29
Babilon Um Judah Mitei Lakah Laikuat
1 Jerusalem pen Babilon ah Nebuchadnezzar i sal tuk pui mi thiampite, profet le hotu tei lakah lai ngan ing.Ref 29:1-2 2Kum 24:12-16; 2Khang 36:10;
2 Hilai cu kumpi Jehoiakhin le a nu, kumpi inn a bawi le upate, Judah ngam hotu le Jerusalem khua sung upate khut zungthiam le pumsute, saltannak pen puivawk a hih nung haw in ka ngat mi hi.
3 Hih lai hi, Babilon kumpi Nebuchadnezzar lakah Judah kumpi Jedekiah i hahmi Shafan capa Elasah le Hilkiah capa Gemariah lak pen ka kuatmi hi, ka lai sungah:
4 “Cungnungbel Topa Israel i Pathian in, Jerusalem pen Babilon ah Nebuchadnezzar i puitikmi mipi tei lakah hi tin hilh hi.
5 ‘Munte luahtum unna, innte phano in sa in um un hi. Huan bawl unna, na cin uhte ei un hi.
6 Zi huai unna, ca nei un. Na ca uhten zi huai haw henna, ca nei pepel haw hen. Kiamsuk ngawlin khangto tuk uh ci.
7 Thawngta tukin ka hawhtiknak khuapi i phatnak tukin nadek un. Ama ca in, ka lakah thunget sak un hi. Itahim titale khangto in, mi neinung ahi haw tale nangmuh vang mi neinung hi bok tuk uh ci.
8 Keimah, Topa Israel i Pathian in ngallinnak pia ing. Nangmu lak ummi profet ten hihen, mailam thu thei ing, a titu midang hei in hihen, zol ngah haw pahsuh hen. Mang a mat haw mite vang ngai kha him pahsuh un.
9 Amuhte cu keima minin zolthu sonte haw hi. Ka hahmi kha haw ma hi. Keimah, Topa in hilh zo toh ing,’ ti hi.
10 “ Topa in, ‘Babilon ngamah na umnak uh kum sawm salih a kim ten na hum uhah sehelhnak nei tung a, na khua le na ngam uhah kiklehtik tukin ka tepnak bangin kimtik khawng tung hi.Ref 29:10 2Khang 36:21; Jer 25:11; Dan 9:2;
11 Nangmu ca tuptah ka neihmi cu keimah bekin thei ing. Tuptahnak ka neihmi cu siatsuahnak hi ngawlin mi neinung na hihnak tukin hi.
12 keimah sam tuk uh ci. Ka lakah hungin thu na nget uhten za tung hi.
13 Noh ten thintakin, na zei uh tale mu tuk uh ci.Ref 29:13 Daan 4:29;
14 Mahzuh hi, zei tuk uh ci a, na khua le ngam uhah kiklehtik tung, tin hilh ing. Mun hempoh le ngam hempoh a, ka vahkektiknak pen cawm khawm tung a, sal na tan laih ngawlin na umnak sa ngamah pui kikleh tung hi. Keimah, Topa in hilh zo toh ing,’ ti hi.
15 Topa in, Babilon ah profet pia hi, tin ti uh ci.
16 David i ukmi a uktu ngam kumpi le hi khuapi sungah a ummi, nangmuh bang sal a pui khak ngawlmi na laicin tei thu ah Topa i thu hi ngai hem un;
17 Cungnungbel Topa in, ‘Ngaldonak, pamnak le natnak cu a hum hawah hengtik tung a, eihpha ngawlin a muatmi theipi bangin bawl tung hi.
18 Ngaldonak, pamnak le natnak tuah zui tung a, mahmi cu leihummi tampi in amuh haw ten thinsuzet haw tuk hi. Ka khen kehnak ngamdang a ummi ten a hum hawah a hengmi thil amuh haw ten amthong le lau zetin um haw tuk hi. Miten cekpan bawlnakin mang haw tuk a, a min haw cu mite tamnakin mang haw tuk hi.
19 Amu lakah catngawlin ka nadektu profet tei lak pen ka thu cu hengtik leleng naveng a ngaih nuam haw ngawl hang hi bangin a thuaknak haw cu na hi, hi.
20 Babilon ah ka kuatmi na venghawng uhin keimah Topa i, hilhmi hi ngai hem un tin,’ ti hi.
21 “Cungnungbel Topa, Israel i Pathian in, nangmu lakah ama minin zolthu a son litu Kolaiah capa Ahab le Maaseiah capa Zedekiah tei cungcangah thuhilhmi nei zo hi. Amuhte cu Babilon kumpi Nebuchadnezzar khutah pia tung a, nangmu mitmuh loli in that tuk hi.
22 Jerusalem pen Babilon ah a hawlmi sal matmi ten mi pa kha khat a tam nuam haw ten; ‘Babilon in, a nungcungin, a kio cuculmi Zedekiah le Ahab bangin Topa in bawl tahen,’ ti haw tuk hi.
23 Mahti bangin thuak haw tuk, Itahim titale thil sual bawl haw hi. Mi zi le pasal humah sualin, le Topa i minin zolthu a son haw hangin hi. Mahmi cu Topa i deih ngawlmi hi. A bawl haw hempoh thei khawngin, amah cu amu sualnak i humah thutheitu hi. Topa in hilh zo toh hi,” tin ngan ing.
Shemaiah Laikuat
24-25 Cungnungbel Topa, Israel i Pathian in, Nehelam mi, Shemaiah lakah thu hilhtik hi. Shemaiah in, Jerusalem mi le Maaseiah capa thiampi Jephaniah, thiampi le mi dadang tei lakah ama minin laikuat hi. A laikuatnak sungah Shemaiah in, Zephaniah lakah,
26 “ Topa in Zehoiada ai-in thiampi in bawl zo toh, atu-in Biakinn sungah bawibelin cang zo toh ci. Mah hangin misil hi na pi in, profet a dekdun cawmtu misil hempoh cu a ngawng hawah thik taicin vawh khawngin hi; mahmi cu nadeh tuk na dehvo hi.
27 Itakaw mipi tei lakah profet otin, a awn litu Anathoth khua mi Jeremiah khi mahtih bangin na bawl ngawl?
28 Ngeipi phattik tukmi hi kha ma hi; itakaw titale Babilon a mihingte cu mahlai ah ngeipi salin tang tuk uh ci. Innsa unna, um un. Huan bawl unna, na cin uhmi an cu ei un hi, a titu cu amah hi,” tin laikuat hi.
29 Mahlai cu Zephaniah in ka lakah sial hi.
30 Topa in ka lakah,
31-32 Shemaiah i thu tuah pehdunin, Babilon ah sal a tangmi hempoh tei lakah hi hangin thucah tukin hilh hi, “Keimah, Topa in, Shemiah le a casuan hempoh cu dantat tung. Amah cu ka hahmi kha ma naven nangmu lakah profet bangkekin awnin zol hi. Noh tei lakah casuan pa khatno hei nei tukma hi. Ka mitei ca in thilpha ka bawl tukmi cu mu kha tukma hi. Itahim titale keimah langpang tukin ka mihingte so hi. Keimah, Topa in hilh zo ing,” ti hi.