24
Theipi Ngah Bawm Nih
1 Topa in, Biakinn mai a, koihmi theipi ngah bawm nih lak hi. Mahmi cu Babilon kumpi Nebuchadnezzar in Jehoiakim i capa Judah kumpi Jehoiakhin cu Jerusalem pen Babilon ah Judah ngam hotute, pumsu thiam le khutzung thiamte tuah munkhatin sal matmi ah a puitul nungten ti hi.Ref 24:1 2Kum 24:12-16; 2Khang 36:10;
2 Bawm pa khat sungah theingah pha umin, adang bawm sungah theingah pha ngawlmi, eihpha ngawl theipi ngah um hi.
3 Topa in ka lakah, “Jeremiah, i kaw na muh?” tin dong hi. “Theipi ngah mu ing, a pha mi cu phazet naven a sia mi cu sia leita lawlawm, eihpha hei hi haw ma” tin don ing.
4 Mah hangin Topa in,
5 “Keimah, Topa, Israel i Pathian in Babilon ah a puitul haw mite cu hi theipi ngah pha bangin ka ngaihsutmi haw hi; Mah hangin a hum hawah hehpihnak nei tung.
6 Phano in zo tung a, hi ngamah kihpihleh tung hi. Ka siatsuahmi hi ngawlin ka sak lehmi hi haw tuk, ka botmi hi ngawlin, ka phutmi hi saw haw tuk hi.
7 Topa ka hihlam a theihnuamnak haw tukin, kei cu a Pathian haw hi tung hi. Itahim titale a lungmu hempoh tuah ka lakah kikleh haw tuk hi.
8 “Mah hangin Judah kumpi Zedekiah, a khutnuai bawi upate le Jerusalem mite cu hi ngamsung a ummi hihen, Izipt ngamah a taimi hihen, keimah Topa in, theingah pha ngawl a sia leita eihpha ngawlmi theipi bangin bawl tung hi.
9 A hum hawah dantatnak nasezet hengtik tung a, leihum minam hempoh ten lauthawng khawng haw tuk hi. Miten cekpan le nuihsuak bawlnakin mang haw tuk hi. Nautatin, a min haw cu ka thehkehnak mun tihkimah a sia lam tehkipnakin mang haw tuk hi.
10 A pu le pate, amu lakah ka piakmi ngam sungah pa khat hei tang ngawl toh tianin, a bo laklawh, a hum hawah ngaldonak, pamnak le natnak hengtik tung,” ti hi.