat uhten bawm tahen. Judah, khuapi na neih zahin pathian hei tampi nei ci.
29 Ka hum a na phuk lih cu i na tihnak kaw? Ita kei langpang nge cim?
30 Bawlsia naveng imah nemcuam ma ci. Nun hilh pha hei hi ma ci. A hang zetmi kiosa bangin nangmu ngalnam lala in, na profet uhte that uh ci.
31 Maw Israel mite, ka hilhmi ngai hem un! Noh tei ca in phillawn ngamko bang le ngam thim le ngam lauhuai bang ing maw? Itakaw, “Suakca ung a, keimu nuam bangin nung tuk hung, na lakah kik tukma ung” tin na tih uh.
32 Khanglai in, a neihmi van phawkngil thei awng maw? Mothak in huaidunnak mopuan phawk ngil awng maw? Mahnaven ka mihing ten kei phawkngilin, a ni le a ha hei sialcelhleh ma toh.
33 A ngaitu tei deih tukmi umdan cu thiamzet uh ci. Numei pha ngawlbel hei in, zilh theihmi nei laih uh ci.
34 Na van uhte cu thisanin kop hi; mah thisan cu nguca li, mi suaksual tei thisan hi ngawlin mawh nei ngawl, mi ca-ngah tei thisan hi.
“Mah ahi hei in, nangmuh ten,
35 ‘Mawhnak nei ma ung, Pathian cu kohtei humah a thinuk tukma,’ tita lalaih uh ci.” Mahnaven na sualnak uh na ip lo uh hangin, Topa keimah loli in, bawlsia tung.
36 Miphun dang pathian lakah na tai uh hangin nangmuhno, man nei ngawlin bawlduncop uh ci. Assiria humah na lung a bing zo bangin Izipt hei in amthongin bawl tuk hi.
37 Izipt lamah hek nuamleh ngawltohin, na lu hum uhah na kut uh nga in, zakca in, lei zo tuk uh ci. Na mi muan uhte cu Keimah, Topa i ka lawlsa mi a hih zo haw hangin, amuh tei lak pen imah ngah tukma uh ci,” ti hi.