16
Jeremiah Ca Topa Tuptahmi
1 Topa i awnkam cu ka lakah hengin,
2 zi huai tukma ci, hitih bang khua le ngamah canu, capa hei nei tukma ci.
3 Hi ngam a, cano a hin haw mitei humah ithu heng tuk hum tih cu hilh tung.
4 Natnak a phunkim tuah thi haw tuk naven a kahtu hei kuamah um haw tukma. A luang haw cu lei lakah ekdawm bangin thehkeh hi haw tuk hi. Ngaldonakah thi haw tuk, an eih tuk um ngawlin thi haw tuk, a luang haw cu vano le ngamsa tei an hi tuk hi.
5 “Mithi ngaihnak innah tum pahsun. Kuamah thasiat pih pahsun. Ka mite cu lemdaihnak tuah thupha pialeh tukma toh ing. A hum hawah hehpihnak le lainatnak vang neileh tukma toh ing.
6 Hi ngamah mihau hihen, mi ca-ngah hihen, imah nei ngawlte tuah thi lang khat ten haw tuk a, phumtu tuk kuamah nei haw tukma. Kahtu hei nei haw tukma. A lungsiatnak haw langtiknakin, kuamah in, namno tuah atdun haw tukma, a lu haw hei met haw tukma.
7 A ih haw mi, a thih ten kuamah in hehnemnakin tui le ankuang kilpih haw tukma hi. A nu le a pa tei thih hei ten kuamah in tohpih haw tukma.
8 “An eih puai a bawlnak haw inn sungah tum kha pahsun. In le ei bok tukin amu lakah khungkha pahsun.
9 Cungnungbel Topa, Israel Pathian keima awnkam hi ngai in hi. Nangma nunsungah le na mitmuh loli in, lungdamnak, thatuinak thawmnging le mo cannak puai thawm ngingte cu hih ngam sungah pha thongtik khawng tung hi.Ref 16:9 Jer 7:34; 25:10; Mang 18:23;
10 “Mahti bangin na hilh khawng ceng ten, itakaw, mahtih lawlawmin, a bawlsia tukin Topa in, a ngaihsut? Iti bang sualnak nei ung a, iti bang sualnak kaw Topa ka Pathian uh i humah a bawl uh? tin dong haw tuk ven.
11 Keimah, Topa i hilhmi cu hilhin; “Na pu le pa ten keimah zamin, pathian dang tei nadekin bia haw hi. Nunghekin ka thu zilhmi zui nuam haw ma.
12 Mah i humah nohte cu na pu le pa uhte sangin, luai saw lalaih uh ci. Na venghawng uhin mi lungkhoh le mi suaksual hi uh ci a, ka thu ngai nuam viang ma uh ci.
13 Mah hangin hi ngam pen lawl tung a, nangmuh hihen, na pu le pa uhte hihen na theih awng ngawl uhmi ngamah kuat tung. Mahlai ah a sun, a zanin pathian dang i na cu dek tuk uh ci, na hum uhah hehpihnak imah nei tuk mang, tin hilhin,” ti hi.
Saltannak Pen Kihlehnak
14 Topa in, “Hun cu heng tuk a, mihing ten Izipt ngam pen Israel a puitultu a nungmi Pathian i minsalin, thutiamleh haw tukma toh.
15 Saklam ngam pen le ka sehkehnak ngamte pen Israel mi a puitultu a nungmi Pathian samin thutiamnak bawl saw haw tuk hi. Amu ngam, a pu le pa tei lak a, ka piakmi ngamah kiklehtik tung. Keimah Topa in hilh zo ing.”
Dantatnak Heng Tuk
16 Topa in, “Ngasa mantu tampi sam tung a, hi mihingte hi mantik tung. Mual sang le mualniamah hihen, suanghol le suangbukah hihen, amuh zeitu le hiltu tukin muksu tampi hah tung hi.
17 A nadeh haw hempoh mu khawng ing. Ka mai ah a sel theih haw imah umma; A sualnak haw ka muh ngawlmi imah umma.
18 A sualnak haw le a phat ngawlnak cu a let nihin lohlehtik tung. Itahim titale mithi luang bang nunnak a nei ngawlmi, milim ten ka ngam nawngkaitik haw a, imah ahi ngawlmi pathian dimtik zo haw toh hi.”
19 Topa, nangmah in humhim ci a, ngilnak pia ci. Haksat hun ten bawm ci. Vanmawk deng pen miphun tampi hung haw tuk a, na lakah, “Ka pu le pa ten zolthu le imah nemcuam ngawlmi khawhuai sial ngawl imah nei haw ma; a neih haw mi cu imah a nemcuam ngawl milim bek hi.
20 Mipi ten amuhno pathian bawl thei haw a ni maw? Bawl thei ma; a bawl thei lelei haw hei in, pathian ngangai hi tukma hi,” ti haw tuk hi.
21 Mah hangin Topa in, “Mahti bang ahi tale, kumkhua ca in, ka huham le ka ngilnak cu miphun hempoh theitik tung; Topa ka hihnak hi thei haw tuk,” ti hi.