25
Saklam Ngal
1 Josiah capa Jehoiakim cu Judah kumpi a dehnak kum linak ten Judah tei ca in, Topa i awn cu ka lakah heng hi. (Hihi cu Nebuchadnezzar in Babilon kumpi a deh kum khatnakin hi.)Ref 25:1 2Kum 24:1; 2Khang 36:5-7; Dan 1:1-2;
2 Judah mi le Jerusalem mi hempoh tei lakah hi tin hilh ing.
3 Amon capa Josiah cu Judah kumpi a deh kum sawm le kum thumnak pen tuni tian, kum sawm nih le kum thum sung, Topa i thu cu ka lakah hengin, a hilhmite cu nangmu lakah hilhleh ngawlin um awng mang hi. Mahnaven imah simsial ma uh ci.
4 Topa in, a sal profet a hah hei ten a thu haw ngai nuam ngawlin imah simsial kha ma uh ci.
5 Topa in, na pu le pa uhte le nangmu lakah hi ngam hi kumkhua in nangmu ngam tukin pia hi. Hi ngamah na um leleng theihnak tukin, na nundan pha ngawlte le thil sual na bawl uhte zam tukin profet ten hilh haw hi.
6 Topa thinuktik tuk ngawlin, na bawl cop uhmi milim le pathian dang bia tuk ngawlin le a nadek tuk ngawlin, hilh haw hi. Topa i thuzui unna, bawlsia hihim tukma naven!
7 Atu-in Topa amah loli in, a thu na zui uh ngawlnak cu hilh hi. Mah bangin milim na bawl uh hangin a thinuktik uh ci, a bawlsiatnak na hum uhah nangmuhno hengtik cawm uh ci.
8 “A thu na ngaih nuam uh ngawl hangin Cungnungbel Topa in, hi tin ti hi.
9 ‘Saklam ngam a, mi hempoh le ka sila Babilon kumpipa Nebuchadnezzar sam tung hi. Judah le a ngamsung a ummi hempoh le a elkim a ngamte dotik tung.
Hi ngam le a elkim ngamte siatsuahtik tung a, a kumkhua buakseh khawmmi in cangtik tung. Zoh mawi ngawl le a lauhuaimi in cang haw tuk hi. Keimah, Topa in hilh zo ing.
10 Lungdamin, a aunak haw thawmnging le mopuai a, a thawmnging haw cu dai khipkheptik tung. A mei-inn ca haw in, zinan nei haw tukma, an vang nei haw tukma.Ref 25:10 Jer 7:34; 16:9; Mang 18:22-23;
11 Hi ngam buppi cu zo tuk um ngawlin siatik khawng tuk a, thasia haw tuk hi. A elkim ngam ten Babilon kumpipa na cu kum sawm salih sung deh haw tuk hi.Ref 25:11 2Khang 36:21; Jer 29:10; Dan 9:2;
12 Mah nungten Babilon le a kumpi cu a sualmanin dantat tung. Mah ngam cu siatsuah tung, a kumkhua in buaksehnakin cangtik tung hi.
13 Jeremiah lakah ka hilhsa mi cu miphun tampi humah hengtik tung tin ka tihmi bawlsiatnak hi laibu sung a sialsiahmi siatsuahnak hempoh tuah Babilon cu bawlsia tung hi.
14 Thil sual a bawlmi haw manin Babilon tei humah phu la tung, miphun tampi le kumpi ngengzet ten salin ngul haw tuk tin hilh hi.’ ”
Pathian Thukhennak Miphun Dang Humah
15 Topa Israel i Pathian in ka lakah, “Hilai ah ka thinuknak tuah a dimmi sabittui khuat khat um. Ka hahnak mun a, miphun hempoh tei lakah hawh inna, intikin hi.
16 A in haw ten lum haw tuk a, misilin suak haw tuk hi. Amu lakah ngaldonak ka hentik tuk hangin hi.”
17 Mah hangin kei hei in, Topa i khut pen la ing a, intik ing.
18 Jerusalem le Judah ngam a kumpi haw le a hotute tuah intik ing. Phillawn ngam mullinghah le zot tak ngawl ngamin suak haw tuk, miten tu hun khang tian a min haw cu tamdunnakin mang haw tuk hi.
