26
Jeremiah Thah Tum Haw
1 Josiah capa Jehoiakim in Judah kumpi a deh ngei ngawlin,Ref 26:1 2Kum 23:36-24:6; 2Khang 36:5-7;
2 Topa in hi bangin Jeremiah otpih hi; “Biakinn sungah ding inna, Judah ngam khuapi pen mahlai ah Pathian bia tukin a hungmi lakah phuang tukin ka hilhmi hempoh cu phuangin hi. Phawhngilh um viang tuk ngawlin son khawngin hi.
3 Na hilhmi ngai in, a nundan pha ngawl hei khel kha haw tuk hi. A khel haw tale thil sual a bawlmi haw hangin a hum hawah siatsuahnak ka hentik tum mi cu supleh tung,” tin ti hi.
4 Topa in mipi tei lakah hilh tukin otpih lehin; “Keimah, Topa in hilh zo toh ing; ka thu na ngai uh tale ka hilhmite zui un hi;
5 nangmu lakah ka hah lelengmi profet tei thu ngai un. A thu haw ngai awng ma uh ci.
6 A thu haw na ngaih nuamma uh tale Shiloh hum a, ka bawl bangin hi Biakinn humah bawlbok tung a, miphun hempoh ten hi khuapi umnak cu tamdunnakin mang haw tuk,” ti hi.Ref 26:6 Josh 18:1; Sam 78:60; Jer 7:12-14;
7 Biakinn sungah mahtih bang ka hilhmi cu thiampi le profet a hungmi hempoh ten za haw hi.
8 Topa in hilh tukin thu a piakmi hempoh ka hilh ceng bek ten manin, thah tum haw hi. “Hitih bangin na hilh hangin thah phu hihim ci.
9 Hi Biakinn hi Shiloh bangin cang tuk hi, hi khuapi cu siatsuah khawng hi tuk hi, a sungah kuamah um haw tukma, tin ita ti nge cim?” tin ti haw hi.
10 Mah thu cu Judah hotu ten a zak haw ten kumpipa i inn pen Biakinn lamah tai in, kongka Thakah khung haw hi.
11 Thiampi le profet ten hotu le mipi tei lakah, “Hi pa hi thah phu hi. Itahim titale a khuapi uh sonsia hi. Na beng uh tuah na zak uhmi cu toh poh ven,” tin ti haw hi.
12 Mahten keimah in, “Hi Biakinn le khuapi ka sonsiatnak hempoh cu Topa in, hilhtik a, ka phuanmi hi.
13 Na nundan uh khel tukin le na bawl uhmi na khelh kul hihim hi. Topa na Pathian uh i thungai un. Mahti bangin na bawl uh ahi tale na humah a siatsuahnak hentik a tum mi cu khelleh tuk hi.
14 Kei poh cu nangmu khut sungah um ing. Dik le man hi na tihnak uh bangin ka humah bawl poh un hi.
15 Mahnaven pa khat cu na theihham tuk um. Kei na that ngangai uh tale nangmuh le hih khuapi sung umte cu sualnak nei ngawl mipa na thah uh hangin misual hi tuk uh ci. Itahim titale hi ngallinnak a piatu tukin atiktu cu Topa amah hi tin,” ti hi.
16 Hotute le mipi ten thiampi le profet lakah, “Hi pa cu thah tuk hi kha ma hi; Pathian a Topa uh i minin, eimu lakah awn hi,” tin ti haw hi.
17 Mahceng ten upa khenkhatte dingin, mipi tei lakah,
18 “Moresheth khua mi profet Mikah in Hezekiah, Judah kumpi a hih laihin, mipi tei lakah Cungnungbel Topa in hi bangin hilh hi.
“Zion cu lo bangin bun hi tuk,
Jerusalem cu buaksehin
cang tuk a,
Biakinn dinnak mual cu
tupi in cang tuk tin ti hi.Ref 26:18 Mik 3:12;
19 Kumpi Hezekiah le Judah mipi ten mahti bangin a hilh hangin Mikah cu thatleh haw ma. Hezekiah in Topa cu upatin, hehpih ngen saw ma maw? Topa cu a thinsupin, siatsuahnak hentik a tummi cu tawpleh hi. Ohte cu atu-in, a lauhuaimi siatsuahnak eimu humah a hengtik awndiak hung ma le!” tin ti haw hi.
20 Uriah a tih haw pa in, Kiriath Jearim khua Shemiah i capa in Topa i minin, hi miphun le khuapi cu Jeremiah bangin sonsia bok hi.
21 Uriah ot cu kumpi Jehoiakim le a ngalkap bawi upa ten a zak haw ten kumpipa in thah tum hi. Mahnaven Uriah in, a zak ten lau in, Izipt ngamah tai hi.
22 Kumpi Jehoiakim in Akbor capa Elnathan le midangte Uriah man tukin Izipt ngamah hawhtik hi.
23 Manin, kumpi Jehoiakim lakah henpih haw hi. Kumpi in thatin, a luang cu mi zalan vuinak khanmualah vawkin zam hi.
24 Mahnaven kei cu Shafan capa Ahikam panpihnak hangin thah tukin mipi khutah pia ma hi.