22
Judah Kumpipa Inn Ca Thucah
1-2 Topa in, David casuan Judah kumpipa i innah hawhin, kumpipa le a khutnuai bawite cu Jerusalem tei lakah a thuhilhmi ngai tukin hilhin tin ti hi. Topa in,
3 keimah Topa in, thupia ing; dikcangnak le thudik tuah bawl un. A zol lih haw mi cu a zoltu i khut pen hup un hi. Ngamdangmi hihen, nu le pa nei ngawl le meivongte hei hihen, bawlsia pahsuh un hi. Hi mun thiangtho ah mawh nei ngawlmi that pahsuh un hi.
4 Ka thu piak bangin na bawl ngangai uh tale David casuante kumpi hi leleng haw tuk hi. Amuhte cu a khutnuai bawite le a mihingte tuah kumpi inn a kongka sung pen cipuhleng tuah tumin tul haw tuk hi.
5 Mahnaven ka thupiakmi na zui uh ma tale hi kumpi inn cu buakseh khawmnakin cang tuk hi, tin tiam ing hi. Keimah, Topa in hilh zo toh ing.Ref 22:5 Mt 23:28; Lk 13:35;
6 Keima ca in kumpi inn cu Gilead ngam le Lebanon mual bangin mawi hi. Mahnaven kua mah i um nuam ngawlnak mun khingin bawl tung hi.
7 A siatsuahtu tukin mi hah ing. A heipi haw cawi in, sidar khuam mawizette cu phukin, mei sungah haal haw tuk hi.
8 “A nungten ngamdangmi tampi hi lamah a hun haw ten itakaw Topa in, hi khuapi humah hitih bangin, a bawl? tin dong haw tuk hi.
9 a Pathian haw tuah thutepnak a bawl haw cu nunghekin, pathian dadang tei na a deh haw hangin, ti haw tuk,” ti hi.
Joahaz Thu Jeremiah Hilhmi
10 Judah mite, Josiah kumpipa cu
kah pahsuh un.
A thih hangin khawngai pahsuh un.
Mahnaven a capa
Joahaz ca in kap li un hi.
Amah cu hawhpih
haw tuk a,
kikleh tukma toh hi.
A suahnak ngam muleh
tukma toh hi.
11 Topa in, Judah kumpi a dektu, a pa Josiah ai-awhtu Joahaz thu cu hitin hilh hi, “Amah cu hilai pen tul zo, kikleh tukma toh.Ref 22:11 2Kum 23:31-34; 2Khang 36:1-4;
12 A puinak ngam hawah thi tuk a hih hangin hi ngam hi muleh tukma toh hi,” tin ti hi.
Jehoiakim Thula Jeremiah Sonmi
13 Dikcang ngawlnak tuah
a inn a satu le,
nawhthuh eihnak tuah
a inn a kauhtu,
Thaman piak ngawlin
a ngam mihing
na a dektiktu le thaman
a pia ngawltu cu
a lampi bing hi.
14 “Inn phazet sa tung a,
a khan humta cu
a zal zetin
bawl tung,”
a ti tu cu a lampi bing hi.
Mahti hangin
kongka neu bawlin
a sunglam pen
sidar thing tuah
thuahin bawl a,
si san noih hi.
15 Sidar thing tuah
inn na sak hangin
kumpi dang sang hei in
pha saw deuh tin
ngaisungdun cim maw?
Na pa cu mi khan phazet hi.
Mi man le midik hi in,
a dehmi hempoh ah l
awhting hi.
16 Mi ca-ngah tei thu vang
man zetin,
a khensak hangin,
a lamtuang hi.
Topa theitu tei mizia cu
mahtih bang hi.
17 Mahnaven nangin,
nangma metnak bek
ngaisung ci.
Mawh nei ngawlte thatin,
na mihingte bawlsiazet ci tin,
Topa in hilh zo hi.
18 Mah hangin Topa in, Judah kumpi Josiah i capa Jehoiakim i thu cu hi bangin ti hi;
“A thih ten kuamah hei
kap haw tukma,
‘ka u aw, ka nau aw,’
tih hei in
kuamah in hitui luangin
kap li haw tukma.Ref 22:18 2Kum 23:36-24:6; 2Khang 36:5-7;
19 Laak a thih ten a vui haw
bangfang tuk hi.
A luang cu kai haw tuk a,
Jerusalem kongbiang
pua lamah a vawkin,
zam haw tuk,” tin ti hi.
20 Jerusalem mite aw,
Lebanon ngamah
hawh unna, au un.
Bashan ngamah hawh unna,
tau li un.
Moab ngam mualhum pen
sam li un,
Itahim titale nangmuh
a panpihtu hempoh ten
ngal sung khawng zo haw hi.
21 Mi neinung na hih uh laihin,
Topa i thu
nangmuh hilh ih;
Mahnaven ngai nuam
ma uh ci.
Na nunsung uh cu
mahtih bang leleng thong uh ci.
Topa in, a thu cu
zui nuam viang ma uh ci.
22 Na hotu uhte cu huihpi in
mutvawk tuk hi.
Nangmuh bawmtute cu
ngal i matmi ngeh tuk toh.
Thil sual na bawl uhmi hangin hi.
Na khuapi uh cu
zakca le mualpho in um tuk hi.
23 Lebanon ngam pen a suakmi
sidar thing lakah,
ngimta zetin cawl ci.
Mahnaven numei
naukei nat thuak bangin,
na ca in nasezet tuk hi.
Natnakin, a delhsuk ngangai ten
hehpihhuaizet tuk ci.
Jehoiakhin Humah Pathian Thukhennak
24 Topa in, Judah kumpipa Jehoiakim i capa kumpi Jehoiakhin i lakah, “A nungmi Pathian ka hih bangin, ka taklam a, minkhetnak zungbut na hi hei in, duk tung a,Ref 22:24 2Kum 24:8-15; 2Khang 36:9-10;
25 nangmah a that nuamtu, na lau zetmi tei lamah pia tung. Babilon kumpi Nebuchadnezzar le a ngalkap tei lakah pia tung.
26 Saltannak ngamah nangmah cu na nu tuah hawlvawk tung. Na suahnak uh ngam ahi ngawlmi ngamdangah hawlvawk tung a, mahlai ah thi tuk uh ci.
27 Hih ngam hi ngaizet tuk nave uhcin, kikleh tukma uh ci,” tin ti.
28 Kei in, “Kumpipa Jehoiakhin cu a kehmi beel, kuamah i deihleh ngawl tohmi beel bangin maw na can? Mah hangin aw amah le a cate cu a theih awng haw ngawlmi saltannak ngamah a pui thong haw?” tin ti ing.
29 Aw, ka ngam,
Topa i otmi hi ngai in!
30 “Hi pa hi a cate
pha thong tukin
ngaihsutsa hi.
Ituk mahten a lawhting
tuk ngawlmi hi.
A casuan sung pen
David ai-awhtu le
Judah ngamuktu tuk
kua mah um haw ma.
Keimah, Topa in
hilh zo toh ing,” ti hi.