19
A Kehmi Beel
1 Topa in, beel leitik hi. Upa khenkhatte le thiampi upa saw deuhte pui in ti hi.
2 Beelpei Kongka pen tulin Hinnon munlawnah hawh tukin hilh hi. Mahlai ah a hilhmi thuhilhleh tung hi.Ref 19.2 2Kum 23:10; Jer 7:30-32; 32:34-35;
3 Topa in, hi bangin hilhin ti hi. “Judah kumpite le Jerusalem mite, Cungnungbel Topa Israel Pathian keima hilhmi hi ngai hem un! Hi munah siatsuahnak nasezet hengtik tung a, a theitu hempoh lamdangsazet haw tuk hi.
4 Hitih bang thil cu hengtik tung, itahim titale mipi ten nunghekin, khawhuai tei lakah biakpiaknakte pia in, hi ngam hi nintik zo haw toh hi. Mah khawhuaite cu amuh le a pu le pate hei hihen, Judah kumpi lak pen hihen, a theih awng haw ngawlmi hi. Hi ngam cu mawh nei ngawl tei thisan tuah dimtik hi.
5 A cate cu biakpiaknak mei ah haal tukin Baal khawhuai ca in, biaklan dawh haw hi. Hitih bang bawl tukin thupia awng mang.Ref 19.5 Thiam 18:21;
6 Mah hangin hun cu heng tuk ven hi mun cu Tofeth, mahma tale Hinnon munlawn tin kuamah in tileh haw tukma toh hi. Mahmi ai-in, mi thahnak munlawn tin ti haw tuk hi.
7 Hi munah Judah mi le Jerusalem mitei tuptahnak cu pelhsolhtik khawng tung. A ngalte cu nehtu hitik tung a, a ngal haw ten that haw tuk hi. A cik haw cu vano le ngamsa tei eih tukin pia tung.
8 Hi khuapi humah siatsuahnak nasezet hengtik tung a, a elah a hawhsuk, a hawhto ten amthong haw tuk hi.
9 A ngal haw le amuh a that nuamtu ten simtum haw tuk a, eih tuk a um ngawl leita hangin, a capa le canu tei cik nangawnin eitik tung a, mi hempoh ten amu innnel tei cik ei haw tuk tin,” ti hi.
10 Topa in, keimah tuah a hawh langkhat upa tei mitmuhin, leibeel cu sukehin ti hi.
11 amu lakah Cungnungbel Topa in, “Hi mihingte le hi khuapi hi cu khopleh theih ngawl tohmi beelkeh bangin kehtik khawng tung hi. Mihing tei luangte cu Tofeth munah vui haw tuk hi. Itahim titale mundangah amuh vuinak tuk imah lai ah um tukma hi.
12 Hi khuapi le khuasung mite cu Tofeth bangin bawl tung, tin tiamsa zo toh ing.
13 Jerusalem innte, Judah kumpi innte le inn dadang, a hum pen aksi lak a, namtui a halnak haw le pathian dang lak a, biakpiaknak sabittui a leihnak inn haw hempoh cu Tofeth bangin a thiang ngawlmi in cang haw tuk,” ti hi.
14 Topa i a thuphuang tukin a hahnak mun, Tofeth pen hawh leleu ing. Biakinn sungah ding ing a, mipi tei lakah, a thu phuang ing.
15 Cungnungbel Topa, Israel i Pathian in amu lakah, “Hengtik tung ka tihmi bawlsiatnak hempoh cu hi khuapi le a elkim a, khua tei humah hengtik tung; itahim titale thuhilh sang ngawl mi lunglian a hih haw hangin ka hilhmi a ngai nuam haw ngawl hangin,” ti hi.