21
Jerusalem Siat Tuk Hilhhamnak
1 Judah kumpi Zedekiah in, Malkhiah capa Pashhur le Malkhiah capa thiampi Zefeniah cu ka lakah hahin, hi bangin ngen hi.
2 “Keimu ai-in Topa i lakah otsakin hi. Itahim titale Babilon kumpipa Nebuchadnezzar in, a ngalkapte tuah ka khuapi uh kil khawng zo haw hi. Topa in ni dang laihin, a bawl awng mek bangin nalamdang pa kha khat bawlin, Nebuchadnezzar cu nunglamah kik lehtik thei,” ti hi.Ref 21:2 2Kum 25:1-11; 2Khang 36:17-21;
3 Topa i awnkam cu ka lakah hengin, Zedekiah i hahmi lakah,
4 Topa Israel i Pathian i thu cu Zedekiah hilh tukin phuang ing. Topa in, “Zedekiah, Babilon kumpi le a ngalkapte dotu na ngalkapte cu keimah in do in neh tung hi. Na ngalkap tei hiamnamte cu khuapi laizangah seh khawng tung.
5 Nangmah cu ka ngilnak hempoh, ka thinuknak le ka thin pulhangnak hempoh tuah do tung hi.
6 Hi khuapi sung a um hempoh that khawng tung; mihing le ngamsate cu natsia in thi haw tuk hi.
7 Mahnaven nangmah le na khutnuai bawite cu ngaldonak, pamnak le natnak pen a luattu panote tuah nangmah a that nuamtu kumpi Nebuchadnezzar in kuamah khawih ngawlin that khawng tuk hi. Hehpihnak le lainatnak na humah imah nei tukma. Keimah, Topa in hilh zo ing.”
8 Topa in, mipi tei lakah a hilh tukin, “Ngai hem un, keimah Topa in, na ten tuk uh pa nih pia zo ing. Nunnak lampi le thihnak lampi.
9 Hi khuapi sungah a ummi cu ngaldonakah thi haw tuk hi. Mahma tale an ngawlin le natnak hangin thi haw tuk hi. Mahnaven hi khuapi a do litu Babilon tei lakah hawhin, a luttumte cu that ngawlin luat haw tuk hi.
10 Hi khuapi cu khawih tuk ngawlin ngaisung cat zo ing a, siatsuah tung hi. Babilon kumpipa i lakah piak hi tuk a, lei ah kanglal khawngvo in haal tuk hi. Keimah, Topa in hilh zo ing,” ti hi.
Judah Kumpi Innkua Ca Thukhennak
11-12 Topa in, David casuan Judah kumpi i innkua ah hilh tukin hi tin hilh hi. “Keimah, Topa i hilhmi hi ngai hem un! Nisialin thuman son un hi. A zol le a zotsak lih haw mi cu a zawnsak litu i khut sung pepan un. Mahti bangin na bawl uh ma tale thil sual na bawl uhmi hin ka thinuknak cu mei bangin alhtotik haw tuk hi.
13 Jerusalem nang cu lawnlai pen a poto mi suang bangin munlawn hum munsangah khung ci. Mahnaven nangmah do tung. Kuamah in kei do thei haw tukma, ka sihsan khualnak munah kuamah tum thei haw tukma ti hi.
14 Mahnaven, na thil bawlmi hangin bawlsia tung. Na inn phate cu mei tuah haal tung a, a elkim hempoh vang kang khawng tuk hi. Keimah, Topa in hilh zo toh ing,” ti hi.