4
Hi Leipi Tuah Ngualmatnak
1 Pa khat le pa khat hauhdunnak le vahdunnakte i lai pen heng him? Tisa nopnak na deihnak uh pen heng a, tisa sungah catngawl sualdun leleng haw hi.
2 Thil pa kha khat deihin, na co theih uh ngawl ten mithah tuk vang ngam uh ci, na deih uhmi thil na ngah theih uh ngawl ten haudunin, sualdun uh ci. Na deih uhmi Pathian nelah na nget uh ngawl hangin ngah ma uh ci.
3 Mahten na nget uh hei ten ngah ma uh ci. Itahim titale na lungmu uh pha ma hi. Nangmu taksa lungkimnak tuk bekin ngen uh ci.
4 Muantak ngawl mihingte leipi tuah ngualcam pha na hih uh cu Pathian tuah ngaldunnak hi tih thei ma uh cim? A kuakua hei in, leipi tuah a komduntu cu Pathian i ngalin, a bawlcopmi hi.
5 Lai Thiangtho sungah, “Pathian in eimu sungah a koihmi hawvang cu nase zetmi itnak tuah dim hi,” tin, a tihmi cu sullam nei ngawlmi hi, tin ngaisung sual pahsuh un.
6 Mahnaven Pathian i piakmi hehpihnak cu mah sangin ngil saw hi. Hi lai thiangtho i tihnak bangbokin, “Pathian in mi pualthaute do in lungnem mite hehpih hi.”Ref 4:6 Thup 3:34;
7 Mah hangin Pathian deihnak a zuitu hi un. Satan cu do unna, nangmu lak pen tai paih tuk hi.
8 Pathian neek unna, neek bok tuk hi. Noh misualte, na khut uh a ciangno in som un, noh mi ultungte na lung uh thiangtik un.
9 Thasia in um un; kapin tauli un, na nuihnak uh cu kahnak tuah thek unna, na lungdamnak uh cu thasiatnak tuah thek un hi.
10 Topa i mai ah niamkhiatdun unna, amah in khaisang saw tuk hi.
Khristian Unau Sonsia Pahsun
11 U le naute aw, nohte pa khat le pa khat sonsiadun pahsuh un. Khristian unau dang a sonsiatu le a mawhsiattu cu Daan a sonsiatu le a vawktu hi. Daan na sonsia uh tale Daan zuitu hileh ngawltohin, a mawhsiattu hi saw uh ci.
12 Daan a piatu le Daan i humah thu a khen theitu cu Pathian pa khat bek hi. Amah bek hi mi nunpan theitu le siatsuah theitu hi. Na mihing pihte mawhsiatin, a thukhentu tukin na bawldun ten, kei akua hing ngim tin ngaisungdun nge cim?
Ultung Pahsuh Un
13 Tuni ahimata zingten khualzintuk hung a, khua pa khatah heng tuk hung, mahlai munah kum khat hawng ka um nung uhten sumbawlin tangka tampi nei tuk hung, tin, a ti mite, ka sonmi hi ngai un.Ref 4:13 Thup 27:1;
14 Na nunnak uh cu zingten i cang tuk him tih thei ma uh ci. Na nunnak uh cu hun comno sungah zaamin, a thaamleh theimi meingo bang hi.
15 Mah hangin, “ Topa i lungkimnak a um tale nung hih tuk laih hung a, hi khi, mah khi bawl tuk hung,” tin a ti tukmi hi saw uh ci.
16 Mahnaven a tubang ahi tale pualthau le ngalin ultungzet uh ci, mahtih bang ultunnak cu a pha ngawlmi hi.
17 Mah hangin thilpha bawl tuk thei lengin, a bawl ngawltu cu misual hi.