23
Mailam Ca Muansannak
1 Topa i thukhennak cu a mihingte a siatsuahtu le a lengkektiktu kumpi bawi humah itihzah lauhuaimi hi kaw?
2 A mihingte phano in, a cingkhawitu tuk hotu tei lakah, Topa Israel i Pathian in, hi bangin ti hi; “Ka mite phano cingkhawi ngawlin lengkektikin hilvawk uh ci. Hi bang na bawl uh hangin nangmuh bawlsia tung.
3 A tanglaihmi, ka mite cu ka lengkektiknak ngam pen sam khawng tung a, a khua le a ngam tenah kiklehtik tung hi. Cano tampi nei in, pungzai haw tuk hi.
4 A muhte cingkhawitu tukin hotu koih tung hi. Ka mite cu launak le lungapnak tuah umleh haw tukma toh, bawl vang bawlsialeh tukma toh ing. Keimah, Topa in, hilh zo ing,” ti hi.
5 Topa in, David casuan micip pa khat cu kumpi in ka ten hun heng tuk hi. Mah kumpi in, hi ngam cu cihnak tuah uk tuk a, a dikmi le a manmi bebek bawl tuk hi.Ref 23:5-6 Jer 33:14-16;
6 Kumpi a deh ten Judah mite cu himdamzetno in um haw tuk a, Israel mite cu lungmuangzet le lemdaihnak tuah um haw tuk hi. ‘ Topa cu Eimu Nunpantu tih hi tuk hi.’
7 “Hun cu heng tuk hi,” Izipt ngam pen Israel a puitultu a nungmi Pathian minin! tin, tamleh haw tukma toh hi.
8 Saklam ngam le a mihing vahkehnak ngam pen Israel a pui kiklehtu a nungmi Pathian minin, “Tiamdun saw haw tuk a, amu ngamah umleh ten haw tuk,” ti hi.
Profet Tei Lakah Jeremiah Awnkam
9 Ka lungmu tamzanta hei,
tha nei ngawlin
hing tetek thong ing.
Topa i hangin,
a thu thiangtho hangin hi.
Zukham misil bangin,
sabittui tam leita a inmi bang ing.
10 Hi ngam cu muantak ngawl mihing,
Topa i mai ah
numei pha ngawl mi ngeh haw hi.
A ngamtatdan
zoh mawi haw ma,
a thuneihnak mang sual haw hi.
Topa in, a tamsiat hangin,
hi ngam cu
mithi zun ngai in um haw hi.
Hamhing hempoh vang
11 Topa in,
Profet le thiampi ten
Pathian thei haw ma,
Biakinn sung loli hei ah,
thil sual a bawl haw man zo ing.
12 A zui haw mi lampi cu
naalin thim tuk hi.
Bahtik tung a, lumtik tung.
Amuh bawlsiat hun
heng tuk tin
Keimah, Topa in
hilh zo ing.
13 Samaria a profet tei
a sual zia mu zo ing.
Baal khawhuai min tuah
thusonin, ka mihingte
pui sual zo haw hi.
14 Mahnaven Jerusalem a,
profet cu mahte sangin
a sualdan haw luai cuangta laih.
Nu le pa sualnak bawlin,
zolthu son haw hi.
Sualnak bawl tukin midangte
bawm haw hi.
Mah hangin thilpha ngawl bawl cu
kuamah in zam tum haw ma.
Ka mitmuh cilcelah
suaksualzet haw hi.
Sodom le Gomorah mi bangbokin
sual bok haw hi.Ref 23:14 Pian 18:20; Ezk 16:46;
15 Mah hangin Jerusalem profet tei thu ah Cungnungbel Topa in, hi tin hilh zo hi. A eih haw tukin a kha mi anceh pia tung, a in haw tukin thihsi pia tung. Itakaw titale Pathian theihnuam ngawlnak lungmu cu hi ngam buppi ah dimtik zo haw, tin ti hi.
16 Cungnungbel Topa in, Jerusalem tei lakah, “Profet tei thuhilhmi cu ngai pahsuh un, zolthu ngeh son haw hi, a man ngawlmi muansannak pia haw hi. Keima ottikmi hei hi ngawl, amu bawlcawm hilh thong haw hi.
17 Ka thuhilhmi a ngai nuam ngawl tei lakah poi ma poh, ihempoh pha khawng tuk poh tih ngehin hilh leleng haw hi.
“Mi lunglian tei lakah siatnak heng awng tukma,” tin hilh haw hi.
