27
Jeremiah In Khui Kolhak Ok
1 Josiah capa Zedekiah cu Judah kumpi a deh ten Topa i awn cu ka lakah hengin,Ref 27:1 2Kum 24:18-20; 2Khang 36:11-13;
2 saphaw le khui kolhak bawlin ka ngawngah battik hi.
3 Topa in Jerusalem ah kumpi Zedekiah tawk tukin, a hungmi palaite Edom ngam, Moab ngam, Ammon ngam, Taiar le Shidon ngam pen a hungmi palai tei lak pen a ngam haw a, kumpi tei lakah thucah tukin hilh hi.
4 A kumpi haw tek hilh tukin Cungnungbel Topa Israel i Pathian in hitih bangin thupia hi.
5 A nase zetmi ka huham le ka cahnakin leihum buppi le mihing le leihumah a nungmi ngamsa hempoh hi ka semsuahmi hi in, mahte cu ka piak nuam mitei lakah pia ing.
6 Ka sila Babilon kumpi Nebuchadnezzar khutnuai a miphun hempoh a koihtu cu keimah ing. Ngamsa hei cu a nadektu tukin pia ing.
7 Miphun hempoh ten a na dek haw tuk a, a capa le a casuan tianin, a miphun haw a kiamsuk hun tian a nadek leleng haw tuk hi. Mah nungten a miphunin miphun dangte le a ngilmi kumpi tei na cu dekleh bok haw tuk hi.
8 “Mahnaven ngam khat hihen, uknak pa kha khat hihen a uknak nuai ah a um nuam haw ma tale mah miphun cu ngaldonak, pamnak le natnak tuah dantat tung a, a dawlbel ten siatsuah khawngtu tukin Nebuchadnezzar cu thupia tung.
9 Na profet uhte hihen, akua abang hei hihen, mailam thu piang tuk hilh thei ing a titute cu sang hihim pahsuh un. Manglam pen hihen, mithi hawvang samin hihen, khutlam zohnakin hihen, thei ing a ti haw tale sang viang pahsuh un. A venghawng haw in Babilon kumpipa i khutsung heng tuk ngawlin hilh haw hi.
10 A zol haw hi; na ngam uh pen ngam khua lapi ah pui suah na hihnak tukin a ti lotu cu amuh hi haw tuk hi. Hawlvawk tung a, siatsuah khawng hi tuk uh ci.
11 Mahnaven miphun pa kha khatin, Babilon kumpi khut sungah piadunin le na a deksak tale ama ngam sungah umtik tung; amu ngamah umin, amu ngam leng cu bung tuk hi. Keimah, Topa in hilh zo ing,” ti hi.
12 Mahti bang lelengin, Judah kumpi Zedekiah lak hei ah hilh ing. “Babilon kumpipa i khutnuai ah umin hi. Amah le a mihing tei nadek inna, nung tuk ci.
13 Itakaw nangmah le na mihingte cu ngaldonak, an ngawlin le natnakin, na thih tuk uh? Babilon kumpipa i khutnuai ah a um ngawl mite ngaldonak le pamnak le natnakin thi haw tuk tin, Topa in hilh zo hi.
14 Babilon kumpi pa i khutnuai um tuk ngawlin a hilhtu profet tei thu cu sang pahsuh un.
15 Hi profet cu, ka hahmi kha haw ma, ka minin mizoltu bek haw hi,” tin, amah Topa loli in hilh zo hi. Mah hangin hawlvawk tuk a, nangmah hihen, zolthu sontu profet hihen, thahnak thuak tuk uh ci ti ing.”
16 Mahten thiampi le mipi tei lakah Topa i awnkam cu hi bangin hilh ing. “Babilon pen Biakinn a nate hengpal tuk tin a sontu profet cu sang pahsuh un, a zol haw hi.
17 A thu haw ngai viang pahsuh un. Babilon kumpipa i khutnuai ah um unna, nung tuk uh ci. Hi khuapi hi itakaw buaksehin, na cantik nuam lih uh?
18 Profet ngangai in, Cungnungbel Topa keima thu amu lakah a um tatak ahi tale Biakinn sung a, a um laihmi van le kumpipa i inn a ummi sum le paite cu Babilon ah thiak thong ngawlin keima lakah ngen haw hen tin ti hi.”
19-20 (Kumpi Nebuchadnezzar in Judah ngam a kumpi Jehoiakim i capa Jehoiakhin le Judah ngam upa le Jerusalem khua sung upate a pui khawng ten Biakinn khuamte, Daal tui kuang le a khunnak lengte, Biakinn sung na khenkhatte cu zamta hi.)
21 “Cungnungbel Topa, Israel i Pathian keimah in Biakinn sung le Jerusalem kumpipa i innah a tanglaihmi van tei thu ka sonmi hi ngai un hi.
22 Babilon ah thiak khawng haw tuk, keimah in tawk ka tih laklawh tian mahlai Babilon ah um tuk hi. Mah nungten keimah in kihleh pih tung a, hi munah koihleh tung hi. Keimah, Topa in hilh zo ing.”