28
Jeremiah le Profet Hananiah
1 Mah kum lengin, Zedekiah i kumpi a deh kum linak, ha nga ha, in Gibeon khua mi Azzur capa profet Hananiah in Biakinn sungah thu hilh hi. Thiampi le mipi tei zakin,Ref 28:1 2Kum 24:18-20; 2Khang 36:11-13;
2 Cungnungbel Topa, Israel i Pathian i awn cu hi bangin hilh hi. “Babilon ngilnak huham cu ek tuah khawng zo ing.
3 Kum nih sung kumpi Nebuchadnezzar in Babilon ah a thiak khawngmi, Biakinn sung a, na cu pin pihleh khawng tung.
4 Babilon a sal a matmi Judah kumpi Jehoiakim i capa Jehoiakhin cu Judah mite tuah munkhatah pui kikleh tung hi. Mahzuh hi, Babilon kumpipa i ngilnak huham cu ektuah khawng tung hi. Keimah, Topa in hilh zo ing,” ti hi.
5 Mahten thiampite le Biakinn sung a dingmi mipi tei zakin, Hananiah lakah,
6 “Mah ngai zuh; Topa in mahti bangin bawl zazal ngai hen! sal a matmi hempoh le a thiak haw mi biakinn sung a vante cu na hilh bangin kim ngangai hen, hi ngamah kik pihleh khawng hi ngai hen tih deih sing maw!
7 Mahnaven na lakah le mipi tei mai ah ka otmi hi ngai hemin hi.
8 Profet masate, nangmah le keima laih ngawlin, thu a hilhtu profet ten miphun tampi tei humah le a huham nei zetmi kumpipa i uknak humah ngaldonak, pamnak le natnak heng tuk hi tin hilh haw hi.
9 Mahnaven lemdaihnak le lemdaihnak um tuk tih a titu profet cu a thuhilhmi a kim ngangai bek ten Topa i hahmi profet hi tin, hilh haw tin ti ing.”
10 Hananiah in ka ngawng a bahmi khui kolhak cu dukin, a ektuah khawng ceng ten,
11 “Mipi tei zak tukin kumpi Nebuchadnezzar in, a miphun tei ngawng humah a bahmi cu hi tih bangin ektuah tung hi tin Topa in ti hi. Kum nih sungin bawlsuak tung tin ti hi,” ti in hawhsan ing!
12 Mahceng ten Topa in ka lakah,
13 Hananiah i lakah hawh inna, hi bang hilhtik hi. “ Topa in thing tuah bawlmi kolhak cu ektuah thei kha ngai men tuk naven cin, mahmi ai-in thik kolhak bawl tung.
14 Cungnungbel Topa, Israel i Pathian in, hi miphun tei humah thik kolhak khaih tung a, Babilon kumpi Nebuchadnezzar nadek haw tuk hi. Keimah, Topa in, hampa lak a ngamsa tianin, Nebuchadnezzar nadehsaktu in bawl tung tin hilh hi.”
15 Hananiah cu hi thu hilh ing a, hi bangin hilh bet ing. “Ngai hemin, Hananiah! Nang cu Topa i hahmi kha ma ci. Himi ten zolthu sang tukin so li ci!
16 Topa in, nangmah hi bawlsia tukin Topa amah loli in hilh zo toh hi. Topa langpang tukin mipi mai ah na ot zo toh hangin tu pepan kum a let laih ngawlin thi tuk ci tin ti ing.”
17 Hananiah cu mah kum ha salih ha in thi ngangai hi.