19-26 Mah khuat pen a intu tuk ngamte cu a nuailamte haw hi.
Izipt kumpi, a khutnuai bawi le hotute,
Izipt mite le Izipt ngam a um ngamdang mite,
Filistin ngam Ashkelon, Gaza, Ekron le a tanglaihmi Ashdod khua kumpi le
Edom, Moab le Ammon ngam mi hempoh;
Taiar le Sidon kumpi hempoh;
Mediterranean tuikulh a kumpi hempoh;
Daden, Tema le Buz khuate, sam comzet a mettute;
Arabia ngam a kumpi hempoh,
Phillawn ngam a kumpi hempoh,
Zimri, Elam, Media kumpite,
Saklam ngam a kumpite, a khawla le nai tih um ngawlin mi pa khat nung pa khat intik haw tuk hi.
Leihum miphun hempoh ten inbok haw tuk hi. A dawlbel ten Babilon kumpipa intuk hi.
27 Topa in ka lakah, mipi lakah hilhin; keimah Cungnungbel Topa, Israel; Pathian in, khamin, a luak haw laklawh, lumin, tho thei ngawlin a um haw laklawh tian a in haw tukin thupia ing. Itahim titale amu lakah ngaldonak hengtik tung hi.
28 Mah khuat cu na khutta la nuam ngawlin, a in nuam haw ma tale, Cungnungbel Topa in, na in uh kul loli ti hi, tin hilhin hi.
29 Siatsuahnak cu keima khuapi pepan tung hi. Bawlsiatnak tawk ngawlin a luat tuk hengin maw a ngaihsut haw? Luat thawthong haw tukma, bawlsiat khawng hi haw tuk hi. Leihum mi hempoh lakah ngaldonak hengtik tung hi. Keimah Cungnungbel Topa in, hilh zo toh ing.
30 “Jeremiah, hi ka hilhmi hempoh cu nangmah in phuang khawng tuk ci. Hite hi cu hi bangin hilh tuk ci;
‘ Topa cu van pen
thum dudum tuk,
Vansang pi pen vanthum bang
hi tuk hi.
A mihing tei humah nase zetin
thum tuk hi.
Sabit suktu pa bangin au tuk hi.
Leihum mi hempoh ten
za haw tuk hi.
31 A thawm cu leimawk tianin
thangkhawk tuk hi.
Topa in miphun hempoh tei
humah, a mawhnak haw
thukhen tuk nei hi.
Akua nabang i thu son tuk hi.
Misualte cu that tuk,
Topa in hilh zo tin,’ ”
32 Cungnungbel Topa in, ngam khat nung ngam khatah siatsuahnak heng tuk hi. Leimawk deng pen huihpi theu tuk ti hi.
33 Topa i thahmi tei luang cu leimawk khat pen mawk khatlam tian thehkeh khawng tuk hi. Kuamah in kah haw tukma, luang latu le vuitu hei nei ngawlin um haw tuk hi. Leihumah ekdawm bangin lumthong haw tuk hi.
34 Noh, ka mihing puitute le ka tuucingtute kap unna, nase zetin tau un hi. Mithi ngai in, kap unna, leivul lakah pel li un. Na thihnak tuk uh hun heng zo toh, tuu bangin ngawh hi tuk uh ci.
35 Na luat theihnak tuk uh lampi um bikbek tukma hi.
36-37 Kap unna, vansanglamin, au un; itahim titale Topa cu a thinukin, na miphun uh susia khawng zo, lemdaizet le himdam zetmi na ngam uh cu buaksehnakin cangtik zo hi.
38 Kiosa in, akua a zamthong bangin a mihingte zamsan zo toh hi. Mullinghah ngaldonak le Topa i thinuknakin hi ngam cu ngamvengin bawl zo hi.