18
Beel Bawlpa Innah Jeremiah Hawh
1 Topa in,
2 “Beel bawlpa i innah hawh inna, mah lai pen thuhilh tung,” ti hi.
3 Mah hangin hawh ing a, beel bawlpa cu a beel bawlnak lengkual tuah na a dek li laih cu mu ing.
4 Beel bawl ten tungman cu lomin, a bawlmi a pha ma tale beel dang a deihmi ah bawlleh haw hi.
5 Topa in, ka lakah
6 “Beel bawltu in tungman tuah ama deih bang a bawl bangin Israel mite na hum uhah bawl theihnak nei bokma hing maw i kaw? Tungman cu beel bawlpa i khut sungah a um bang bokin nangmuh vang ka khut sungah um bok uh ci.
7 Vei kha khat ten miphun pa khat, mahma tale uknak pa khat bot vawk tung, sukeh khawngin, siatsuah tung ka tih nungten,
8 mah miphun cu thil sual a bawlnak pen a kikleh thei tale, bawl tukin ka tihsa mi cu bawl suakleh tuk mang hi.
9 Mahnaven vei kha khat ten miphun pa khat, mahma tale uknak pa khat dingtik tung a, khangtotik tung ka tih nungten,
10 mah miphunin, ka thu ngai ngawlin sualnak a bawl tale bawl tung ka tihmi cu bawl suakleh tuk mang hi.
11 Atu-in, Judah mi le Jerusalem mite cu hilhin; amu ca in, a pha ngawlmi bawl tukin, tuptahnak nei ing a, amuh bawlsia tukin tuangtim li laihtak ing. A nunnak suaksual haw khi tawp haw henna, a nungcang haw le a thil bawl haw mite cu khel haw hen.
12 Amuh in! Ita khelh tuk ung kaw? Keimu nuam bangin mi lunglian le mipha ngawl cu hi tho pah ni ung, tin ti haw tuk hi.”
Mipi Ten Topa Lawl Haw
13 Topa in,
“Hitih bang hi ilai ngam hei ah
cang awng maw?
Miphun hempoh dong hem un.
Israel miten mullinghuai
bawl haw hi.
14 Lebanon ngam a,
suang mual sangpi humah,
vukta ngawlin um awng a maw?
A dap zetmi mual sangpi hum pen,
luitui luang mite itik laihin
kang awng haw kaw?
15 Mahnaven ka mihingte in
phawkngil haw,
milim lakah namtuite haal haw hi.
A hawhnak haw tuk lampi ah
hawhin bah haw hi.
Lampi lun zuileh haw ma toh.
Selh ngawlmi lampi ah
hawh lamsang haw hi.
16 Hi ngam hi mullinghah ngam
suaktik zo haw hi.
A kumkhua zotsak tukin hi.
A elah a hawhtu le
a mutute cu; amthongin
lu thing haw hi.
17 Ka mite cu a ngal tei mai ah,
khen khektik khawng tung.
Nisuahnak lam a, huihpi in
ngunphil amuh vawk bangin,
nunghek zam tung.
Siatsuahnak a hen ten
bawm tuk mang,” ti hi.
Jeremiah Sual Zei Haw
18 Mahten mipi ten, “Jeremiah hi itih bangin kaw a suam theih tuk uh! Eimuh zilhtu tuk thiampi dang, thudot tuak tuk micip le Pathian i thu phuangtu tukin profet a dangte um leleng haw tuk poh. Mah hangin a humah thu zei nung inna, a thu ngaileh tuk mang tin ti haw ti.”
19 Mah hangin hi bangin thungen ing: “ Topa, ka thu hi ngai zazal inna, ka ngal tei a hilh haw mi thu cu theihsak zazalin hi.
20 Phatnak cu phatngawlnakin lulleh tuk ing maw i heng? Mahnaven ka caksuknak tukin leikuat zo haw toh. Na lakah hungin, na thinuknak tuah na bawlsiat ngawlnak tukin ka kutnak aw za leng poh ci.
21 Mahnaven Topa a cate cu tuile an ngawlin le ngalkhut sung pen thi haw tahen. Numeite cu pasal nei ngawl le ca nei ngawlin thi khawng haw tahen. Panote vang pulhnat tuah thi haw henna, a tangvalte cu ngal sungah thi khawng haw hen.
22 Phawhkhak him ngawlin a inn haw a sim tukin mihonpi hah inna, lau mah takin au leilui haw tahen. Keima caksuknak tukin lei co haw a, keimah awk tukin thang siah zo haw hi.
23 Mahnaven, Topa, ka sual a zeinak haw le thah a tumnak cu thei khawng leng poh ci. A phat ngawlnak haw cu ngaidam pahsun, a sualnak haw vang ngaidam pahsun hi. Na mitmuhin lum buabualtik inna, na thinuk laihin, siatsuah khawngin, tin ti ing.”