18 Kei in, “Hi profet tei lak pen kuamah in Topa i ngaihsut kuhnak thei haw tukma hi. Amu sung pen kuamah in Topa i thuhilhmi a beng haw hei in za haw ma. A lungmu haw hei in thei tum haw ma; a hilhmi vang ngai haw ma, a poi vang poi sa kha haw ma.
19 A thinuknak cu huihsia le huihpi bangin mipha ngawl tei lu humah theu huhum tuk hi.
20 bawl tuk a tuptahsa hempoh a bawl khawng laklawh cu tawp thawthong tukma. Mailam hun ten hi thu hi mihing ten theiciangleh haw tuk,” tin hilh ing.
21 Topa in, “Hi profet hi ka hahmi kha haw ma naven hawh haw hi. Thuhilh tuk pia ma naveng ka minin thuhilh leleng thong haw hi.
22 Ka thukuh ngaihsut mite a thei hawta bang ahin, ka mitei lakah ka thu cu hilhin, a nuncan pha ngawl le thil sual a bawl haw mite zamsan zo haw tuk toh hi.
23 “Kei cu munkhat bekah a um hi ngawlin ilai banglai ah a ummi Pathian ing.
24 Ka muh theih ngawl tianin, a ngelh theitu kuamah um haw ma. Lei le van, ilai banglai ah ka um hi thei ma uh ci maw?
25 Ka mangin, Pathian thuhilhmi thei ing tin, ka minin zolthu a sontu profet tei thu thei ing.
26 Amu bawlcawmmi zolthu tuah ka mite ituk tian kaw a pui sual haw tuk?
27 A pu le pa ten kei phawkngilin, Baal khawhuai lakah a tai haw bangin, mang thu a sonnak haw tuah ka mihing ten a phawkngil tuk hengin sa haw hi.
28 Mang a neitu profet pa khatin, hi cu mang thawthong poh a ti ahin, ka hilhmi thu a zatu profet hei in, ka thu cu a ciang zetin amu lakah son hen. Cangsi cu cang ngai tuah tehkip ten imah ma hi.
29 Ka thu cu mei alh bang hi suang a sukeh bilh belhtu sobul bang hi.
30 Pa khat le pa khat i awnkam ladun hemin, Topa i awnkam, hi tin thu a sontu profet cu do ing.
31 Amu bulpak ot poh ngen, Topa i awnkam hi, tin thu a sontu profet vang do ing.
32 Keimah, Topa i otnak hi ngai hem un! Zolthu ngeh a dimmi mang thu a sontu profet cu do ing. A mang haw sonin, a zolthu haw le a pualthaunak haw tuah ka mihingte pui sual haw hi. Ka hahmi kha viang haw ma. Hawh tukin ka thupiakmi hei kha haw ma, mipi ca nemcuamnak imah nei haw ma hi. Keimah, Topa in hilh zo ing,” ti hi.
Topa i Vanngit
33 Topa in ka lakah, “Jeremiah, ka mihing tei lak pen pa kha khatin hihen, profet ahimata thiampi pa kha khatin hihen, thudongin, Topa i thu cu i kaw? a titale a lakah, ‘Nangmuh hi Topa i ca in vanngit hi uh ci a, vawk khawng tuk,’ tin ti in hi.
34 Ka mihing lakah pa kha khatin hihen, profet ahimata thiampi pa kha khatin hihen, ‘ Topa i vanngit,’ tihmi awnkam a mang ahi tale amah le a innkua venghawngin dantat tung.
35 Mah sangin akua hei in, a ngualcamte le a innkua tei lakah, ‘ Topa in iti bang donleh kaw? Topa in itin donleh kaw?’ tin dong saw hen.
36 ‘ Topa i vanngit,’ tih awnkam mangleh haw ma toh hen, a mang haw tale amu ca in ka thu cu a vanngitin cangtik ngangai tung. Hi mihing ten a nung Pathian Cungnungbel Topa, a Pathian haw i awnkam cu phundangin mel haw, a ping le pengah pialtik khawng haw hi.
37 Jeremiah, profet cu, ‘ Topa in itin kaw a don? Topa in itin kaw a ot?’ tin dong inna,
38 ka thupiakmi zui nuam ngawlin, ‘ Topa i vanngit’ tih awnkam a mang leleng haw tale cangcian zetin hilhin hi.
39 Amuhte cu kheisuak tung a, a pu le pate le amu lakah ka piaksa a khuapi haw hihen, amuhte hei hihen, ka lak pen ngam khawlapi ah hawlvawk khawng tung.
40 A hum hawah ituk mah ten phawhngilh tuk ngawlmi zahcaknak le mualphonak hengtik tung tin,” ti hi.