17
Judah Sualnak le Dantatnak
1 Topa in, “Maw Israel mite, na sualnak uh cu thikzum tuah ngatin um hi; na lungmu uh humah suangval hiam tuah ngat hi a, na biaklandawh kilah khetcih hi.
2 Na mipi uhten khawhuainu Asherah ca in, a bawl haw mi hampa lak a, muallek hum le mualniam hum a, thinglim nuai hempoh a, biaklandawhah le,
3 ngamsung thingmung thiangtho a phutnak haw hempoh ah khawhuai bia haw hi. Na ngamsung hempoh ah sualnak na bawl uh hangin, na neih le lam, na sum le pai a longtu tukin na ngal uhte cial tung hi.
4 Ka piakmi na ngam uh cu zam tuk uh ci a, midang khut sungah na ap uh kul tuk hi. Na theih awng uh ngawlmi ngam sungah na ngal tei nadek tuk uh ci, itahim titale ka thinuknak cu mei bang hi in, a kumkhua in alh tuk,” ti hi.
5 Topa in,
Keima lak pen tai in,
mihing a muangtu cu
keimah in lawl tung.
6 Amah cu phillawn a po mi
sawlbawk bang hi.
Ngamko le ngamkhing
lei alnak ngam,
imah a po thei ngawlnak
sawlbawk bang hi.
A lakah thilpha imah heng
7 Mahnaven keimah a muangtu cu,
muicu pia tung.
8 Tuimawk pen a po mi thingkung,
a zung tui a mutmi
thingkung bang hi.
Khua khal hun a, nisa hei
lau ngawlin ngah leleng hi. Ref 17:8 Saam 1:3;
9 Mihing tei lungmu cu
akua kaw a thei zo tuk?
Thildang sangin mizol mangbel hi;
Damtik tukin haksa zetin,
a natnak na sia leita.
10 Keimah, Topa in
mihing tei ngaihsutnak cu
mu ing a, a lungmu khingkhai ing.
Mi hempoh amu nungcang
bangin zo ing a, amu bawl bangin
lulleh bok ing,” ti hi.Ref 17:10 Saam 62:12; Mang 2:23;
11 A man ngawlin sum le pai
a ngahtu mihing cu
mah i tui ngawl a optu
vano bang hi.
A khanphat laihtakin,
a neihnak bo tuk hi.
A tawpnak ten misilin cang tuk hi.
12 A Biakinn uh hi kumpi khunnak
sunglawi bang hi.
A pat tung pepan mual sangpi humah
ding hi.
13 Topa, nang cu
Israel tei muansannak hi ci.
Nangmah a lawltu cu
mualpho haw tuk hi.
Nunnak ciktui Topa
nangmah
a lawl haw hang hi.
Jeremiah In Topa Bopnak Ngen
14 Topa aw, damtik inna, dam loli tung; pan inna, himdamzet tung. Ka pahcoihmi cu nangmah bek hi.
15 Mipi ten ka lakah, “ Topa i thupnak le nawmcannak ilai lamah heng? Kimtik ngangai hen,” tin ti haw hi.
16 Mahnaven, Topa, a hum hawah haksatnak a hengtik tukin so awng mang hi. Haksatnak a tawh haw cu ka lungtupmi hei kha ma hi. Topa, mahmi cu na theih mi hi, ka ot mi vang thei poh ci.
17 Ka ca in, a lauhuaimi hi zazal pahsun hi, haksatnak a hen ten ka himnak hi ci.
18 A bawlsiatu tei humah zahcaknak hengtik zazalin hi, mahnaven Topa kei hi luattik zazal aw maw. Amuhte cu thinsuknak tuah dimtikin hi. Mahnaven kei cu luattik zazal poh aw maw. A hum hawah siatsuahnak hengtik inna, a muhte cu sepkeh niknek khawngin hi.
Sabbath Ni Can Dan Tuk
19 Topa in, ka lakah, “Jeremiah, mipi tei kong biang tihmi, Judah kumpi tei khuasung tum le tulnakah hawh inna, ka thu phuangin; mahceng ten Jerusalem kongka dangte ah vangin hawhin hi.
20 Kumpite le Judah mi hempoh le Jerusalem khua sungmi, hi kongka pen a tum, a tul mite cu hi ka thuhilhmi ngai tukin hilhin hi.
21 A nunnak a it haw tale Sabbath ni-in, imah pua haw pahsuh henna, Jerusalem kongka ah imah tulpih haw pahsuh hen.Ref 17:21 Neh 13:15-22;
22 Sabbath ni-in, nadek haw ma hen hi. A pupa tei lakah thu ka piaknak bangin Sabbath ni cu ni zehsah a hih hangin cang haw hen.Ref 17:22 Suah 20:8-10; Daan 5:12-14;
23 A pupa haw ten ka thu ngai ngawlin kinmawh haw ma hi. A lungmu haw khohin, ka thuzui ngawlin cung nuam haw ma hi.
24 “Ka thupiakmi zui loli tukin mipite hilhin hi. Hi khuasungah ibang poh pua in, Sabbath ni-in, tumpih haw pahsuh hen. Sabbath ni cu ni zehsah a hih bangin cang haw henna, nadek viang haw pahsuh hen.
25 Mahti bangin a bawl haw tale, a kumpi le a bawite cu Jerusalem kongbiangah tumin, kumpipa bangin huham nei bok haw tuk hi. Judah mi le Jerusalem mite tuah munkhatah cipuh le cipuh leng hum khungin, Jerusalem khuapi sungah mihing dim leleng haw tuk hi.
26 Judah khuate le Jerusalem khua elkim khuanote pen mi tampi hung haw tuk, Benjamin ngam, hanglam tei ngam, mualhum ngam le Judah ngam hanglam hei pen hung haw tuk hi. Ka Biakinn sungah halkang biakpiaknak le biakpiaknak dadang, cangho vam biakpiaknak le namtui le lungdamnak ca in piakmi vang keng haw tuk hi.
27 Mahnaven ka thuzui in, Sabbath ni cu zehsah a hih hangin a can haw kul hi. Hi ni-in, Jerusalem kongbiangah imah pua thei haw tukma. A pua leng haw tale Jerusalem kongbiang cu mei tuah haal tung hi. Jerusalem kumpi tei inn vang mei in kang tuk a, a cuh theitu kuamah um haw tukma,” ti hi.